بۇل كۇننىڭ باستى كەيىپكەرى دە, ەموتسياسىنا ەرىك بەرگەنى دە بالالار بولدى. بىرنەشە كۇن ەرەسەكتەر الدىندا ونەر كورسەتۋگە دايىندالعان دارىندار دا بۇل كۇندى ۇمىتپاس. ءيا, ايتايىن دەگەنىمىز كەلەس اۋدانى بىرلەسۋ اۋىلدىق وكرۋگىنىڭ 28 گۆارديا اۋىلىندا جەكە كاسىپكەردىڭ دەمەۋشىلىگىمەن 145 ورىندى بالاباقشانىڭ اشىلعانى ەدى.
«الي-سۇلتان KZ» بوبەكجاي-بالاباقشاسىنىڭ قۇرىلىسى الدىڭعى جىلى باستالعان بولاتىن. جوبانىڭ جالپى قۇنى – 110 ملن تەڭگە. «مەملەكەت باسشىسى قاسىم-جومارت توقاەۆ قازاقستان حالقىنا ارناعان جولداۋىندا بالالاردىڭ مەكتەپكە دەيىنگى جان-جاقتى دامۋ ماسەلەسىن شەشۋ قاجەتتىگىن ايتىپ, 2025 جىلعا قاراي 6 جاسقا دەيىنگى بالالاردى مەكتەپكە دەيىنگى تاربيەمەن جانە وقىتۋمەن 100 پايىز قامتاماسىز ەتۋدى مىندەتتەگەن بولاتىن. اتالعان مىندەتتى ورىنداۋ باعىتىنداعى ىرگەلى ىستەر اۋدانىمىزدا ءساتتى جۇزەگە اسىرىلىپ كەلەدى. سونىڭ دالەلى – بۇگىن اشىلعان بالاباقشا. بۇل رەتتە بالعىنداردىڭ باقىتتى بولاشاعىنا قامقورلىق تانىتىپ دەمەۋشىلىك جاساپ وتىرعان ازاماتتارعا العىسىمىز شەكسىز», دەدى بوبەكجاي-بالاباقشانىڭ اشىلۋىنا قاتىسقان كەلەس اۋدانى اكىمىنىڭ ورىنباسارى سۇلەيمەن جىلقىباەۆ.
«الي-سۇلتان KZ» بوبەكجاي – بالاباقشاسى 2-6 جاس ارالىعىنداعى 6 توپقا بۇلدىرشىندەردى جيناقتاپ, 25 ادام جۇمىسپەن قامتىلاتىن بولادى. جالپى وبلىس بويىنشا 1381 مەكتەپكە دەيىنگى ۇيىم بار. ودان بولەك مەكتەپتەردە 5-6 جاستاعى مەكتەپالدى توپتاردا 34056 بالا تاربيەلەنۋدە. ياعني قامتۋ كولەمى 98,5% بولىپ وتىر. قازىرگى تاڭدا مەكتەپكە دەيىنگى ءبىلىم بەرۋ ۇيىمدارىنىڭ 77,1%-ى – جەكەمەنشىك. ال كەلەس اۋدانى بويىنشا 97 بالاباقشا بار. ونىڭ 12-ءسى مەملەكەتتىك, 85-ءى جەكەمەنشىك بولىپ تابىلادى. بۇل بالاباقشالاردا 10 615 بالا تاربيەلەنۋدە.
ايتا كەتەلىك, رەسپۋبليكا كۇنىنە وراي وبلىستاعى اۋدان-قالالاردا 17 الەۋمەتتىك ماڭىزدى نىسان اشىلادى. ولاردىڭ قاتارىندا ورداباسى اۋدانىندا جەكەمەنشىك « ۇلى وردا» مەكتەبى, جەتىساي اۋدانىندا فۋتبول الاڭشاسى, سارىاعاش اۋدانىندا دارىگەرلىك امبۋلاتوريا, شاردارا اۋدانىنداعى مادەنيەت ءۇيى سىندى نىساندار بار.
تۇركىستان وبلىسى