«مىرزاكەنت» ماقتا زاۋىتىنىڭ شاردارا, جەتىساي, ماقتاارال اۋداندارىنداعى ماقتا قابىلداۋ پۋنكتتەرىندە مىڭعا جۋىق ادام ەڭبەك ەتەدى. جالپى قۇنى ميلليارد تەڭگەنى قۇرايتىن, اقش-تىڭ سوڭعى ۇلگىدەگى جاڭا تەحنولوگياسىمەن جابدىقتالعان زاۋىتتىڭ وندىرىستىك قۋاتتىلىعى جىلىنا 60 مىڭ توننا. بىراق شيكىزاتتىڭ جەتىسپەۋشىلىگىنە بايلانىستى بيىل 40 مىڭ توننا ماقتا قابىلداعان.
ماقتاارال اۋدانىنا جۇمىس ساپارىمەن كەلگەن پارلامەنت سەناتىنىڭ دەپۋتاتتارى ءا.بەكتاەۆ, م.قادىربەك جانە ا.ساتىبالديەۆپەن كەزدەسۋدە جۇمىسشىلار تسيفرلىق تەحنولوگيا ناتيجەسىندە باسقا زاۋىتتارمەن سالىستىرعاندا ەڭبەك ونىمدىلىگى 30 پايىزعا جوعارى ەكەنىن ايتتى. سونداي-اق كەزدەسۋ بارىسىندا ءوندىرىس ورنىنداعى ەڭبەك قاۋىپسىزدىگى, جۇمىسشىلاردىڭ الەۋمەتتىك جاعدايى ءسوز بولدى. سەناتورلار «جاستار ورتالىعى» كمم عيماراتىندا اۋدان تۇرعىندارىمەن كەزدەستى. كەزدەسۋ بارىسىندا اۋدان كولەمىندە شەشىمىن تاپپاي جاتقان ءتۇرلى الەۋمەتتىك-ەكونوميكالىق ماسەلە كوتەرىلدى. ءوز كەزەگىندە سەناتورلار تۇرعىندار كوتەرگەن ماسەلەلەردىڭ شەشىمىن تابۋىنا اتسالىساتىندارىن جەتكىزدى.
ال ءماجىلىس دەپۋتاتى تەمىر قىرىقباەۆ ماقتاارال اۋدانىندا قوعامدىق قابىلداۋ وتكىزدى. قابىلداۋعا كەلگەن ازاماتتار مەكتەپتەردى جىلىتۋ, پۋيد-2 باعدارلاماسىنىڭ قۇرىلىسى, توعاي القاپتارىن مەملەكەت مەنشىگىنە قايتارۋ, درەناجداردى ىسكە قوسۋ, ۋچاسكەلىك جەر تەلىمى, مەديتسينالىق نىسانداردىڭ احۋالى, الەۋمەتتىك سالا, اۋىز سۋ بويىنشا ماسەلەلەر كوتەرىپ, سۇراقتار قويدى. ءوز كەزەگىندە حالىق قالاۋلىسى قويىلعان سۇراقتار بويىنشا ءتيىستى سالا باسشىلارىنىڭ جاۋابىن قارادى. جەرگىلىكتى جەردە شەشىلەتىن ماسەلەلەردى دەرەۋ قولعا الۋدى تاپسىرىپ, رەسپۋبليكالىق دەڭگەيدە شەشىلەتىن ماسەلەلەردى پارلامەنت تورىندە كوتەرەتىنىن جەتكىزدى.
سونداي-اق جەتىساي اۋدانىنا جۇمىس ساپارىمەن بارعان دەپۋتات «Amanat» پارتياسى جەتىساي اۋداندىق فيليالىنىڭ عيماراتىندا قوعامدىق قابىلداۋ وتكىزدى. جاڭا جىلدىڭ العاشقى جۇمىس كۇنىندە وتكەن قابىلداۋعا كەلۋشىلەر ماجىلىسمەنگە اپاتتى جاعدايداعى كوپپاتەرلى ۇيلەردىڭ ورنىنا جاڭا ءۇي سالۋ جانە مەكتەپتەردىڭ كۇردەلى جوندەۋى, مەديتسينالىق پۋنكت سالۋ, گازداندىرۋ جانە ماتەريالدىق كومەك كورسەتۋ سەكىلدى ماسەلەلەردى كوتەرىپ, قۇقىقتىق كەڭەستەر الدى. ماسەلەلەرى بويىنشا جازباشا وتىنىشتەرىن بەردى. ال جەتىساي قالالىق ەمحاناسىنىڭ قىزمەتكەرلەرىمەن كەزدەسۋدە مەديتسينا سالاسىنىڭ ماماندارى جۇمىس تەتىكتەرىن جەتىلدىرۋ بويىنشا بىرقاتار ماسەلەنى زاڭنامالىق دەڭگەيگە شىعارۋدى, تاريف بەلگىلەۋ ادىستەمەسى مەن ساقتاندىرىلۋشىنىڭ مارتەبەسىن قايتا قاراۋدى, اۋىلداعى مەديتسينا كادرلارىنىڭ تاپشىلىعىن تومەندەتۋدى, مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋدى قولعا الۋدى سۇرادى.
تۇركىستان وبلىسى