ەلوردا تورىندە وتكەن «جاڭا جىل رەسپۋبليكا تورىندە» اتتى پرەزيدەنت شىرشاسى ادەتتەگىدەي بالالارعا ەرەكشە كوڭىل كۇي سىيلادى. ەرتەگى الەمىنە تولى كەشكە ەلىمىزدىڭ ءار وڭىرىنەن 100 بالا قاتىستى. ولاردىڭ بارلىعى – سپورتتىق جارىستاردا ۇزدىك شىعىپ, وقۋدا وزات اتانعان ۇلگىلى وقۋشىلار. بالالار مۋلتفيلم كەيىپكەرلەرى مەن جەلاياق, تاۋسوعار, كولتاۋىسار سەكىلدى قازاق ەرتەگىلەرىنىڭ قاھارماندارىمەن بىرگە جارقىراعان جاڭا جىلدىق شىرشانى اينالا بيلەپ, ويىن-ساۋىق باعدارلاماسىن تاماشالادى.
رەسپۋبليكانىڭ تۇكپىر-تۇكپىرىنەن جينالعان وقۋشىلاردى پرەزيدەنت قاسىم-جومارت توقاەۆتىڭ اتىنان قۇتتىقتاعان وقۋ-اعارتۋ ءمينيسترى عاني بەيسەمباەۆ: ء«بىزدىڭ ماقساتىمىز – ەلىمىزدەگى بالالاردىڭ جۇزىنەن كۇلكى كەتپەۋىن, باقىتتى بالالىق شاعىن قامتاماسىز ەتۋ. بۇگىنگى مەرەكە ءاربىر بالانىڭ كوڭىلىنە ۇلكەن قۋانىش پەن ءۇمىت سىيلاۋى كەرەك. مەرەكەلىك ءىس-شاراعا ارنايى ەرەكشە توپتاعى, كوپبالالى, ينكليۋزيۆتى توپتاعى, ەرەكشە ءبىلىمدى قاجەت ەتەتىن بالالار كەلدى. پرەزيدەنت شىرشاسى – جىل سايىنعى ءداستۇرلى مەرەكە. ءار وڭىردەن الدىڭعى قاتارلى بالالار كەلىپ وتىرادى. بۇدان بولەك, ءدال وسىنداي تىزىمدەگى بالالار وڭىرلەردە اكىمدەردىڭ قاتىسۋىمەن ۇيىمداستىرىلعان پرەزيدەنت شىرشاسىنا دا شاقىرىلدى», دەدى. بۇدان كەيىن مينيستر پرەزيدەنتتىڭ اتىنان ءار بالاعا قۇتتىقتاۋ حاتتارى مەن سىيلىقتار تابىستادى.
وقۋ-اعارتۋ مينيسترلىگى تاربيە جانە قوسىمشا ءبىلىم دەپارتامەنتىنىڭ ديرەكتورى مەرۋەرت مەدەتبەكوۆانىڭ ايتۋىنشا, بيىلعى پرەزيدەنت شىرشاسىنا 100 بالا قاتىسىپ جاتىر. ونىڭ ىشىندە 20 وڭىردەن 5 بالادان تاڭدالىپ الىنعان. ولاردىڭ بارلىعى – ءوز ونەرىمەن, سپورتتان, بىلىمنەن وق بويى وزىپ شىققان شەتىنەن العىر وقۋشىلار. باس قالاعا كەلگەن بالالار ءۇش كۇننەن بەرى ارنايى باعدارلاما اياسىندا قالانىڭ كورىكتى جەرلەرىن ارالاپ, تەاترداعى ءتۇرلى قويىلىمداردى تاماشالادى. ال بۇگىن مەرەكەلىك شارادا اسەم اۋەن مەن ءتاتتى كۇيگە تولى باعدارلاماعا قاتىسىپ, ارقايسىسىنا پرەزيدەنت اتىنان ارنايى سومكە, IPad, ەنتسيكلوپەديا كىتاپتارىنىڭ توپتاماسى جانە كامپيتتەر تابىس ەتىلدى.
مەرەكەلىك شىرشاعا جەتىسۋ وبلىسىنان قاتىسقان 5-سىنىپ وقۋشىسى كاۋسار الماسقىزىنىڭ قۋانىشى قوينىنا سيار ەمەس. سەبەبى سىيلىقتاردىڭ اراسىندا ءوزى ارمانداپ جۇرگەن زاتتارىن كورگەندە ەرەكشە قۋانعانىن جەتكىزگەن ول: «ماعان جاڭا جىلدىق كەش قاتتى ۇنادى. پرەزيدەنت شىرشاسىنا العاش رەت قاتىسىپ تۇرمىن. مەرەكەلىك كەشتەگى انيماتورلار دا ۇنادى. اياز اتانىڭ بەرگەن سىيلىقتارى دا كەرەمەت ەكەن. ال مەن ءوز اتىمنان بۇگىنگى كەشكە اننەن شاشۋ شاشامىن», دەدى.
كوڭىلدى كەشتە ەلگە تانىمال ونەر شەبەرلەرى ءان مەن جىردان شاشۋ شاشتى. مىڭ بۇرالعان بيشىلەر مەن تەاتر ارتىستەرى قىزىقتى قويىلىمدار كورسەتتى.
ايتا كەتۋ كەرەك, ءدال وسىنداي جاڭا جىلدىق كەش رەسپۋبليكانىڭ ءار وڭىرىندە اتالىپ ءوتىپ, ونەرلى دە وزات بالالارعا كوپ قىزىق-قۋانىش سىيلادى.