سەناتور سۇلتانبەك دۇيسەمبينوۆ دەپۋتاتتىق ساۋالىندا قوقىستى سۇرىپتاۋ جانە قايتا وڭدەۋ ماسەلەلەرىن ايتتى, دەپ حابارلايدى Egemen.kz جوعارعى پالاتانىڭ ءباسپاسوز قىزمەتىنە سىلتەمە جاساپ.
سەناتوردىڭ ايتۋىنشا ەلىمىزدە جىل سايىن 4 ملن توننادان استام قالدىق جينالادى, ونىڭ تەك 1 ملن تونناسى عانا سۇرىپتالىپ, قايتا وڭدەلەدى. دەمەك, قالعان 3 ميلليون توننا قالدىق تابيعاتتى لاستاپ, ەكولوگيانى بۇزىپ جاتىر.
«وسى جىلدىڭ 9 ايىندا 5578 زاڭسىز قوقىس الاڭدارىنىڭ 50%-ى جويىلدى دەگەن اقپارات جاريالاندى. بايقاۋىمىزشا, قوقىس پوليگوندارى جىل وتكەن سايىن كوبەيىپ وتىر. بۇل جاعدايلاردىڭ بارلىعى ەلىمىزدە تۇرمىستىق قالدىقتار مەن قوقىستاردى سۇرىپتاپ, وڭدەۋگە بايلانىستى ءتيىستى باعدارلاما, ناقتى ارەكەتتەر الگوريتمى جوقتىعىن كورسەتىپ وتىر. كادەگە جاراۋدان قالىپ, اۋىل-اۋىلدىڭ ىرگەسىندە ءۇيىلىپ جاتقان مالدىڭ ءجۇن-تەرىسى دە قوقىس پوليگوندارىن تولتىرىپ جاتىر. وسىنىڭ ءبارىن كادەگە اسىرسا شارۋالار شامامەن 14 ملرد تەڭگە تابىس تابار ەدى. ال قوقىس الاڭدارىن تولتىرىپ جاتقان مەتالل, قاعاز, پلاستيكتاردى قايتا وڭدەۋ ناتيجەسىندە بۇل تسيفر بىرنەشە ەسە وسەر ەدى», دەدى سەناتور.
دەپۋتاتتىڭ سوزىنشە الەمدىك تاجىريبەدە – بۇل سالا ەكونوميكاعا شىعىن ەمەس, كىرىس اكەلەتىن سەكتورلاردىڭ ءبىرى.
دەپۋتات سونداي-اق سەناتورلار وتكەن جىلدىڭ ءساۋىر ايىندا قوقىستى سۇرىپتاۋعا جانە قايتا وڭدەۋگە قاتىستى جولداعان ءتيىستى ساۋال جولداعانىن, وندا وسى سالادا جيناقتالعان ماسەلەلەردى وڭتايلى شەشۋ بويىنشا ناقتى ۇسىنىمدار جازىلعانىن مالىمدەدى. سۇلتانبەك دۇيسەمبينوۆ وسىعان بايلانىستى ۇكىمەت باسشىسىنا ماسەلەنىڭ ماڭىزدىلىعى مەن وزەكتىلىگىن تاعى اتاپ ءوتىپ, ءتيىستى مەملەكەتتىك باعدارلاما ازىرلەۋدى ۇسىندى.