قىسى جايلى, قار ۇزاق جاتپايدى دەيتىن تۇركىستان ءوڭىرى تۇرعىندارى ءۇشىن بيىلعى قاڭتار مەن اقپان بوراندى كۇندەرىمەن, سىقىرلاعان ايازىمەن دە ەرەكشەلەندى. اسىرەسە, تاۋلى اۋدانداردا اۋا رايى اياق استىنان قۇبىلىپ, جاپالاقتاپ جاۋعان قاردى جەل كوتەرىپ, اياعى الاي-دۇلەي بورانعا ۇلاسقان كۇندەر كوبەيدى.
تاۋ ەتەگىندەگى اۋىلدارعا بارار جولدار جابىلىپ, ەلەكتر جارىعى وشكەن, كوگىلدىر وتىننان اجىراتىلىپ, ءاپ-ساتتە ابىگەرگە تۇسكەن جۇرتتىڭ ۇيدەن شىقپاي بوراننىڭ باسىلۋىن كۇتۋدەن باسقا امالى بولماس. بىراق... تۇنگى ەكىدەن كەيىن تولعاعى قاتتى قىسقان تولەبي اۋدانى الاتاۋ اۋىلىنىڭ تۇرعىنى جاننا سارسەنوۆا جەدەل جاردەم شاقىرادى. جەدەل جاردەم كولىگى اۋىلعا جاىنداعاندا قالىڭ قاردان شىعا الماي قالعان. جۇرگىزۋشىنى قالدىرىپ, وزدەرى قاجەتتى جابدىقتارىمەن جاياۋ كەتكەن جەدەل جاردەم قىزمەتكەرلەرى اياعى اۋىر كەلىنشەككە ءتيىستى كومەكتى كورسەتىپ ۇلگەرگەن. ايى-كۇنى جەتىپ وتىرعان كەلىنشەكتى پەرزەنتحاناعا ۋاقتىلى جەتكىزە المايتىن بولعاندىقتان, ءۇي جاعدايىندا تەلەفون جارىعىمەن بوساندىرىپ الىپتى. «بەس ۇلىم بار. قىزىمنىڭ بورانداتىپ دۇنيەگە كەلگەنى ۇمىتىلمايتىن بولدى. جەدەل جاردەم كەلگەن سوڭ, 5-10 مينۋتتان كەيىن بوساندىم. بوراننان شىعا المادىق», دەيدى كوپبالالى انا.
ء«ۇي تاس قاراڭعى, گاز جوق بولعاندىقتان سۋىق ەدى. پەرزەنتحاناعا قاجەتتى ۋاقىتتا جەتە المايتىنىمىزدى بىلگەندىكتەن, جولدا نارەستەنى جاۋراتىپ الماۋ ءۇشىن ۇيىندە بوساندىرۋعا تۋرا كەلدى. 03:27-دە ۇيىندە بوساندىردىق, دۇنيەگە قىز كەلدى», دەيدى تولەبي اۋداندىق №12 جەدەل جاردەم بەكەتىنىڭ فەلدشەرى ەربول سارتاەۆ سول ءتۇندى ەسكە الىپ.
جەدەل جاردەم ماماندارى قايتا جولعا شىعۋ قاۋىپتى بولعاندىقتان, توتەنشە جاعداي قىزمەتكەرلەرىن كۇتىپ, تەك 1 جارىم ساعاتتان سوڭ پەرزەنتحاناعا شىققان.
«شاقىرۋ بويىنشا شىعىپ بارا جاتقانىمىزدا جولداردى قار باسىپ قالعان ەدى. ءوزىم جول سالىپ باردىم. بىراق كورسەتىلگەن مەكەنجايعا جەتە الماي قالدىق. فەلدشەر جىگىتتەر «كەرەك زاتىمىزدى الىپ كەتە بەرەيىك, ءسىز شىعىپ ارتىمىزدان كەلىڭىز» دەدى. تاۋلى ايماق بولعان سوڭ اۋا رايىنىڭ كۇرت وزگەرەتىنىن بىلەمىز, كۇرەك سالىپ العانبىز كولىككە. جولدى تازالاپ, بۇلاردان سوڭ 20 مينۋتتان كەيىن باردىم», دەيدى جۇرگىزۋشى اسان التاەۆ.
بۇگىندە بەس ۇلدان كەيىن دۇنيەگە كەلگەن اقنيەت ەسىمدى ءسابيدىڭ جاعدايى جاقسى. دارىگەرلەر دەنساۋلىعىنا تونەتىن قاۋىپتىڭ بولماعانىن ايتادى.
«نارەستە سالماعى 3,3 كيلو, بويى 54 سم بولىپ جارىق دۇنيە ەسىگىن اشتى. بۇل كىسى نەگىزى پەريناتالدى ورتالىقتا بوسانۋعا ءتيىس. بىراق تولعاعى تەز ارادا ۇدەپ, ۇلگەرمەي قالدى. بوراننان شىعا الماي قالدى. نارەستەسىنىڭ دە, ءوزىنىڭ دە جاعدايى جاقسى كۇيدە جەتكىزىلدى. كەلگەلى بەرى ەشقانداي اۋىتقۋلارى جوق. بالاسىن ەمىزىپ, ءوزىن جايلى سەزىنەدى», دەيدى پەرزەنتحانا ءبولىمىنىڭ مەڭگەرۋشىسى جانات نۇرىمبەتوۆا.
وسىلايشا, بوراندى تۇندە شاقىرتۋعا بارعان اۋداندىق №12 جەدەل جاردەم بەكەتىنىڭ قىزمەتكەرلەرى ەربول سارتاەۆ, اسان التاەۆ, پەرنەبەك نۇرجان قولايسىز اۋا رايىنا قاراماستان, اياعى اۋىر اناعا شۇعىل كومەك كورسەتە ءبىلدى.
ايتا كەتەلىك, جىل باسىنان بەرى لەڭگىر پەرزەنتحاناسىندا 78 بالا دۇنيە ەسىگىن اشقان. ال بوراندى كۇنى 4 ايەل بوسانعان. ونىڭ ۇشەۋى – قىز, بىرەۋى – ۇل.
تۇركىستان وبلىسى