شاعىن بيزنەستىڭ ءورىسىن كەڭەيتۋدى كوزدەيتىن قايتارىمسىز گرانتتاردىڭ ءىستىڭ كوزىن تابا بىلگەن ازاماتتارعا شاراپاتى كوپ ءتيىپ جاتىر. ماسەلەن, ارقالىق قالاسىنىڭ تۇرعىنى ەرجان قۇداباەۆ كاسىپكەرلىكتى دامىتۋدىڭ ۇلتتىق جوباسىنا قاتىسىپ, 1 ملن 380 مىڭ تەڭگەنىڭ گرانتىن ۇتىپ العان. ناتيجەسىندە, باياعى شوپانداردىڭ اۋىلىن ارالاپ جۇرەتىن اۆتومونشا جاساپ الىپ, ەلدەن ساياق قونعان مالساق اعايىننىڭ قاجەتىن وتەپ ءجۇر.
ەرجان بەرىك ۇلى مەملەكەتتەن العان قارجىعا كۇتىمى جاقسى كونە اۆتوبۋس ساتىپ الىپ, ونى ءتورت ادامدىق مونشاعا اينالدىرعان. جىلجىمالى مونشا بارىنشا قاۋىپسىز ءارى جۋىنۋعا دا ىڭعايلى.
«بۇل كوپتەن ويىمدا جۇرگەن ءىس ەدى. مىنە, ەندى سونىڭ ءساتى ءتۇسىپ, مەملەكەتتىك باعدارلامانىڭ كومەگىمەن جەكە كاسىبىمدى باستادىم. قايتارىمسىز قارجىعا اۆتوبۋس, 220 ۆولتتىق ەلەكتر قۋاتىن بەرەتىن قوزعالتقىش, پەش ءتارىزدى قاجەتتى دۇنيەلەردى ساتىپ الدىم. اۆتوبۋستىڭ ءىشىن جىلۋ ۇستاعىش ماتەريالمەن قاپتادىم. ناتيجەسىندە, مونشام قاقاعان ايازدى كۇندەرى دە قايناپ تۇراتىن بولدى. قىزمەتىم قىمبات ەمەس, قالتاعا كۇش تۇسىرمەيدى, تۇتىنۋشىلارىم دا ءدان ريزا. وسى كاسىبىمدى باستاۋىما سەپ بولعان ۇكىمەتىمىزگە زور ريزاشىلىعىمدى بىلدىرەمىن. كەيدە بالىقشىلار, تابيعات اياسىندا دەمالىپ جاتقاندار, قاشىقتا تۇراتىن شارۋالار, پىشەنشىلەر مەن مالشىلار, كەيدە شالعايداعى شاعىن اۋىلدار شاقىرادى. شاقىرعان جەردە سۋ بولسا بولدى, ارنايى سورعىشپەن سۋ سورىپ, مونشانىڭ بوشكەسىن تولىتىرىپ الامىن. كوپ ۇزاماي مونشا دا دايىن بولادى», دەيدى كاسىپكەر.
اۆتومونشانىڭ شاي ءىشىپ دەمالۋعا ارنالعان جەكە بولمەسى, بۋحاناسى, دۋشى, توڭازىتقىشى بار. ءتىپتى قايىڭ سىپىرعىش, بۋحاناعا كيەتىن باسكيىم, قولعاپ, تاپىشكە سەكىلدى مونشاعا تۇسۋگە قاجەت دۇنيەلەر دە تابىلادى.
قوستاناي وبلىسى