سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى. وندا سەناتورلار بيزنەس جۇرگىزۋ ماسەلەلەرى بويىنشا زاڭدى قارادى جانە دەپۋتاتتىق ساۋالدارىن جولدادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
وتىرىس بارىسىندا سەنات دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بيزنەس جۇرگىزۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ءبىرىنشى وقىلىمدا قارادى. بۇل قۇجات ءتيىستى زاڭنامانى قوعام مەن بيزنەستىڭ مۇددەلەرىن ەسكەرە وتىرىپ جەتىلدىرۋدى كوزدەيدى.
اتاپ ايتقاندا, كاسىپكەرلىك قىزمەت جاعدايلارىن جاقسارتۋعا, بيزنەسكە اكىمشىلىك جۇكتەمەنى ازايتۋعا جانە نەگىزسىز كەدەرگىلەردى جويۋعا قاتىستى وزگەرىستەر قامتىلعان. سونداي-اق مەملەكەتتىك باقىلاۋ مەن قاداعالاۋ ءتارتىبىن رەتتەيتىن نورمالار دا بار.
زاڭنىڭ نەگىزگى مىندەتتەرىنىڭ ءبىرى – مەملەكەت باسشىسىنىڭ وڭدەۋ ونەركاسىبى ورىندارىن جەتكىلىكتى كولەمدە جانە كوڭىلگە قونىمدى باعادا وتاندىق شيكىزاتپەن قامتاماسىز ەتۋگە, سونداي-اق, حالىقتىڭ الەۋمەتتىك وسال توپتارىنا ءتيىمدى اتاۋلى قولداۋ كورسەتۋدى قامتاماسىز ەتە وتىرىپ, الەۋمەتتىك ماڭىزى بار ازىق-ت ۇلىك ونىمدەرىنىڭ باعاسىن رەتتەۋدەن كەزەڭ-كەزەڭىمەن باس تارتۋعا قاتىستى جەكەلەگەن تاپسىرمالارىن ىسكە اسىرۋ.
جالپى, وسى قۇجات ارقىلى 114 زاڭنامالىق اكتىگە, ونىڭ ىشىندە 12 كودەكسكە جانە 102 زاڭعا وزگەرىستەر مەن تولىقتىرۋلار ەنگىزۋ كوزدەلىپ وتىر.
زاڭ ماقۇلدانعان جاعدايدا مەملەكەتتىك باقىلاۋ جانە قاداعالاۋ نىساندارىن جاڭا رەتتەۋشى ساياساتتىڭ بازالىق قاعيداتتارى مەن تاسىلدەرىنە سايكەس كەلتىرۋ, كاسىپكەرلىك قىزمەتتى رەتتەۋ مەن قورعاۋدىڭ تىڭ تەتىكتەرىن ەنگىزۋ, بيزنەسكە اكىمشىلىك جۇكتەمەنى ازايتۋ جانە تۇتىنۋشىلار, كاسىپكەرلىك سۋبەكتىلەرى مەن مەملەكەت مۇددەلەرىنىڭ تەڭگەرىمىن قامتاماسىز ەتۋ سياقتى ناقتى ناتيجەلەرگە قول جەتكىزۋ كوزدەلىپ وتىر.
سونىمەن قاتار پالاتا وتىرىسىندا سەناتورلار دەپۋتاتتىق ساۋالدارىن جولداپ, ماڭىزدى ماسەلەلەرگە نازار اۋداردى.
ءلاززات قالتاەۆا توتەنشە جاعداي كەزىندە مۇگەدەكتىگى بار ادامداردىڭ قاۋىپسىزدىگىن قامتاماسىز ەتۋگە قاتىستى پروبلەمالارعا توقتالدى. وسىعان بايلانىستى دەپۋتات بىرقاتار شارا ۇسىندى. ولاردىڭ قاتارىندا داعدارىس جاعدايىندا ولاردى ىزدەۋ جانە ناقتى كومەك كورسەتۋ ءۇشىن مۇمكىندىگى شەكتەۋلى ازاماتتاردىڭ بىرىڭعاي دەرەكقورىن قالىپتاستىرۋ تۋرالى باستاما دا بار.
سەرىك شايداروۆ وندىرىستىك جاراقات الۋ وقيعالارىنىڭ كوبەيۋىنە جانە زەينەتكەرلىككە شىققاننان كەيىن زارداپ شەككەن قىزمەتكەرلەردى قورعايتىن كەپىلدەندىرىلگەن شارالاردىڭ بولماۋىنا الاڭداۋشىلىق ءبىلدىردى. وسىعان وراي سەناتور كەلتىرىلگەن زيانعا بايلانىستى ماتەريالدىق وتەم وتەۋدى جۇمىس بەرۋشىگە جۇكتەۋدى ۇسىندى.
جانبولات جورگەنباەۆ بۇگىندە اۋىل حالقىنىڭ قالاعا كوشۋى ارتىپ وتىرعانىن ايتىپ, بۇل ءۇردىستىڭ سالدارىنا نازار اۋداردى. دەپۋتات وسى باعىتتاعى ماسەلەلەردى شەشۋ ءۇشىن ۇكىمەتتى اۋىلداعى ينفراقۇرىلىمدى دامىتۋعا جانە جەرگىلىكتى تۇرعىنداردىڭ تۇرمىس جاعدايىن جاقسارتۋعا ىقپال ەتۋگە شاقىردى.