تۇركىستاندا قازاقستاننىڭ حالىق ءارتىسى, قازاقستان مەن قىرعىزستاننىڭ ونەرىنە ەڭبەك سىڭىرگەن قايراتكەر, پروفەسسور, وسى تاريحي قالادا سازدى-دراما تەاترىنىڭ نەگىزىن قالاۋشى ءارى تۇڭعىش كوركەمدىك جەتەكشىسى رايىمبەك سەيتمەتوۆتىڭ 85 جىلدىعىنا وراي «Raiymbek fest» ءى رەسپۋبليكالىق تەاتر فەستيۆالى ءوتتى. ءتورت كۇنگە سوزىلعان تارتىستى ونەر دوداسىندا ەلىمىزدىڭ ءار وڭىرىنەن كەلگەن 11 تەاتر ۇجىمى باق سىنادى.
العاش رەت ۇيىمداستىرىلعان فەستيۆالعا ارنايى كەلگەن قوناقتار قاتارىندا جانە قازىلار القاسىنىڭ قۇرامىندا رايىمبەك سەيتمەتوۆتىڭ ومىردەگى, ونەردەگى دوسى, تەاتر جانە كينو اكتەرى, كسرو حالىق ءارتىسى, قازاقستاننىڭ ەڭبەك ەرى ءاسانالى ءاشىموۆ, تەمىربەك جۇرگەنوۆ اتىنداعى قازاق ۇلتتىق ونەر اكادەمياسى, «تەاتر ونەرىنىڭ تاريحى مەن تەورياسى» كافەدراسىنىڭ پروفەسسورى, ونەرتانۋ دوكتورى باقىت نۇرپەيىس, پەرزەنتى, قازاقستاننىڭ ەڭبەك سىڭىرگەن قايراتكەرى ازات سەيتمەتوۆ, قازاقستاننىڭ ەڭبەك سىڭىرگەن قايراتكەرى باحىت سرايلوۆ, تەمىربەك جۇرگەنوۆ اتىنداعى قازاق ۇلتتىق ونەر اكادەمياسى «ونەرتانۋ» فاكۋلتەتىنىڭ دەكانى, پروفەسسور مەرۋەرت جاقسىلىقوۆا, قازاقستاننىڭ ەڭبەك سىڭىرگەن قايراتكەرى, اكتەر, رەجيسسەر بالتاباي سەيىتمامىتوۆ, رايىمبەك سەيتمەتوۆتىڭ جارى نينەل مالدىبەكقىزى, قادىر مىرزاليەۆتىڭ جارى ساعاتاي مىرزاليەۆا بار. تۇركىستان وبلىسى اكىمدىگىنىڭ قولداۋىمەن, وبلىستىق مادەنيەت جانە تۋريزم باسقارماسىنىڭ ۇيىمداستىرۋىمەن وتكەن فەستيۆالدىڭ اشىلۋ سالتاناتىندا قۇرمەتتى قوناقتار مەن قاتىسۋشى تەاترلار قىزىل كىلەمنەن ءجۇرىپ ءوتتى. سودان سوڭ تاۋ تۇلعا تۋرالى بەينەفيلم كوپشىلىك نازارىنا ۇسىنىلدى. وبلىس اكىمىنىڭ ورىنباسارى بەيسەنباي تاجىباەۆ قيىن-قىستاۋ كەزەڭدە كيەلى تۇركىستاندا تەاتر نەگىزىن قالاعان رايىمبەك سەيتمەتوۆتىڭ ەرەن ەڭبەگىن ەسكەرە وتىرىپ, ونەر مەرەكەسىن تۋعان جەرىندە ۇيىمداستىرۋ زاڭدىلىق ەكەنىن اتاپ ءوتتى. «بۇگىندە وڭىردە كوپتەگەن مادەنيەت وشاعى سالىنىپ, حالىققا رۋحاني قىزمەت كورسەتىپ كەلەدى. ونىڭ ىشىندەگى كاسىبي 3 تەاترىمىزدىڭ ەڭبەگىن ماقتانىشپەن ايتا الامىز. تەاتر ۇجىمدارى رەسپۋبليكالىق, حالىقارالىق بايقاۋلاردا ۇزدىكتەر قاتارىنان كورىنۋدە. سىزدەرگە وسى رۋحاني دەمالىس ءساتى ءۇشىن, وبلىس باسشىلىعى مەن قالا تۇرعىندارى اتىنان الدىن الا شىنايى ريزاشىلىعىمدى بىلدىرەمىن», دەدى وبلىس اكىمىنىڭ ورىنباسارى. فەستيۆال شىمىلدىعى شاحمەت قۇسايىنوۆ اتىنداعى اقمولا وبلىستىق قازاق مۋزىكالىق دراما تەاترىنىڭ «وتەللو» تراگەديالىق شىعارماسىمەن ءتۇرىلدى. قازاق كاسىبي تەاترلارىنىڭ ونەرىن ناسيحاتتاۋ, تەاتر ونەرىنىڭ قازىرگى كەلبەتىن تانىتۋ, ءوزارا تاجىريبە الماسۋ, شەبەرلىك-ساعاتتارىن وتكىزۋ جانە شىعارماشىلىق تىعىز قارىم-قاتىناستا بولۋىنا ىقپال ەتۋ, دارىندى تەاتر ارتىستەرى مەن رەجيسەرلەردى انىقتاۋ, سونىمەن قاتار ولاردى ىنتالاندىرۋ, تەاترلاردىڭ تانىمالدىلىعىن ارتتىرۋ ماقساتىنداعى فەستيۆالعا ونەر سالاسىنا ەڭبەگى سىڭگەن تەاتر سىنشىلارى مەن كاسىبي ماماندار تورەلىك ەتتى.
