ونەر سالاسىنداعى ءبىرتۋار قايراتكەرلەردىڭ ەسىمىن انىقتاپ, وتاندىق مادەنيەتتىڭ دامۋىنا جانە ىلگەرىلەۋىنە ىقپال ەتەتىن «Umai» ۇلتتىق سىيلىعىنىڭ بيىلعى جەڭىمپازدارى بەلگىلى بولدى. ەلوردا تورىندەگى «استانا وپەرا» تەاترىندا وتكەن «Umai-2023» ۇلتتىق سىيلىعىنىڭ يەگەرلەرىن ماراپاتتاۋ راسىمىنە مادەنيەت جانە اقپارات ءمينيسترى ايدا بالاەۆا, پارلامەنت ءماجىلىسىنىڭ دەپۋتاتتارى, قوعام قايراتكەرلەرى, مادەنيەت مايتالماندارى قاتىستى.
كاسىبي شىعارماشىلىق ۇجىمدار مەن جەكەلەگەن ونەر قايراتكەرلەرىن ەلەۋلى شىعارماشىلىق جەتىستىكتەرى ءۇشىن قولداۋعا باعىتتالعان بايقاۋ بيىل ەكىنشى رەت ۇيىمداستىرىلدى. جۇلدە قورى 79 ميلليون تەڭگەنى قۇرايتىن 29 مۇسىنشە مەن اقشالاي سىيلىق كورەرمەننىڭ ىستىق ىقىلاسىنا بولەنگەن ونەر ۇجىمدارى مەن تالانتىمەن تامساندىرعان مادەنيەت مايتالماندارىنا تابىس ەتىلدى.
جەڭىمپازداردى ماراپاتتاۋ راسىمىندە قۇتتىقتاۋ ءسوز سويلەگەن مادەنيەت جانە اقپارات ءمينيسترى ايدا بالاەۆا «Umai-2023» ۇلتتىق ونەر سىيلىعى ەلىمىز ءۇشىن ەرەكشە ماڭىزعا يە ەكەنىن جەتكىزدى.
«ونەر رۋحانياتتى قالىپتاستىرۋدا ماڭىزدى ءرول اتقارادى. اتاقتى جازۋشى مۇحتار اۋەزوۆ بەينەلەۋ ونەرىنسىز ماعىنالى بولمىس جوق ەكەنىن ايتقانى بەلگىلى. ونەر شىن مانىندە ۇلتتىڭ دامۋىنا نەگىز بولىپ سانالادى. ال ونەر ادامى قوعامدى تاربيەلەۋدە ماڭىزدى ءرول اتقارادى. مەملەكەت باسشىسى ىنتا-جىگەرى بەرىك, ەلىمىزدى ۇلى دارەجەگە كوتەرە الاتىن ۇرپاق قالىپتاستىرۋعا ەرەكشە ءمان بەرىپ كەلەدى. ءبىزدىڭ ونەرىمىز بەن مادەنيەتىمىز قوعامدىق تۇلعانى تاربيەلەيدى. بۇل ءبىزدىڭ بولاشاعىمىزعا قاجەت رۋحاني ساياسات. مەملەكەت باسشىسىنىڭ جۇرگىزىپ وتىرعان بارلىق باستاماسى مەن رەفورماسىنىڭ تۇپكى ماقساتى – مەملەكەتىمىز ءۇشىن ورتاق ىسكە ەلەۋلى ۇلەس قوساتىندارعا جان-جاقتى قولداۋ كورسەتۋ. «Umai» سىيلىعى دا وسىنداي قولداۋدىڭ جارقىن كورىنىسى», دەدى مينيستر.
سونداي-اق سىيلىقتىڭ وزەگىندە ادەمى سالتانات ەمەس, ەڭ الدىمەن, ەڭبەك, تاۋداي تالاپ, تەرەڭ ءبىلىم مەن ويلى ونەر جاتقانىن اتاپ ءوتىپ: «مويىنداۋىمىز كەرەك, جوعارى ادامگەرشىلىك, مادەني جانە ءبىلىمدى قوعام قۇرۋ جونىندەگى رۋحاني ميسسيا بارىنە بىردەي قولجەتىمدى ەمەس. بىراق بۇل قۇرمەتكە يە بولعان ءاربىر ادام مىڭداعان جانە ميلليونداعان ادامعا ۇلگى بولا الادى, ادامداردىڭ جۇرەگىنە جىلۋ سىيلايدى. بۇگىنگى بايقاۋدىڭ جەڭىمپازدارى عانا ەمەس, ونىڭ بارشا قاتىسۋشىسى دا وسىنداي مارتەبەگە لايىق ەكەنىنە سەنىمدىمىن. رۋحانياتسىز ەلدىڭ بولاشاعىن قۇرۋ قيىن», دەدى ا.بالاەۆا.
