«Zhas Project» جوباسى اياسىندا 18-35 جاس ارالىعىنداعى 280 ازاماتقا 1 ميلليون تەڭگە كولەمىندە گرانت بەرىلەدى. قارجىلاي گرانتتى جەڭىپ الۋ ءۇشىن ۇمىتكەرلەر ءوز ايماعىنداعى الەۋمەتتىك ماسەلەنى شەشۋگە باعىتتالعان جوبا جوسپارىن ۇسىنۋ قاجەت. ءوتىنىم 25 ناۋرىزدان باستاپ 24 ساۋىرگە دەيىن قابىلدانادى, دەپ جازادى Egemen.kz kaz.inform.kz-كە سىلتەمە جاساپ.
جاستاردى قولداۋدى ماقسات ەتكەن جوبا ەلىمىزدەگى 20 ايماقتى قامتيدى. گرانت بەرۋ باسەكەسىندە باسىمدىق NEET ساناتىنداعى, ياعني, ەكونوميكالىق, الەۋمەتتىك نەمەسە ساياسي فاكتورلارعا بايلانىستى جۇمىس ىستەمەيتىن, وقىمايتىن جاستارعا بەرىلەدى. جوبانىڭ ەگجەي-تەگجەيىن ورتالىق كوممۋنيكاتسيالار قىزمەتىندە وتكەن بريفينگتە مادەنيەت جانە اقپارات مينيسترلىگى جاستار جانە وتباسى ىستەرى كوميتەتىنىڭ توراعاسى قايرات قامباروۆ ءتۇسىندىرىپ بەردى.
«2022 جىلدان بەرى جاستاردى جەرگىلىكتى قوعامداستىق قىزمەتىنە قايتا تارتۋ ماقساتىندا «Zhas project» گرانتتىق باعدارلاماسى ىسكە اسىرىلىپ جاتىر. جوبا ومىرلىك ماڭىزدى داعدىلاردى دامىتۋعا جانە قوعام ومىرىنە قاتىسۋعا, جەكە تۇلعا مەن الەۋمەتتىك ينستيتۋتتار اراسىندا سەنىم ورناتۋعا, الەۋمەتتىك جوبالاردىڭ تۇراقتى ەكونوميكالىق مودەلىن قۇرۋعا باعىتتالعان. الەۋمەتتىك ماڭىزى بار بيزنەس-جوبالاردى وقىتۋ مەن ىسكە اسىرۋ ارقىلى NEET ساناتىنداعى جاستار وڭ جانە ناتيجەلى قىزمەتكە تارتۋدىڭ بىرەگەي تاجىريبەسىن الادى», دەدى قايرات قامباروۆ.
گرانتتى يەلەنگەننەن كەيىنگى باستى تالاپ - جوبانى 4 ايدا جۇزەگە اسىرۋ. تاجىريبەسى تولىسپاعان جاستاردىڭ قاناتقاقتى جوبالارى جەمىستى بولۋ ءۇشىن ءار وڭىردە قولداۋ ورتالىعى جۇمىس ىستەيدى. ورتالىققا جۇگىنگەن جاس كاسىپكەر كوكەيىندەگى الەۋمەتتىك, ەكونوميكالىق, قۇقىقتىق ساۋالدارىنا كاسىبي مامانداردان جاۋاپ, كەڭەس الا الادى.
قىزىعۋشىلىق تانىتقاندار جوبا تالاپتارىمەن ازاماتتىق باستامالاردى قولداۋ ورتالىعىنىڭ cisc.kz رەسمي سايتى مەن ارنايى «Zhas project» پاراقشاسىندا تولىق تانىسۋىنا مۇمكىندىك بار.
ال ۇزدىك جوبالار جەلى ارقىلى انىقتالىپ, وسى جىلدىڭ قاراشا ايىندا ماراپاتتاۋ ءراسىمى ۇيىمداستىرىلادى.