حاراسسمەنتتىڭ الدىن الاتىن ارنايى زاڭنىڭ بولماۋى ۇلكەن ماسەلە – سەناتور

دەپۋتاتتىڭ ايتۋىنشا, حاراسسمەنتكە ۇشىراعان ايەلدەردىڭ 57,6%-ى اتالعان فاكتىلەر بىرنەشە رەت بولعانىن اتاعان. بۇل ورايدا حارراسمەنتتىڭ بەلگىلى ءبىر تۇلعاعا فيزيكالىق قانا ەمەس, مەنتالدى نەمەسە ەموتسيالىق قىسىم كورسەتۋى ەكەنىن ەسكەرۋ قاجەت. زەرتتەۋ كورسەتكەندەي, حاراسسمەنت ءجيى بولاتىن جەرلەر – تۇراقتى جۇمىس ورنى (41%) جانە كورپوراتيۆتىك ءىس-شارالار (38%). ادامداردىڭ ۋاقىتىنىڭ كوپ بولىگى جۇمىس ورنىندا وتەتىنىن ەسكەرسەك, بۇل الاڭداتارلىق جايت.

دەپۋتاتتىڭ پىكىرىنشە ەلىمىزدە حاراسسمەنتتىڭ الدىن الاتىن ارنايى زاڭنىڭ بولماۋى ۇلكەن ماسەلە. جازالانباي جەڭىل قۇتىلاتىنىن بىلەتىندەر ءتۇرلى جۇگەنسىزدىككە بارادى, قىلمىستى قىمسىنباي جاسايدى. سوندىقتان ازاماتتارىمىزدى زورلىق-زومبىلىق پەن حاراسسمەنتتەن قورعاۋدا زاڭنامانى كۇشەيتۋ كەزەك كۇتتىرمەيتىن ءىس.

«زاڭ ۇستەمدىگى سالتانات قۇراتىن ادىلەتتى قازاقستاندا كەز كەلگەن جاستاعى نەمەسە جىنىستاعى ازامات كەز كەلگەن جەردە ءوزىن قاۋىپسىز ءارى جايلى سەزىنۋى كەرەك», دەدى دارحان قىدىرالى.

دەپۋتات د.قىدىرالى سونداي-اق حالىقارالىق ەڭبەك ۇيىمى №190 «ەڭبەك سالاسىنداعى زورلىق-زومبىلىق پەن حاراسسمەنتتى جويۋ تۋرالى» كونۆەنتسيانى ازىرلەگەنىن اتاپ ءوتتى. 2019 جىلعى 21 ماۋسىمدا قابىلدانعان كونۆەنتسيانى الەمنىڭ 19 ەلى راتيفيكاتسيالاعان. دەپۋتاتتىڭ پىكىرىنشە, قازاقستاننىڭ اتالعان قۇجاتقا قوسىلعانى ماڭىزدى قادامداردىڭ ءبىرى بولماق.

جىل سايىن بۇۇ 25-ءشى قاراشا – 10 جەلتوقسان ارالىعىندا زورلىق-زومبىلىققا قارسى 16 كۇندىك وتكىزەدى. قازاقستان دا وسى كۇندەردى ءتيىمدى پايدالانعانى ءجون.

سەنات دەپۋتاتى ساۋالىن ناقتى ءۇش سۇراقپەن تۇيىندەدى.

«قازاقستان زاڭنامالارىندا اتاپ ايتقاندا, قىلمىستىق, ەڭبەك, اكىمشىلىك كودەكستەردە جۇمىس ورنىنداعى حاراسسمەنت نەمەسە زورلىق ۇعىمدارىن ەنگىزۋ, مۇنداي زاڭ بۇزۋشىلىقتارعا قارسى ءتيىستى جازانى بەلگىلەۋ قاي دەڭگەيدە جۇرگىزىلىپ جاتىر؟ ەلىمىز حالىقارالىق ەڭبەك ۇيىمىنىڭ «ەڭبەك سالاسىنداعى زورلىق-زومبىلىق پەن حاراسسمەنتتى جويۋ تۋرالى» كونۆەنتسياسىنا قاشان قوسىلادى؟ جالپى حاراسسمەنتكە نەمەسە زورلىق-زومبىلىققا قارسى كەشەندى ءىس-شارالار جوسپارى بار ما؟», دەدى سەناتور.