ۇلتتىق سىيلىق وتاندىق ونەردىڭ دامۋىنا جاڭا سەرپىن بەرىپ, ەلىمىزگە جاڭا ەسىمدەر سىيلايتىنىنا سەنىم بىلدىرگەن ا.بالاەۆا 29 جەڭىمپازعا «Umai» مۇسىنشەسى مەن اقشالاي سىيلىقتىڭ سەرتيفيكاتىن تابىس ەتتى.
بيىل ۇيىمداستىرۋ كوميتەتىنە قاتىسۋشىلاردان 322 ءوتىنىم كەلىپ تۇسسە, فينالعا 114 ادام ءوتتى. ولاردىڭ ىشىندە تەك 29-ى ۇلتتىق سىيلىقتىڭ يەگەرى اتاندى. ەلىمىزدىڭ بارلىق وڭىرىندەگى ونەر قايراتكەرلەرى مەن شىعارماشىلىق ۇجىمدارى بەلسەنە قاتىسقان بايگەدە باعى جانعانداردىڭ اراسىندا «تەاتر ونەرى» اتالىمىندا 8 جۇلدە تابىس ەتىلدى. «ۇزدىك مۋزىكالىق-درامالىق سپەكتاكل» اتالىمىندا استانا جاس كورەرمەندەر مۋزىكالىق تەاترىنىڭ «گاۋھارتاس» مۋزىكالىق دراماسى ۇزدىك دەپ تانىلدى. «ۇزدىك سپەكتاكل» – م.گوركي اتىنداعى مەملەكەتتىك اكادەميالىق ورىس دراما تەاترىنىڭ «جازدىڭ سوڭى» تراگيكومەدياسىنا بەرىلسە, «وپەراداعى ەر پارتياسىن ۇزدىك ورىنداۋشى» اتالىمى اباي اتىنداعى قازاق ۇلتتىق وپەرا جانە بالەت تەاترىنىڭ ءسوليسى دامير سادۋاقاسوۆقا تابىستالدى. اباي اتىنداعى قازاق ۇلتتىق وپەرا جانە بالەت تەاترىنىڭ ءسوليسى وكسانا داۆىدەنكو «وپەراداعى ايەل پارتياسىن ۇزدىك ورىنداۋشى» اتالىمىنىڭ جەڭىمپازى بولدى.
م.اۋەزوۆ اتىنداعى قازاق ۇلتتىق دراما تەاترىنىڭ اكتەرى بەكجان تۇرىس «ۇزدىك ەر ادام ءرولى», ب.ريموۆا اتىنداعى تالدىقورعان دراما تەاترىنىڭ اكتريساسى الماحان كەنجەبەكوۆا «ۇزدىك ايەل ءرولى», ع.مۇسىرەپوۆ اتىنداعى بالالار مەن جاسوسپىرىمدەرگە ارنالعان قازاق مەملەكەتتىك اكادەميالىق تەاترىنىڭ رەجيسسەرى دينا جۇماباەۆا «ۇزدىك رەجيسسۋرا» سىيلىعىن يەلەندى. «سپەكتاكلدىڭ ۇزدىك كوركەمدىك ديزاينى» اتالىمى ن.ساتس اتىنداعى بالالار مەن جاسوسپىرىمدەرگە ارنالعان مەملەكەتتىك اكادەميالىق ورىس تەاترىنىڭ سۋرەتشىلەرى ۆلاديمير پونومارەۆ پەن الەكساندرا رىچكوۆاعا تابىس ەتىلسە, «حورەوگرافيا ونەرى» اتالىمىندا «ۇزدىك بي ۇجىمى» اتالىمىن شقو مادەنيەت باسقارماسىنىڭ «ەرتىس كونتسەرت» كمقك «التاي» حالىق بي ءانسامبلى قانجىعاسىنا بايلادى. «زاماناۋي حورەوگرافيانىڭ ۇزدىك سپەكتاكلى» – تۇركىستان مۋزىكالىق-دراما تەاترىنىڭ «قورقىت تۋرالى اڭىز» پلاستيكالىق سپەكتاكلىنە, «بالەتتەگى ۇزدىك ورىنداۋشى» (بالەت ءسوليسى) – «استانا وپەرا» تەاترىنىڭ ءسوليسى ايگەرىم بەكەتاەۆاعا, «بالەتتەگى ۇزدىك ورىنداۋشى» (بالەت ءسوليسى) – «استانا وپەرا» تەاترىنىڭ ءسوليسى باقتيار ادامجانعا, «ۇزدىك حورەوگراف» – «استانا بالەت» تەاترىنىڭ حورەوگرافى ايگۇل تاتيگە تابىس ەتىلدى. «استانا وپەرا» تەاترىنىڭ «سپارتاك» بالەتى «ۇزدىك كلاسسيكالىق بالەت سپەكتاكلى» اتاعىن يەلەندى.
