وبلىس ءباسپاسوزىنىڭ قاراشاڭىراعى سانالاتىن «وڭتۇستىك قازاقستان» قوعامدىق-ساياسي گازەتى عاسىر بويى ءوڭىردىڭ شەجىرەسىن جازىپ كەلەدى. باسىلىمنىڭ مەرەيتويىن اتاپ ءوتۋ ماقساتىنداعى ءىس-شارالار اياسىندا تۇركىستاندا «ەسكىرمەيتىن ەستەلىك» فوتوكورمەسى ۇيىمداستىرىلدى.
«كونگرەسس حولل» كەشەنىندە وتكەن فوتوكورمەنىڭ اشىلۋ سالتاناتىندا وبلىس اكىمىنىڭ ورىنباسارى بەيسەن تاجىباەۆ تاريحى وتكەن عاسىردان باستالاتىن گازەتتىڭ ماڭىزى ەرەكشە ەكەنىن اتاپ ءوتتى.
«ۇلتىمىزدىڭ ءبىرتۋار ارىستارى قالام تەربەگەن تاريحي باسىلىم بۇگىندە يگى ىستەردىڭ, جەتىستىكتەردىڭ جارشىسى بولىپ كەلەدى. گازەتتىڭ 100 جىلدىعى اياسىندا اۋقىمدى, تاعىلىمى مول ءىس-شارالاردى كوپتەپ وتكىزۋ جوسپارلانىپ وتىر. بيىل وسىناۋ مەرەكە اياسىندا جىل كولەمىندە وبلىستىق, رەسپۋبليكالىق دەڭگەيدە بىرقاتار ءىس-شارانى وتكىزەمىز», دەدى بەيسەن داۋلەت ۇلى. ال «وڭتۇستىك قازاقستان» وبلىستىق قوعامدىق-ساياسي گازەتىنىڭ ديرەكتور-باس رەداكتورى اباي بالاجان باسىلىمنىڭ عاسىرلىق تاريحىنا توقتالدى. فوتوكورمەنىڭ ءمان-ماڭىزى جايلى اڭگىمەلەدى. «تۇنبا باستاۋىن «اق جول» گازەتىنەن الاتىن بۇل باسىلىمدى شىعارۋعا سۇلتانبەك قوجانوۆ, تۇرار رىسقۇلوۆ, مىرجاقىپ دۋلات ۇلى, ءنازىر تورەقۇلوۆ سەكىلدى ۇلت قايراتكەرلەرى اتسالىسىپ, حالىق مۇددەسىن كوزدەيتىن ماقالالارى مەن شىعارمالارىن جاريالاپ وتىرعان. ودان بەرىدە قازاق رۋحانياتىنىڭ ءسوزىن سويلەپ, جوعىن جوقتاعان بۇل گازەتتە مۇحتار اۋەزوۆ, جۇسىپبەك ارىستانوۆ, بەيسەنباي كەنجەباەۆ سىندى ءبىرتۋار تۇلعالاردىڭ قالامىنىڭ تابى قالعان. وتكەن عاسىردىڭ ەلۋىنشى-سەكسەنىنشى جىلدارى ارالىعىندا دا «وڭتۇستىك قازاقستان» گازەتى ءوز مۇراتىنان اينىماي, كەڭەستىك تسەنزۋراعا قاراماي سالت-ءداستۇرىمىزدى, تاريحىمىزدى, ءتىلىمىزدى, ءدىلىمىزدى كەيىنگى ۇرپاققا جەتكىزۋ, رۋحانياتىمىزدى ساقتاپ قالۋ جولىندا تالماي قىزمەت ەتتى. گازەتكە سول جىلدارى رەداكتورلىق جاساعان, رەداكتسيادا قىزمەت ەتكەن اعا بۋىن وكىلدەرىنىڭ بارلىعى وسى جولدا تەر توگىپ, ۇلت ءۇشىن قىزمەت ەتتى. ەلىمىز تاۋەلسىزدىك العاننان كەيىن دە گازەت سول سوقپاقتى ءارى قاراي جالعاستىرىپ, ەگەمەن ەلىمىزدىڭ ساياسي تۇراقتىلىعىن ساقتاۋ, وبلىس ەكونوميكاسى مەن مادەنيەتىن دامىتۋ جولىندا ماڭىزدى ءرول اتقارىپ كەلەدى», دەدى اباي بەكنازار ۇلى.
فوتوكورمەدە باسىلىمنىڭ ءار جىلدارداعى تاريحى فوتوسۋرەتتەر ارقىلى كورەرمەن نازارىنا ۇسىنىلىپ وتىر. مۇندا تەك رەداكتسيا ۇجىمىنىڭ عانا ەمەس, بۇكىل وڭتۇستىك ءوڭىردىڭ تاريحىندا وزىندىك ورنى بار تۇلعالاردى تابۋعا بولادى. سونداي-اق كورمەگە «وڭتۇستىك قازاقستان» گازەتىنىڭ ءفوتوتىلشىسى قايسار شەرىمنىڭ جەكە شىعارماشىلىعىنان الىنعان تۋىندىلار دا قويىلعان.
تۇركىستان