باۋىرجان مومىش ۇلى اتىنداعى الماتىداعى «جاس ۇلان» رەسپۋبليكالىق مەكتەبىندە تاربيەلەنۋشىلەر گەنەرال-لەيتەنانت باقىتجان ەرتاەۆپەن كەزدەستى.
باقىتجان ەرتاەۆپەن وتكەن ەرلىك ساباعى كەڭەس وداعىنىڭ باتىرى, ارميا گەنەرالى ساعادات نۇرماعامبەتوۆتىڭ, حالىق قاھارمانى راقىمجان قوشقارباەۆتىڭ عاسىرلىق مەرەيتويلارىنا جانە اۋعانستاننان كەڭەس اسكەرلەردىڭ شىعارىلعانىنا 35 جىل تولۋىنا وراي ءوتىپ جاتقان ءىس-شارالار اياسىندا ۇيىمداستىرىلدى. كەزدەسۋگە اۋعان جاۋىنگەرلەرى, قورعانىس ىستەرى جونىندەگى قالالىق دەپارتامەنت وكىلدەرى, الماتىداعى «جاس ۇلان» رەسپۋبليكالىق مەكتەبىنىڭ جەكە قۇرامى قاتىستى.
ەرلىك ساباعى باۋىرجان مومىش ۇلى مونۋمەنتىنە گۇل شوقتارىن قويۋ راسىمىمەن باستالدى. مەكتەپتىڭ اكت زالىندا گەنەرال-لەيتەنانت باقىتجان ەرتاەۆ ءوزى اسكەردە قىزمەت ەتكەن ءارتۇرلى كەزەڭدەر تۋرالى ايتىپ, حالىق قاھارماندارى ءومىربايانىنىڭ قىزىقتى تۇستارىمەن ءبولىستى.
ءىس-شارا بارىسىندا مەكتەپتىڭ تاربيەلەنۋشىلەرى باقىتبەك سماعۇلدىڭ «مەن كورگەن سوعىس» كىتابىنان ساحنالىق كورىنىس وينادى. سونىمەن قاتار بالالار اۋعان سوعىسى جايلى اندەر ايتتى.
– مۇنداي ءىس-شارالار ەلىمىزدىڭ جاۋىنگەرلەرىنە قۇرمەت كورسەتۋ, وسكەلەڭ ۇرپاقتىڭ ورتاسىندا وتانعا دەگەن سۇيىسپەنشىلىك پەن جاۋاپكەرشىلىك سياقتى قاسيەتتەردىڭ ارتۋىنا ىقپال ەتۋ ءۇشىن ماڭىزدى, – دەپ اتاپ ءوتتى الماتى قالاسى قورعانىس ىستەرى جونىندەگى دەپارتامەنتىنىڭ باسشىسى, پولكوۆنيك فارحات قۇرمانعاجينوۆ. «جاس ۇلان» مەكتەبىنىڭ باسشىلىعى تاراپىنان باقىتجان ەرتاەۆقا العىسحات تابىس ەتىلگەننەن كەيىن تاربيەلەنۋشىلەردىڭ قوناقپەن بەيرەسمي سۇحباتى ءوتتى.
– وتانعا قىزمەت ەتۋ ءۇشىن, ەڭ الدىمەن, پاتريوت بولۋ كەرەك. وزىڭمەن تىنىمسىز جۇمىس ىستەۋ, كاسىبي شەبەرلىكتى ارتتىرۋ جانە ۋاقىت كەلگەندە وتان الدىنداعى بورىشتى ابىرويمەن ورىنداۋ قاجەت, – دەدى باقىتجان ەرتاەۆ.
ايتا كەتۋ كەرەك, باقىتجان ەرتاەۆ ۆزۆود كومانديرىنەن باستاپ گەنەرالعا دەيىنگى مانساپتىق جولدان ءوتتى. ول ەگەمەن قازاقستاننىڭ قارۋلى كۇشتەرىن قالىپتاستىرۋعا, ارميانىڭ قورعانىس قابىلەتى مەن جاۋىنگەرلىك دايىندىعىن نىعايتۋعا مول ۇلەس قوستى.