ەلىمىزدە قىس مەزگىلى بىرتىندەپ وزىنە ءتان مازمۇنعا ەنەدى. سينوپتيكتەر جەلتوقسان ايىنا ارنالعان اۋا رايى بولجامىن ۇسىندى. الايدا سينوپتيكتەردىڭ ەسكەرتۋ رەتىندە ايتۋىنشا, ءبىر ايعا ارنالعان بولجام كەيىننەن وزگەرۋى دە مۇمكىن جانە ونكۇندىككە, اپتاعا, 1-3 تاۋلىككە ارنالعان اۋا رايى بولجامدارىمەن ناقتىلانادى, دەپ جازادى Egemen.kz.
جەلتوقساننىڭ تاياۋ كۇندەرىندە جانە ءبىر ايدىڭ ىشىندە رەسپۋبليكانىڭ باسىم بولىگىندە اۋا رايىنىڭ تۇراقسىز سيپاتى كۇتىلەدى: سولتۇستىك وڭىرلەردە قار, كەيدە بوراندى قار جاۋادى, وڭتۇستىك وڭىرلەردە جاۋىن-شاشىن جاۋادى (جاڭبىر, قار). رەسپۋبليكا بويىنشا تۇمان, كوكتايعاق, جەلدىڭ 15-28 م/س دەيىن كۇشەيۋى كۇتىلىپ وتىر, ايدىڭ باسىندا سولتۇستىك-باتىس پەن سولتۇستىكتە – جەل 30 م/س جانە ودان دا جوعارىراق ەكپىندە بولاتىنى بولجانعان.
جەلتوقساننىڭ ءبىرىنشى ونكۇندىگىنىڭ ەكىنشى جارتىسىندا اركتيكالىق سۋىق اۋا ماسسالارىنىڭ ىعىسۋىمەن بۇكىل ەلدە اۋا تەمپەراتۋراسى ايتارلىقتاي تومەندەيدى: ەلدىڭ باتىسىندا تۇندە -10-20°C دەيىن, كۇندىز -3-13°C دەيىن; سولتۇستىكتە, سولتۇستىك-باتىستا, شىعىستا, ورتالىقتا تۇندە -20-30°C دەيىن, كۇندىز -10-20°C دەيىن; وڭتۇستىك پەن وڭتۇستىك-شىعىستا تۇندە -10-20°س دەيىن, كۇندىز -2-10°س دەيىن تومەندەيدى.
جەلتوقساننىڭ ەكىنشى جانە ءۇشىنشى ونكۇندىكتەرىندە تسيكلونداردىڭ اسەرىنەن بىرنەشە قارقىندى جىلۋ تولقىندارى كۇتىلەدى: سولتۇستىكتە اۋا تەمپەراتۋراسى تۇندە -5-10°س دەيىن, كۇندىز 0-5°س دەيىن, وڭتۇستىكتە تۇندە -3+3°س دەيىن, كۇندىز +5+13°س دەيىن جوعارىلايدى.
الايدا جەكەلەگەن كۇندەرى سولتۇستىك-باتىستان ەنەتىن سۋىق انتيتسيكلونداردىڭ اسەرىنەن تەمپەراتۋرانىڭ تومەندەۋى بولجانادى: سولتۇستىكتە تۇندە -20-30°س دەيىن, كۇندىز -8-15°س دەيىن; وڭتۇستىكتە تۇندە -10-17°س دەيىن, كۇندىز -3-10°س دەيىن تومەندەيدى.
جالپى بولجام بويىنشا جەلتوقسان ايىندا ەل اۋماعىنداعى اۋانىڭ ورتاشا تەمپەراتۋراسى مولشەردەن 1-2°جوعارى بولاتىنى كۇتىلىپ وتىر.
جەلتوقساندا جاۋىن-شاشىن رەسپۋبليكانىڭ باسىم بولىگىندە مولشەرلى, ەلىمىزدىڭ سولتۇستىگىندە مولشەردەن كوپ جاۋاتىنى بولجانعان.