قىزمەتتىك يت ۇلاندىقتارعا ىزدەۋدە جۇرگەن ازاماتتى ۇستاۋعا كومەكتەستى. الماتىدا اسكەري جاساق باسشىسى, سەرجانت الىشەر ساعىمبەكوۆ پەن پاترۋل ەفرەيتور دامير مارات اۋەزوۆ كوشەسىندەگى №23 ءۇيدىڭ جانىنان ىزدەۋدە جۇرگەن ادامعا ۇقساس بىرەۋدى بايقاپ قالادى.
ۇلاندىقتار ونىڭ قۇجاتتارىن تەكسەرۋ ءۇشىن توقتاتقاندا الگى ادام قاشا جونەلگەن. وسى ساتتە كينولوگ ەفرەيتور دامير مارات: «توقتا! ايتپەسە قىزمەتتىك ءيتتى بوساتامىن!» دەپ ەسكەرتۋ جاساعان. ازامات بۇل تالاپتى ەلەمەگەننەن كەيىن روي ەسىمدى قىزمەتتىك يت قاشقىننىڭ سوڭىنا ءتۇسىپ, قىلمىسكەردى قۇرىقتاۋعا سەپتىگىن تيگىزگەن.
ء«بىز ونى قۇجاتتارىن تەكسەرۋ ءۇشىن توقتاتقان كەزدە ول قاشىپ كەتۋگە تىرىستى. سوندىقتان ونى ۇستاۋ ءۇشىن قىزمەتتىك ءيتتىڭ كومەگىنە جۇگىنۋگە تۋرا كەلدى», دەدى اسكەري جاساق باسشىسى, سەرجانت الىشەر ساعىمبەكوۆ. ۇستالعان ادام قوسىمشا تەكسەرىس ءۇشىن المالى اۋدانىنىڭ پوليتسيا باسقارماسىنا جەتكىزىلدى.
سونداي-اق ەلوردادا ۇلاندىقتار جوعالعان بالانى امان-ەسەن اتا-اناسىنا قايتاردى. قازىر بەس جاسار ءبۇلدىرشىننىڭ ءومىرى مەن دەنساۋلىعىنا قاۋىپ ءتونىپ تۇرعان جوق. 21 قاراشا كۇنى كەشكى ساعات 7-لەر شاماسىندا استانا قالاسىنىڭ جەدەل باسقارۋ ورتالىعىنان اسكەري جاساق بويىنشا كەزەكشىنىڭ راتسياسىنا بالا جوعالعانى تۋرالى اقپارات كەلىپ تۇسەدى. كوپ ۇزاماي وقيعا ورنىنا جاقىن ورنالاسقان بارلىق اسكەري جاساق بەس جاسار قىزدى ىزدەۋگە كىرىستى. جارتى ساعاتتان كەيىن پاترۋلدىك توپتىڭ باسشىسى, كىشى سەرجانت قاجىمۇقان مەلدەش, پاترۋلدەر قاتارداعى الەكساندر يۆانوۆ پەن كەنجەبەك ەرەجەپوۆتەن قۇرالعان اسكەري جاساق «Asiya» دۇكەنىنىڭ جانىندا جىلاپ وتىرعان بالانى بايقايدى.
ء«بىز باعدارلاۋ بەلگىلەرىنە سايكەس كەلەتىن بالانى كورىپ قالدىق. قىزعا جاقىنداعان كەزدە ونىڭ اداسىپ كەتكەنىن جانە ءوز اۋلاسىنا جول تابا الماي تۇرعانىن بىلدىك. سودان كەيىن ءبۇلدىرشىندى اتا-اناسىنىڭ قولىنا تاپسىردىق», دەيدى كىشى سەرجانت قاجىمۇقان مەلدەش. ىزدەستىرۋ جۇمىسىندا جەدەلدىك تانىتقان اسكەريلەرگە اتا-انالار ءدان ريزا ەكەنىن ايتىپ, العىسىن ءبىلدىردى. اسكەريلەر قوعامدىق ءتارتىپتى ساقتاۋداعى قىراعىلىعى مەن جاۋىنگەرلىك قىزمەت اتقارۋ كەزىندەگى بايقامپازدىعى, ءىس-ارەكەتىندەگى جەدەلدىگى ءۇشىن ماراپاتتالدى.