ەڭبەككە قابىلەتتى جاستاعى قازاقستان ازاماتتارىنىڭ 20%-دان استامى نەسيە تولەۋ مەرزىمىن 90 كۇننەن استام ۋاقىت كەشىكتىرىپ وتىر. بۇل «AMANAT» پارتياسى ۇيىمداستىرعان «قارىزسىز قوعام» ۇلتتىق جوباسى اياسىندا جۇرگىزىلگەن زەرتتەۋدە انىقتالدى, دەپ حابارلايدى Egemen.kz اتالعان پارتيانىڭ ءباسپاسوز قىزمەتىنە سىلتەمە جاساپ.
وتكەن جىلى بۇل جوبا ەلىمىزدىڭ 65 مىڭ تۇرعىنىنا قارجىلىق ءتارتىپ نەگىزدەرىن ۇيرەتىپ قانا قويماي, قارجىلىق ادەتتەرىن قايتا قاراۋعا كومەكتەستى, سونىمەن بىرگە حالىقتىڭ قارجىلىق جاعدايى تۋرالى ماڭىزدى قورىتىندى جاساۋعا مۇمكىندىك بەردى.
دەرەكتەرگە سايكەس, بانكتەر مەن باسقا دا قارجى ۇيىمدارىنا قارىز ادامدار سانى 1,7 ميلليوننان 2 ميلليونعا دەيىن جەتەدى. مەملەكەتتىك قولداۋ باعدارلامالارى مەن جەڭىلدەتىلگەن نەسيەلەۋ ازاماتتارعا ۇلكەن مۇمكىندىكتەر اشىپ وتىر. بىراق ولاردىڭ كوپشىلىگى تابىسىن نەمەسە كەپىلدىگىن راستاي الماعاندىقتان ونى پايدالانا المايدى, تيىسىنشە بۇل ولاردى قارجى ينستيتۋتتارى ءۇشىن «سەنىمسىز» ەتەدى.
«AMANAT» پارتياسىنىڭ حاتشىسى ەلدار جۇماعازيەۆ اتالعان ماسەلە كولەڭكەلى ەكونوميكا كولەمىنىڭ ۇلعايۋىنا اكەلەتىنىن ايتتى. ويتكەنى ادامدار جۇمىس بەرۋشىلەردەن جالاقىسىن «كونۆەرتتە» بەرۋدى سۇرايدى.
«جەڭىلدەتىلگەن نەسيەلەۋ باعدارلامالارىن قوسا العاندا, مەملەكەتتىك قولداۋ شارالارى قاتىسۋشىلارعا كوپتەگەن مۇمكىندىكتەر اشادى. بىراق قولداۋ قۇرالدارىن پايدالانۋدىڭ شارتى – تابىس پەن زەينەتاقى اۋدارىمدارىن نەمەسە كەپىلدىكتى راستاۋ. اۋقىمدى جوبا حالىقتىڭ ەداۋىر بولىگى قارجى ينستيتۋتتارى تۇرعىسىنان «سەنىمسىز» تىزىمدە بولۋىنا بايلانىستى بۇل مۇمكىندىكتەن ايىرىلعانىن كورسەتتى. سوندىقتان ولار جۇمىس بەرۋشىلەردەن جالاقىسىن «كونۆەرتتە» سۇراۋعا ءماجبۇر. وسىلايشا كولەڭكەلى ەكونوميكانىڭ ونسىز دا ۇلكەن كولەمى ارتىپ كەلەدى», دەپ اتاپ ءوتتى ە.جۇماعازيەۆ.
پارتيا «اۋىل اماناتى» جوباسىنىڭ قازىرگى تەتىگىن كەڭەيتۋدى, سونداي-اق 12 اي بويى قارجى ينستيتۋتتارى الدىنداعى كرەديتتىك مىندەتتەمەلەردى تۇراقتى جاباتىن ازاماتتارعا جەڭىلدىكپەن كرەديتتەۋ باعدارلامالارىنا قاتىسۋعا مۇمكىندىك بەرۋدى ۇسىندى.
«پرەزيدەنتتىڭ قازاقستان حالقىنا جولداۋىندا قارجىلىق ساۋاتتىلىقتى ارتتىرۋ جوباسىنىڭ ماڭىزدىلىعى ايتىلدى. بىراق ءبىز ءارى قاراي ءجۇرۋىمىز كەرەك, ويتكەنى تۇپكى ماقسات – حالىق تابىسىن ارتتىرۋ جانە سول ارقىلى ءومىر ءسۇرۋ ساپاسىن جاقسارتۋ. سوندىقتان وسى مىندەتتەرگە قول جەتكىزۋ ءۇشىن ۇكىمەتپەن جانە جەرگىلىكتى اتقارۋ ورگاندارىمەن بىرلەسىپ, «AMANAT» پارتياسى قاجەتتى داعدىلاردى وقىتۋدى, سونداي-اق قايتارىمدى گرانتتار, وندىرىستىك جابدىقتار ليزينگى سياقتى قۇرالداردى ەنگىزۋ جولىمەن جوبانى كەڭەيتۋدى ۇسىنادى. بۇل 1 ميلليوننان استام قازاقستان ازاماتىن ەكونوميكالىق اينالىمعا قايتارۋعا مۇمكىندىك بەرەدى. تەڭدەستىرىلگەن جانە باتىل شەشىم قاجەت, ول سايىپ كەلگەندە, تۇتاس ەكونوميكاعا وڭ سەرپىن بەرەدى», دەدى ول.