فەستيۆال بارىسىندا مادەنيەت جانە اقپارات مينيسترلىگىنىڭ وكىلى ءمولدىر وڭداسىنوۆا ءمينيستردىڭ قۇتتىقتاۋحاتىن وقىپ, تابىس ەتتى. سونداي-اق تۇركىستان وبلىسى مادەنيەت جانە تۋريزم باسقارماسىنىڭ باسشىسى ءازىمحان قويلىباەۆ, قوجا احمەت ياساۋي اتىنداعى حقتۋ رەكتورى جانار تەمىربەكوۆا ءبىرتۋار ازامات جانە سونىڭ اتىندا وتكىزىلگەن فەستيۆال تۋرالى پىكىر ءبىلدىردى. سونىمەن ونەر سايىسىنىڭ قورىتىندىسى بويىنشا قازىلار القاسىنىڭ شەشىمىمەن «كورەرمەن كوزايىمى» اتالىمىمەن شىمكەنت قالالىق ءازىل-سىقاق جانە ساتيرا تەاترى, «قازىلار القاسىنىڭ ارنايى جۇلدەسى» اتالىمىمەن الماتى قالاسىنىڭ «جاڭا عاسىر» تەاترى, «ەكىنشى پلانداعى ۇزدىك ەر ادام ءرولى» اتالىمىمەن جۇمات شانين اتىنداعى شىمكەنت قالالىق اكادەميالىق قازاق دراما تەاترىنىڭ ءارتىسى, «ەكىنشى پلانداعى ۇزدىك ايەل ءرولى» اتالىمىمەن اسقار توقپانوۆ اتىنداعى جامبىل وبلىستىق قازاق دراما تەاترىنىڭ ءارتىسى, «ۇزدىك ايەل ءرولى» اتالىمىمەن نارتاي بەكەجانوۆ اتىنداعى قىزىلوردا وبلىستىق قازاق اكادەميالىق مۋزىكالىق دراما تەاترىنىڭ ءارتىسى, «ۇزدىك ەر ادام ءرولى» اتالىمىمەن شاحمەت قۇسايىنوۆ اتىنداعى اقمولا وبلىستىق قازاق مۋزىكالىق دراما تەاترىنىڭ ءارتىسى, «زاماناۋي تاقىرىپتى يگەرگەنى ءۇشىن» اتالىمىمەن اباي وبلىسىنىڭ سەمەي «داريعا-اي» جاستار تەاترى, «ۇزدىك كوركەمدىك شەشىم» اتالىمىمەن قۇرمانبەك جانداربەكوۆ اتىنداعى جەتىساي دراما تەاترى, «ۇزدىك اكتەرلىك انسامبل» اتالىمىمەن بيكەن ريموۆا اتىنداعى تالدىقورعان دراما تەاترى, «ۇزدىك رەجيسسەرلىك شەشىم» اتالىمىمەن جامبىل وبلىستىق ورىس دراما تەاترى, «رايىمبەك سەيتمەتوۆ اتىنداعى ارنايى سىيلىق» اتالىمىمەن رايىمبەك سەيتمەتوۆ اتىنداعى تۇركىستان قالاسىنىڭ سازدى-دراما تەاترى ماراپاتتالدى.
رايىمبەك سەيتمەتوۆتىڭ داۋىسىمەن جازىلعان «تۇركىستان» ولەڭىنىڭ بەينەتۋىندىسىمەن باستالعان جابىلۋ سالتاناتىندا جەڭىمپازدار قۇرمەتىنە كونتسەرتتىك باعدارلاما ۇسىنىلدى. ءىس-شارا سوڭىندا قادىر مىرزاليەۆتىڭ «اكتەر» ولەڭىن ايدار ناۋرىزباەۆ وقىپ بەرسە, ءدال وسى تۋىندىنىڭ ءانىن رايىمبەك سەيتمەتوۆ تەاترىنىڭ ارتىستەرى شىرقادى.
تۇركىستان