بايقاۋ قورىتىندىسى بويىنشا «مۋزىكالىق-ورىنداۋشىلىق ونەر» نوميناتسياسىندا ءتورت جۇلدە تابىس ەتىلدى. ونىڭ ىشىندە «ۇزدىك ءداستۇرلى ورىنداۋشى» ء(ان ايتۋ) – ر.باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنان اسقار مۇقياتقا, «ۇزدىك ءداستۇرلى ورىنداۋشى» (اسپاپشى) – راۋشان ورازباەۆا مەن ر.باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنا بەرىلدى. «ۇزدىك مۋزىكالىق انسامبل» (كلاسسيكالىق) اتالىمىندا – «قازاقستان كامەراتى» كلاسسيكالىق مۋزىكا ءانسامبلى, ال «ۇزدىك مۋزىكالىق انسامبل» (حالىقتىق) مۇسىنشەسى – «ناۆا» حالىق اسپاپتار ءانسامبلى مەن ق.قوجامياروۆ اتىنداعى مەملەكەتتىك اكادەميالىق ۇيعىر مۋزىكالىق كومەديا تەاترىنا تابىستالدى.
«بەينەلەۋ جانە ساندىك-قولدانبالى ونەر» اتالىمىنداعى زەرگەرلىك ونەر, مەتالل وڭدەۋ, ارالاس, ەكسپەريمەنتتىك تەحنيكا بويىنشا «ۇزدىك شەبەر-قولونەرشى» امانگەلدى مۇقاجانوۆ, اعاش وڭدەۋ, كوركەم ويۋ, كەراميكا «ۇزدىك شەبەر-قولونەرشى» اتالىمى اتابەك بەكبولاتوۆقا تابىس ەتىلدى. كيىز, توقىما, بىلعارى ونەرىندەگى وزىندىك ءىز قالدىرىپ جۇرگەندەردىڭ اراسىندا «ۇزدىك شەبەر-قولونەرشى» بولىپ مالىك مۇقانوۆتىڭ ەسىمى مەن ت.جۇرگەنوۆ اتىنداعى قازاق ۇلتتىق ونەر اكادەمياسى اتالدى. «ۇزدىك بەينەلەۋ ونەرىنىڭ تۋىندىسى» اتالىمىندا «ۇزدىك سۋرەت شەبەرى» – داۋرەنبەك بەكنازاروۆ, ت.جۇرگەنوۆ اتىنداعى قازاق ۇلتتىق ونەر اكادەمياسىنا, «زاماناۋي ونەردەگى ۇزدىك جوبا» – بولاتبەك بەيىسبەكوۆ, بەيىسبەكوۆتەر وتباسىنىڭ «التىن وردا» كوركەم گالەرەياسىنا, «ۇزدىك گرافيكا شەبەرى» – باتۋحان بايمەنگە, «ۇزدىك ءمۇسىن شەبەرى» – الىبەك مەرگەنوۆكە بۇيىردى. «استانا بالەت» تەاترىنىڭ «سنەجنايا كورولەۆا» بالەتى «ۇزدىك بالالار سپەكتاكلى» اتانسا, مەملەكەتتىك قۋىرشاق تەاترىنىڭ «ۇر, توقپاق!» ەرتەگىسى كىشى فورماداعى «ۇزدىك بالالار سپەكتاكلى» دەپ تانىلدى. تاۋەلسىز ساراپتامالىق كوميسسيا مۇشەلەرى «جىل جاڭالىعى» رەتىندە «استانا وپەرا» تەاترىنىڭ ورىنداۋشىسى بيبىگۇل جانۇزاق پەن «استانا بالەت» تەاترىنىڭ «Nine» حورەوگرافيالىق مينياتيۋراسىن ماراپاتتادى.
ماراپاتتاۋ سالتاناتى كونتسەرتتىك نومىرمەن جالعاستى. «استانا وپەرا» ءسوليسى سۇلتانبەك عۇمار «تۇران» ءانسامبلىنىڭ مۋزىكاسىنا قويىلعان «قيلى زامان» ءبيىن ۇسىنسا, جاس كورەرمەندەر مۋزىكالىق تەاترىنىڭ ارتىستەرى د.يسابەكوۆتىڭ «گاۋھارتاس» مۋزىكالىق دراماسىنىڭ ءۇزىندىسىن ساحنالاپ, كورەرمەندەردىڭ ىقىلاسىنا بولەندى. «استانا بالەت» ۇجىمى س.پروكوفەۆتىڭ «رومەو مەن دجۋلەتتا» بالەتىنىڭ ءۇزىندىسىن قويسا, ماەسترو رۋسلان ءبايمۋرزيننىڭ جەتەكشىلىگىمەن «استانا وپەرا» حورى مەن وركەسترى جانە سوليستەرى, «سەرپەر» دومبىراشىلار ءانسامبلى جانە وڭىرلىك تەاتر ۇجىمدارىنىڭ ونەر كەشىنىڭ كورىگىن ودان ءارى قىزدىردى.