«شامشىراق» گازەتىنىڭ 92 جىلدىعىنا وراي تۇلكىباس اۋدانى اكىمدىگى مەن قازاقستان جۋرناليستەر وداعىنىڭ قولداۋىمەن اۋدان ورتالىعىنداعى كوشەگە اتاۋى بەرىلدى.
وسىعان بايلانىستى ۇيىمداستىرىلعان سالتاناتتى راسىمدە اۋدان اكىمى نۇرجان ىزتىلەۋوۆ جاعىمدى جاڭالىقتاردىڭ جارشىسى بولىپ جۇرگەن باسىلىم ۇجىمىن قۇتتىقتادى. «بۇل تەك گازەت ۇجىمىنىڭ عانا ەمەس, كۇللى وقىرمان قۋانىشى دەپ بىلەمىن. سىزدەر قانداي ماقتاۋ, ماراپاتقا بولسىن لايىقتىسىزدار. ويتكەنى قالامنىڭ كۇشىمەن, ءتىلدىڭ وتكىرلىگىمەن تالاي ءىستىڭ بىتۋىنە, ءبىراز ماسەلەنىڭ شەشىلۋىنە تىكەلەي سەبەپكەر بولدىڭىزدار», دەدى ول. جيىن بارىسىندا ەل اعالارى «شامشىراق» كوشەسىنىڭ بويىنا اعاش ەگىپ, اباتتاندىرىلۋىنا ءوز ۇلەستەرىن قوستى.
ءيا, ەل جوعارى باعالاپ وتىرعان بۇگىنگى جەتىستىكتىڭ باستاۋى وسى باسىلىمدا ەڭبەك ەتكەن اعا بۋىننان باستالادى. ابايتانۋشى, عالىم مەكەمتاس مىرزاحمەت ۇلى, جازۋشى مارحابات بايعۇت ساتيريك اقىن الپىسباي بورانباي ۇلى, اقىن ابدىبەك ارالباي ۇلىنىڭ تىرناقالدى تۋىندىلارى وسى گازەتتە جارىققا شىعىپ, وقىرماندارعا ۇسىنىلعان بولاتىن. تاريحى تەرەڭ, العاش «سوتسياليستىك ەگىنشى» اتاۋىمەن جارىققا شىققان ءۇنجاريادا ءتىلشى بولىپ قۋانتاي ارشاباەۆ, امانگەلدى ىزتىلەۋوۆ, قازبەك كەيكيەۆ, سايدۋللا ساتتارحانوۆ, ءبىلال قۇلبەك, مۇرات پىراليەۆ, ءابدىساتتار الىباەۆ, كەندەباي ايتقۇلوۆ, ارىسباي ايتامانوۆ, ورىنتاي كومەكوۆ سىندى بۇگىندە ەسىمى ەلگە ءمالىم ازاماتتار جۇمىس ىستەدى. بۇگىندە شىعارماشىلىق ۇيىم ۇلتتىق جانە حالىقارالىق دارەجەدەگى وقۋ ورىندارىنىڭ تۇلەكتەرىمەن, ياعني ىزدەنىمپاز جاستارمەن تولىققان. اعا بۋىندى الىستاتپاي, جاستارعا مۇمكىندىك بەرىپ, زامان تالابىنا ساي وقىرماندارىنا قىزمەت كورسەتىپ كەلە جاتقان رەداكتسيانىڭ بەدەلىنە باسىلىم باسشىسى مارات قالتاەۆتىڭ سىڭىرگەن ەڭبەگى كوپ ەكەنىن دە ايتا كەتەلىك. سالتاناتتى راسىمگە قاتىسۋشىلار الداعى ۋاقىتتا رەداكتسيا ۇجىمى تىڭ باستامالارىمەن, جاڭاشىلدىعىمەن وقىرماندار قاتارىن ارتتىرا تۇسەتىنىنە سەنىم ءبىلدىرىپ, شامشىراق كوشەسى اتاۋىنا ساي ۇلگىلى دە باعىت-باعدار بولاتىن داڭعىلعا اينالا بەرسىن دەگەن تىلەكتەرىن جەتكىزدى.
تۇركىستان وبلىسى