جاقىندا ۇلتتىق ۇلاننىڭ 6697 اسكەري بولىمىندە «سارباز داۋىسى» بايقاۋى ءوتتى. اسكەرگە ءبىر اي بۇرىن كەلگەن مەرزىمدى اسكەري قىزمەتشىلەر اراسىنداعى سايىس تارتىستى بولدى.
وقۋ پۋنكتىنىڭ 1-ءشى جانە 2-وقۋ روتاسىنىڭ ساربازدارى وزدەرىنىڭ شىعارماشىلىق دارىنىن سىناپ, ءبىرى جەكە داۋىستا ەسترادامەن ءان سالسا, ەندى ءبىرى دومبىرا مەن گيتارادا ويناپ, وتاندىق جانە شەتەلدىك ەسترادا جۇلدىزدارىنىڭ رەپەرتۋارلارىنان اندەر ورىندادى. بارلىق قاتىسۋشى ەرەكشە دارىندى ەكەنىن بايقاتتى. ءۇش ساعاتقا سوزىلعان بايقاۋدا كورەرمەن دە توقتاۋسىز قول سوعىپ, ريزاشىلىعىن ءبىلدىردى. وسىنىڭ ءوزى ساربازداردىڭ دەمالىس كۇندەرىن ءتيىمدى ماقساتقا جۇمساپ, بولىمشە قابىرعاسىندا وزدەرى قالاعان ونەرمەن اينالىسۋىنا مۇمكىندىك بەرىلەتىنىنىڭ كورىنىسى بولسا كەرەك.
«اسكەري ءبولىم دەڭگەيىندە ءبىز كوپتەگەن ءىس-شارا وتكىزەمىز, ولار اسكەري قىزمەتشىلەردىڭ باستاماسى بويىنشا مەرەكەلىك كۇندەرگە ارنالۋى دا مۇمكىن. بىراق ءبىر ايتا كەتەتىن جايت, كوپشىلىگى كورىپ جۇرگەن اسكەري كيىم كيگەن, بۇيرىقتاردى ورىندايتىن اسكەريلەردىڭ ارتىندا تالانتتى, ونەرپاز ادام تۇرۋى مۇمكىن. سوندىقتان ءان بايقاۋى ساربازدىق قاسيەت پەن پاتريوتتىق سەزىمدى ءبىر ارناعا توعىستىرىپ, رۋحاني باي, شىعارماشىل جاستاردى اسكەريلەردىڭ قوعامدىق ومىرىنە تارتۋ ماقساتىندا ۇيىمداستىرىلدى», دەپ اتاپ ءوتتى تاربيە جانە الەۋمەتتىك-قۇقىقتىق جۇمىستار بولىمشەسىنىڭ باسشىسى, مايور دۋلات شارىپباەۆ.
بايقاۋ قورىتىندىسى بويىنشا 3-ورىنعا قاتارداعى جاۋىنگەر ەلدار سوۆەتاليەۆ يە بولسا, 2-ورىن قاتارداعى جاۋىنگەر يۋري پولياكوۆقا بەرىلدى. ال بايقاۋدىڭ جەڭىمپازى رەتىندە قاتارداعى جاۋىنگەر جالعاس قاپاسوۆتىڭ ەسىمى اتالدى. جەڭىمپاز اتانعان اسكەريلەر باسشىلىق تاراپىنان العىسحاتتارمەن جانە گراموتالارمەن ماراپاتتالدى.