قازىر قۇقىق بۇزۋشى جاسوسپىرىمدەردىڭ ماسەلەسى كۇن ءتارتىبىنىڭ الدىڭعى قاتارىنا شىعىپ وتىر. وكىنىشكە قاراي, ولاردىڭ كوبى ويلانباي ىستەگەن ارەكەتتىڭ وپىق جەگىزەرىن تۇسىنبەيدى, ەلىمىزدە ءاربىر زاڭسىز ارەكەت ءۇشىن جاۋاپكەرشىلىك قاراستىرىلعانىن جانە قاتەلىكتىڭ سالدارىن تۇزەتۋ قيىنعا سوعارىن سەزىنە بەرمەيدى. بۇل جونىندە ىشكى ىستەر مينيسترلىگى ۇيىمداستىرىلعان ءباسپاسوز ءماسليحاتىندا جان-جاقتى ءسوز بولدى.
جاسوسپىرىمدەردى ناشاقورلىققا تارتۋمەن جانە ەسىرتكىنى تاراتۋمەن بايلانىستى احۋالعا توقتالعان ءىىم ەسىرتكى قىلمىسىنا قارسى ءىس-قيمىل دەپارتامەنتى باسشىسىنىڭ ورىنباسارى باقىتجان ءامىرحانوۆ: «بۇگىندە ءبىز ۆيرتۋالدىق كەڭىستىكتە ءومىر ءسۇرىپ وتىرمىز. بۇل ءوز كەزەگىندە قاشىقتا قارىم-قاتىناس جاساۋدى تەز مەڭگەرەتىن جاستاردىڭ سۋبەكتيۆتىك مادەنيەتىمەن بەتپە-بەت كەلۋىنە الىپ كەلدى. وسى كۇنى ەسىرتكى زاتتارىن ساتۋ بويىنشا ينتەرنەت-دۇكەندەردىڭ يەلەرى دە وسى جاعدايدى ءتيىمدى پايدالانادى. سالدارىنان ەسىرتكى بيزنەسىنە تارتىلاتىن جاسوسپىرىمدەر سانى كوبەيىپ كەلەدى», دەدى.
مينيسترلىك وكىلىنىڭ ايتۋىنشا, ىشكى ىستەر ورگاندارى 5-9 اقپان ارالىعىندا رەسپۋبليكا بويىنشا «توسقاۋىل» جەدەل-الدىن الۋ ءىس-شاراسىن وتكىزگەن. ناشاقورلىقتىڭ الدىن الۋ بويىنشا قابىلدانىپ جاتقان شارالاردىڭ تيىمدىلىگىن ارتتىرۋ جانە ەسىرتكى قۇقىق بۇزۋشىلىقتارىن انىقتاۋعا ارنالعان ءىس-شارا اياسىندا حالىققا, اسىرەسە جوعارى سىنىپ وقۋشىلارى مەن ستۋدەنت جاستار اراسىندا پروفيلاكتيكالىق قۇقىقتىق ءتۇسىندىرۋ جۇمىستارى ۇيىمداستىرىلعان. ونىڭ ىشىندە ەسىرتكىگە قارسى ءىس-شارالارعا ىشكى ىستەر ورگاندارى مەن ۇلتتىق ۇلاننىڭ جەكە قۇرامى, اكىمدىك قىزمەتكەرلەرى, دەنساۋلىق ساقتاۋ جانە ءبىلىم بەرۋ سالاسىنىڭ وكىلدەرى, جاستار ساياساتىنىڭ كوشباسشىلارى, ۇكىمەتتىك ەمەس سەكتور جانە ەرىكتىلەر بارىنشا تارتىلعان.
پوليتسيانىڭ باستاماسىمەن حالىقپەن بارلىق جەردە كەزدەسۋلەر وتكىزىلىپ, وقۋ ورىندارىندا 356 ءدارىس, 18 اكتسيا, 10 دوڭگەلەك ۇستەل جانە ناركولوگ-دارىگەرلەردى, تاجىريبەلى پەداگوگتەر مەن پسيحولوگتەردى, سونداي-اق ازاماتتىق قوعام وكىلدەرىن شاقىرۋمەن 55 كەزدەسۋ ۇيىمداستىرىلدى. بارلىعى 538 ءتۇرلى پروفيلاكتيكالىق ءىس-شارا وتكىزىلسە, ونىڭ ىشىندە 12 سپورتتىق-بۇقارالىق, 87 تۋرنير جانە فلەشموب ۇيىمداستىرىلعان.
