تۇركىستان وبلىسىندا 832 ەلدى مەكەننىڭ 465-ءى تابيعي گازبەن قامتىلعان. بيىل وڭىردە 107 نىساننىڭ قۇرىلىس جۇمىستارى جۇرگىزىلىپ جاتىر.
ونىڭ ىشىندە 62 نىساننىڭ قۇرىلىسى جىلدىڭ سوڭىنا دەيىن اياقتالىپ, 50 ەلدى مەكەن تابيعي گازبەن قامتىلادى. وسى رەتتە كەشە جەتىساي اۋدانىنا قاراستى 4 ەلدى مەكەنگە تابيعي گاز بەرىلدى. جىل سوڭىنا دەيىن تاعى 2 ەلدى مەكەندى گازعا قوسۋ جوسپارلانىپ وتىر.
بۇگىندە اۋدانداعى 105 ەلدى مەكەننىڭ 56-سى, ياعني تۇرعىنداردىڭ 53 پايىزى تابيعي گازعا قوسىلعان. ودان بولەك, جالپى قۇنى 2,5 ملرد تەڭگەنى قۇرايتىن جاڭا اۋىل, دوستىق اۋىلدىق وكرۋگتەرىندەگى ەلدى مەكەندەرگە جەتكىزۋشى گاز قۇبىرىن سالۋ جۇمىستارىن جۇرگىزىپ جاتىر.
اۋدان اكىمىنىڭ تاپسىرماسىمەن جىلدىڭ باسىندا قۇرىلىسى باستالعان 14 تابيعي گاز بەرۋ نىساندارىنىڭ بۇگىندە جەتەۋى تولىعىمەن قولدانىسقا بەرىلىپ وتىر. قالعان ۇشەۋى جىل سوڭىنا دەيىن تاپسىرىلسا, كەلەسى جىلى تاعى 12 ەلدى مەكەن كوگىلدىر وتىننىڭ قىزىعىن كورەدى دەپ جوسپارلانىپ وتىر.
اۋدانداعى گازداندىرۋ جۇمىستارىنىڭ قارقىندى جۇرگىزىلۋىنىڭ ناتيجەسىندە مەرەكە قارساڭىندا وتان ەلدى مەكەنىمەن قاتار, جىلى سۋ اۋىلدىق وكرۋگىندەگى بايقونىس, سەيفۋللين جانە ءال-فارابي ەلدى مەكەندەرى دە تابيعي گازعا قوسىلدى.
سونىمەن قاتار قىزىلقۇم اۋىلدىق وكرۋگىندەگى قاراساقال ەلدى مەكەنىنە ماگيسترالدى گاز قۇبىرىنىڭ قۇرىلىسى, جاڭا اۋىل اۋىلدىق وكرۋگىنە قاراستى ابدىحالىق, ءمىرزاشول, اتاقونىس ەلدى مەكەندەرىن گازداندىرۋعا مەردىگەر مەكەمەنى انىقتاۋ ماقساتىندا مەملەكەتتىك ساتىپ الۋ جۇمىستارى جۇرگىزىلۋ ۇستىندە.
تۇركىستان وبلىسى,
جەتىساي اۋدانى