تۇركىستان وبلىسى حالقىنىڭ 1 ملن 200 مىڭعا جۋىعى, ياعني 49,2 پايىزى ايەل. وڭىردە 177 مىڭنان استام كوپبالالى انا بار, ونىڭ 15 مىڭنان استامى – «التىن القا», 43 مىڭنان استامى «كۇمىس القا» يەگەرى. دەموگرافيالىق ءوسۋ دەڭگەيى جوعارى وڭىردە بيىل 9 ايدا 41 233 بالا دۇنيەگە كەلگەن.
وبلىستىڭ شاعىن جانە ورتا كاسىپكەرلىك سۋبەكتىلەرىنىڭ 32 پايىزىندا ايەلدەر جەتەكشىلىك ەتەدى. ياعني ايەلدەردىڭ ىسكەرلىك باستامالارىنا قولداۋ كورسەتۋ, قۇقىقتارى مەن مۇمكىندىكتەرىن كەڭەيتۋ, ولارعا قاتىستى جاسالاتىن زورلىق-زومبىلىقتىڭ الدىن الۋ جەرگىلىكتى بيلىكتىڭ باستى نازارىندا بولۋى زاڭدىلىق.
تۇركىستاندا وتكەن وبلىستىڭ بارلىق اۋدان, قالاسىنان قوعام بەلسەندىلەرى ساناتىنداعى نازىك جاندار قاتىسىپ, ەلىمىزدىڭ جاڭا ساياسي مادەنيەتى شەڭبەرىندە ايەلدەردىڭ قوعامداعى ءرولىن ىلگەرىلەتۋ ماسەلەلەرى قاراستىرىلعان جيىندا دەموگرافيالىق ءوسىمى جوعارى وڭىردە انا مەن بالا قۇقىعىن قورعاۋ باستى مىندەت ەكەنى دە ايتىلدى. جيىندا وبلىسقا جۇمىس ساپارىمەن كەلگەن «Amanat» پارتياسىنىڭ حاتشىسى شولپان كارينوۆا پارتيا ايەلدەردىڭ مەملەكەتتىك باسقارۋعا جانە ينكليۋزيالىق قوعام مەن گەندەرلىك پاريتەتتى قالىپتاستىرۋعا بەلسەندى قاتىسۋىن كەڭەيتۋدە ايەلدەر قاناتىن قۇرۋ جونىندە باستاما كوتەرگەنىن مالىمدەدى. ايەلدەر قاناتىن قۇرۋ جانە ونىڭ قىزمەتى ايەلدەردىڭ كۇن ءتارتىبىن ىلگەرىلەتۋ ماسەلەسىندە پارتيانىڭ الەۋەتىن نىعايتۋعا سەرپىن بەرەتىنىن اتاپ ءوتتى. «ايەلدەر قاناتىنىڭ جۇمىسى ايەلدەردىڭ الەۋمەتتىك, قۇقىقتىق جانە باسقا دا وزەكتى ماسەلەلەرىن شەشۋدە ۇلكەن تاجىريبەسى بار, پارتيا مۇشەلەرى بولىپ تابىلاتىن تانىمال, بەدەلدى ايەلدەردىڭ قاتىسۋىمەن ون باسىم باعىتى بويىنشا جۇرگىزىلەدى. ونىڭ ىشىندە تۇرمىستىق زورلىق-زومبىلىق قۇربانى بولعان ايەلدەردى قولداۋ, اۋىلداعى ايەلدەردىڭ اراسىندا كاسىپكەرلىكتىڭ دامۋىنا جاردەمدەسۋ, عىلىمداعى نازىك جانداردى قولداۋ, جاڭادان قابىلداناتىن زاڭ جوبالارىنا گەندەرلىك ساراپتاما جۇرگىزۋ جانە قوعامدا ايەلدەردىڭ قۇقىقتارى مەن مۇمكىندىكتەرىن كەڭەيتۋ بويىنشا باسقا دا وزەكتى ماسەلەلەر», دەدى شولپان تاڭاتقىزى.
ال «Amanat» پارتياسى تۇركىستان وبلىستىق فيليالىنىڭ توراعاسى, وبلىستىق ماسليحاتتاعى فراكتسيا جەتەكشىسى التىنسارى ۇمبەتاليەۆ وڭىردە ايەل-انالاردىڭ ساياسي بەلسەندىلىگى ارتىپ كەلە جاتقانىن جەتكىزدى. وبلىستاعى 82 مىڭنان استام پارتيا مۇشەسىنىڭ 66,6 پايىزى, وبلىستىق ءماسليحات قۇرامىنىڭ 13 پايىزى ايەلدەردەن تۇراتىنىن ايتتى. سونداي-اق جيىن بارىسىندا شولپان كارينوۆا پارتيانىڭ وبلىستىق فيليالى جانىنداعى ايەلدەردىڭ قۇقىقتارى مەن مۇمكىندىكتەرىن كەڭەيتۋ ماسەلەلەرى جونىندەگى كەڭەسشىسى بولىپ وبلىستىق پارتيا فيليالى اتقارۋشى حاتشىسىنىڭ ورىنباسارى, وبلىستىق ءماسليحات دەپۋتاتى قالىيما جانتورەەۆا تاعايىندالعانىن حابارلادى.
جيىندا عىلىمداعى ايەلدەردى قولداۋ شارالارى جونىندە ق.ا.ياساۋي اتىنداعى حقتۋ رەكتورى جانار تەمىربەكوۆا, ايەلدەردى مەملەكەتتىك قولداۋ جانە جۇمىسپەن قامتۋ تۋرالى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ءاسيا تەمىرباەۆا, ايەلدەردىڭ كاسىپكەرلىك باستامالارىن قولداۋ بويىنشا «اتامەكەن» ۇكپ وڭىرلىك كاسىپكەرلەر پالاتاسى ديرەكتورىنىڭ ورىنباسارى نۇربول رىسبەكوۆ بايانداما جاسادى. سونداي-اق قاتىسۋشىلار ايەلدەردىڭ ساياسي كوشباسشىلىعىن دامىتۋ مەن ىلگەرىلەتۋگە باعىتتالعان ۇسىنىستارىن ءبىلدىرىپ, ءوزارا پىكىر الماستى.
تۇركىستان وبلىسى