تۇركىستاندا دزيۋدو كۇرەسىنەن ءجاسوسپىرىم ۇلدار مەن قىزدار اراسىندا قازاقستان چەمپيوناتى ءوتتى. ەل بىرىنشىلىگىنە استانا, الماتى, شىمكەنت قالالارى مەن 17 وبلىستان 820 جاس تاتامي شەبەرى قاتىسىپ, 8 سالماق دارەجەسىندە كۇش سىناستى.
تۇركىستان توپىراعىندا العاش رەت وتكىزىلگەن ەل بىرىنشىلىگى جوعارى دەڭگەيدە ۇيىمداستىرىلدى. جارىستىڭ سالتاناتتى اشىلۋ راسىمىندە تۇركىستان وبلىسى اكىمدىگىنىڭ اپپارات باسشىسى ەركەعالي الىمقۇلوۆ قاتىسۋشى سپورتشىلاردى قۇتتىقتاپ, ساتتىلىك تىلەدى. كۇرەس باسەكەسىنە جان-جاقتى قولداۋ كورسەتكەن وبلىستىق دزيۋدو فەدەراتسياسىنىڭ پرەزيدەنتى حاميتدين جارقىنبەكوۆ ەل بىرىنشىلىگىنىڭ وڭىردە ءوتۋى جاستاردىڭ سپورتتا شىڭدالۋىنا كوپ سەپتىگىن تيگىزەتىنىن ايتتى. ال ەلىمىزدىڭ دزيۋدو كۇرەسىنەن جاسوسپىرىمدەر اراسىنداعى اعا جاتتىقتىرۋشىسى مەيىرلان بايماحانبەتوۆ جارىسقا قاتىسۋشى سپورتشىلار جوعارى دايىندىقپەن كەلىپ, تاتامي تورىندە تارتىستى بەلدەسۋلەر وتەتىنىنە سەنىم ءبىلدىردى.
ارينە, تۇركىستاندىق جانكۇيەردىڭ بۇيرەگى ءوز ءوڭىرىنىڭ بالۋانىنا بۇيىراتىنى ءمالىم. بۇل ورايدا جارىستىڭ العاشقى كۇنىندە قىزدار اراسىندا 48 كيلوعا دەيىنگى سالماق دارەجەسىندە باق سىناعان سارىاعاشتىق سىمبات تاعاي مەن ۇلدار اراسىندا 55 كيلوعا دەيىنگى سالماقتا بەلدەسكەن ەرنۇر باتىرعالي التىن مەدالدىڭ يەسى اتانىپ, جەرگىلىكتى جانكۇيەردى قۋانتتى. جالپى, «Olympic Center» سپورت كەشەنىندە وتكەن جارىستا بوزكىلەمگە شىققان ءاربىر سپورتشىنىڭ جەڭىسكە جەتۋدى كوزدەگەنىنە جانكۇيەر اتاۋلى كۋا بولدى.
سونىمەن, جەكەلەي جارىستار ناتيجەسى بويىنشا تۇركىستان وبلىسىنىڭ كومانداسى 3 التىن, 1 كۇمىس جانە 1 قولا جۇلدەمەن جالپى مەدال كەستەسىندە كوش باستادى. ال جەتىسۋ وبلىسى 2 التىن, 2 كۇمىس جانە 4 قولا جۇلدەمەن ەكىنشى ورىنعا تۇراقتاسا, قىزىلوردا وبلىسى 2 التىن, 1 كۇمىس جانە 3 قولا جۇلدەمەن ۇزدىك ۇشتىكتى تۇيىندەدى. ناقتىراق ايتساق, قىزدار اراسىندا 40 كيلو سالماقتا سەۆينچ ابدۋكادىروۆا (شىمكەنت), اسەل رۋسلانوۆا (اتىراۋ وبلىسى, 44 كگ), سىمبات تاعاي (تۇركىستان وبلىسى, 48 كگ), فاتيما سۋپۋعاليەۆا (بقو, 52 كگ), نۇراي جەڭىس (جەتىسۋ وبلىسى, 57 كگ), كوركەم ورىنبەك (الماتى, 63 كگ), توميريس ەرعالي (قاراعاندى وبلىسى, 70 كگ), نۇرشات كەمەلحانقىزى (جەتىسۋ وبلىسى, +70 كگ) التىننان القا تاقسا, ۇلدار اراسىندا ماعجان جولداسبەك (قىزىلوردا وبلىسى, 50 كگ), ەرنۇر باتىرعالي (تۇركىستان وبلىسى, 55 كگ), باقداۋلەت قابدەشوۆ (الماتى, 60 كگ), يسلام اباي (تۇركىستان وبلىسى, 66 كگ), شامسيدين اپاك (الماتى وبلىسى, 73 كگ), راسۋل مۋحۋم (جامبىل وبلىسى, 81 كگ), سانجار ەرۇلان ۇلى (قاراعاندى وبلىسى, 90 كگ), دىنمۇحاممەد نىسانباي (قىزىلوردا وبلىسى, +90 كگ) ەل چەمپيونى اتاندى.
تۇركىستاندا وتكەن چەمپيونات ناتيجەسى بويىنشا 2024 جىلعى سپورت ماۋسىمىندا ازيا جانە الەم چەمپيوناتى سىندى باسەكەلەردە ەل نامىسىن قورعايتىن دزيۋدودان جاسوسپىرىمدەر قۇراما كومانداسى جاساقتالادى.
تۇركىستان