كولىك ءمينيسترى مارات قاراباەۆ بيىلعى 11 ايدا وتاندىق اۋە كومپانيالارى 12,3 ملن جولاۋشى تاسىمالداعان, بۇل وتكەن جىلمەن سالىستىرعاندا 23%-عا ارتىق ەكەنىن ايتتى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
جىل اياعىنا دەيىن بۇل كورسەتكىشتى 13 ملن جولاۋشىعا جەتكىزۋ جوسپارلانىپ وتىر. اۋەجايلاردا قىزمەت كورسەتۋ كولەمى 25%-عا ارتتى. سونىمەن قاتار اۋەجايلاردا قىزمەت كورسەتىلگەن جۇكتەردىڭ كولەمى دە ارتتى. جىل باسىنان بەرى بۇل كورسەتكىش 130 مىڭ توننانى قۇرادى. وتكەن جىلمەن سالىستىرعاندا ءوسىم – 16%. اۋە تاسىمالدارىنا ءوسىپ كەلە جاتقان سۇرانىستى قاناعاتتاندىرۋ ءۇشىن اۋەجايلاردىڭ ينفراقۇرىلىمىن جاڭعىرتۋ جۇمىستارى جالعاسۋدا. كەلەسى جىلى شىمكەنت, قىزىلوردا جانە الماتىدا جاڭا جولاۋشىلار تەرمينالدارىنىڭ قۇرىلىسى اياقتالادى. ناتيجەسىندە الماتى اۋەجايىنىڭ وتكىزۋ قابىلەتى 5 ەسەگە ارتىپ, 14 ملن ادامعا دەيىن قامتىسا, قىزىلوردادا 6 ەسەگە ارتىپ, 2 ملن ادامعا دەيىن, شىمكەنتتە 7 ەسەگە ۇلعايىپ, 6 ملن ادامعا دەيىن قىزمەت كورسەتىلمەك.