پەتروپاۆلدا كوللەدج ستۋدەنتى تۋعان اناسىن 1 ملن تەڭگەگە الدادى دەگەن كۇدىككە ءىلىندى. ءوزى الماعان نەسيەنى تولەۋ تۋرالى حابارلاما كەلگەندە ايەل پوليتسياعا جۇگىنگەن, دەپ جازادى Egemen.kz polisia.kz-كە سىلتەمە جاساپ.
قاڭتار ايىندا پەتروپاۆل تۇرعىنىنا ءوزى الماعان ءىرى سوماداعى نەسيەنى تولەۋ تۋرالى حابارلامالار كەلە باستاعان. مۇنى كورگەن ايەل دەرەۋ پوليتسيا باسقارماسىنا جۇگىنگەن. نەسيەنى كىم الۋى مۇمكىن ەكەنى تۋرالى ەش بولجام بولماعان. جەدەل ۋاكىلدەر ءتۇرلى سۇراقتار قويعان كەزدە, ونىڭ ەسىنە 16 جاستاعى ۇلى وتكەن جىلدىڭ جەلتوقسان ايىندا سايتتاردىڭ بىرىندە تىركەلۋدى وتىنگەنى, سول ارقىلى ەمتيحان جاۋاپتارىن الۋعا بولادى دەپ ءوتىنىش بىلدىرگەنى ەسىنە ءتۇستى. ءجاسوسپىرىم سايتتا ەكى ادامدى تىركەلسە ناقتى باعاسى جەڭىلدەتىلەدى دەگەن ۇسىنىس بولادى دەپ اناسىن الداپ سوققان.
ال تىركەۋ پروتسەدۋراسىندا ادامنىڭ فوتو جانە بەينەۆەريفيكاتسيادان ءوتۋى قاجەت بولعان. الدانعانىن تۇسىنبەگەن ايەل «باستى سولعا, وڭعا بۇرۋ» دەگەن سياقتى اۆتوماتتى بوتتىڭ تالاپتارىن ورىنداپ شىققان.
«وسى پروتسەدۋرا ارقىلى جابىرلەنۋشىنىڭ اتىنا 1 ميلليون 180 مىڭ تەڭگە كولەمىندەگى نەسيە رەسىمدەلگەنى انىقتالدى. اتالعان فاكتى قر قىلمىستىق كودەكسىنىڭ 190-بابىنىڭ 2-بولىگى (الاياقتىق) بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە ەنگىزىلدى. قازىرگى ۋاقىتتا تەرگەۋ اياقتالۋعا جاقىن, تەرگەۋشىلەر ءىس ماتەريالدارىن سوتقا جىبەرۋگە دايىندالىپ جاتىر», دەدى سقو پد كريمينالدىق پوليتسيا باسقارماسىنىڭ باستىعى يۆان تەرزيدي.