«ەرىكتىلەر قوزعالىسىنىڭ وكىلدەرى ەسىرتكى زاتتارىنىڭ گراففيتي جارناماسىن جويۋعا ايتارلىقتاي ۇلەس قوستى. ەسىرتكىنىڭ زاڭسىز اينالىمىنا قارسى ءىس-قيمىل قامتاماسىز ەتىلدى. «توسقاۋىل» وپەراتسياسى كەزەڭىندە 4 ەسىرتكى زەرتحاناسى جويىلدى. وسىلايشا, الماتى قالاسىنىڭ جەكە ۇيلەرىنىڭ بىرىندەگى سينتەتيكالىق ەسىرتكى وندىرەتىن ەسىرتكى زەرتحاناسى جابىلدى. پوليتسەيلەر 13 كگ مەفەدرون سينتەتيكالىق پرەپاراتىن, سونداي-اق ولاردى وندىرۋگە ارنالعان رەاكتورلار مەن ءتۇرلى جابدىقتى تاركىلەدى. سونداي-اق ەلىمىزدىڭ ەڭ ءىرى مەگاپوليسىندە پوليتسيا قىزمەتكەرلەرى «Mercedes» ماركالى اۆتوكولىكتى توقتاتتى, تەكسەرۋ كەزىندە جالپى سالماعى 3,7 كگ سينتەتيكالىق «الفا-PvP» ەسىرتكىسىنىڭ «جىلدامدىق» دەپ اتالاتىن 10 پوليەتيلەن پاكەتى تابىلدى», دەيدى ب.ءامىرحانوۆ.
سونداي-اق اتىراۋ وبلىسىندا ينتەرنەت-دۇكەنگە كۋرەر بولىپ جۇمىسقا ورنالاسقان سينتەتيكالىق پسيحوتروپتىق زاتتاردى سالۋشىلار ۇستالدى. جالعا بەرىلەتىن پاتەردى ءتىنتۋ كەزىندە كەپىلگەرلەردەن سالماعى 1 كگ 500 گرامم «الفا-PVP» جانە «مەفەدرون» ەسىرتكى زاتتارى تاركىلەندى. شىمكەنت قالاسىندا ەسىرتكى پوليتسياسى قىزمەتكەرلەرى كەپىلگەردى ۇستاسا, جالدامالى پاتەردى ءتىنتۋ كەزىندە سالماعى 1 كگ 500 گرامم «امفەتامين», «لسد» جانە «ەكستازي» ەسىرتكى زاتتارى تابىلعان. سولتۇستىك قازاقستان وبلىسىندا دا ۋچاسكەلىك پوليتسيا ينسپەكتورى ارنايى بولىمشە جاۋىنگەرلەرىنىڭ قولداۋىمەن كريمينالدىق پوليتسيا قىزمەتكەرلەرىمەن بىرگە جەرگىلىكتى تۇرعىندى ۇستادى. ودان 8,5 كگ ماريحۋانا تاركىلەندى.
وپەراتسيا اياسىندا كوشى-قون قىزمەتىنىڭ قىزمەتكەرلەرىمەن بىرلەسىپ كۇن سايىن شەتەل ازاماتتارى مەن ولاردىڭ تۇراتىن جەرلەرىنە تەكسەرۋلەر جۇرگىزىلىپ, 1 321 كوشى-قون زاڭناماسىن بۇزۋ انىقتالعان. سونداي-اق 218 قۇقىق بۇزۋشى ەلدەن شىعارىلدى. قىزمەتتىك-ىزدەستىرۋ يتتەرىنىڭ ارقاسىندا 33 ەسىرتكى قىلمىسى انىقتالعان. بۇدان باسقا, قارۋدى زاڭسىز ساقتاۋدىڭ 31 فاكتىسى تىركەلىپ وتىر.
دەپارتامەنت باسشىسىنىڭ ورىنباسارى «توسقاۋىل» وپەراتسياسىنىڭ قورىتىندىسىندا بارلىعى 258 قىلمىستىق قۇقىق بۇزۋشىلىقتىڭ جولى كەسىلگەنىن, ونىڭ ىشىندە 58 ەسىرتكى وتكىزۋ فاكتىسى, 40 اسا ءىرى مولشەردە ساقتاۋ جانە 7 ەسىرتكى كونترابانداسى انىقتالعانىن ايتىپ وتىر. ال زاڭسىز اينالىمنان شامامەن 144 كگ ءتۇرلى ەسىرتكى, ونىڭ ىشىندە 30 كگ سينتەتيكا, 110 كگ ماريحۋانا, 3 كگ گاشيش جانە 800 گرامم ترامادول تاركىلەنگەن.