پرەمەر-ءمينيستردىڭ ورىنباسارى تاماراعا دۇيسەنوۆاعا ءماجىلىس دەپۋتاتى امانجول ءالتاي دەپۋتاتتىق ساۋال جولداپ, قازاقتىڭ قاسيەتتى دومبىراسىنا قاتىستى ماسەلە كوتەردى, دەپ حابارلايدى Egemen.kz.
دەپۋتات ۇلتتىق قۇندىلىعىمىزعا قاتىستى جولداعان ساۋالىندا قوعامدا دومبىراعا شابۋىل كۇشەيگەنىنە الاڭداۋشىلىق ءبىلدىردى.
«ۇلتتىق ءتولتۋما مادەنيەتىمىزدىڭ شىراقشىسى قازاقتىڭ قاسيەتتى قارا دومبىراسى پرەزيدەنت ق.توقاەۆ «قازاق پەن دومبىرا ەگىز ۇعىم بارشامىزعا ورتاق قۇندىلىق دومبىرانى جان جاقتى ناسيحاتتاپ جاس ۇرپاقتىڭ ساناسىنا ءسىڭىرۋ وتە ماڭىزدى» دەپ اسىل قۇندىلىعىمىزعا ءمان بەرۋگە شاقىردى. وكىنىشكە قاراي, بۇگىنگى قوعام اراسىندا, الەۋمەتتىك جەلىلەردە دومبىرا اسپابىنا دەگەن شابۋىلدار, ۇلتتىق دۇنيەتانىمىزعا جات قاۋىپتى پىكىرلەر كوبەيىپ بارادى. اسىرەسە ءدىني جات اعىمداردىڭ جەتەگىندە كەتكەن كەيبىر قازاقستان ازاماتتارى جۇرتتى اداستىراتىن پىكىرلەر تاراتىپ جاتىر. بۇعان الەۋمەتتىك جەلىلەردە جەلدەي ەسىپ جۇرگەن «دومبىرا – حارام» دەگەن سەكىلدى ادام شوشىتار الىپقاشپا سوزدەر دالەل. دومبىرا – تاريحي سانامىزدى جاڭعىرتۋعا جول اشاتىن قايتالانباس قۇندىلىعىمىز. دومبىرا بۇگىنگى جاس ۇرپاقتى مەيىرىمدىلىك پەن پاراساتتىلىققا, ادالدىق پەن وتانسۇيگىشتىككە, قايسار نامىسقا باۋليدى. دومبىرا – تاتۋلىق پەن بىرلىكتىڭ مامىلەگەرى, اتا تاريحىمىزداعى نەبىر الاساپىران زامانداردا ۇلتتى ۇيىستىرۋعا ەلدى بىرىكتىرۋگە, ەرلەردى ەل قورعاۋعا شاقىرۋعا زور ءرول اتقاردى. 1930 جىلداردىڭ قاسىرەتتى اشتىعىندا دا اتا-بابالارىمىز بىلەگىنەن ءالى كەتىپ, وزەگى تالىپ اقتىق دەمى شىققانشا قولىنان دومبىراسىن تاستاماعان. دومبىرا اسپابى قازاق ءسوزىنىڭ بالاماسى. ۇلت دەگەن ۇعىمنىڭ مازمۇنىن اشاتىن ماڭىزعا يە. سەبەبى حالقىمىزدىڭ ارمان-مۇراتى, ۇلتتىق ءتالىم-تاربيەسى دۇنيەتانىمى وسى قاسيەتتى دومبىرا ارقىلى كورىنىس تابادى. ەندەشە دومبىراعا ءتيىسۋ – ۇلتقا ءتىل تيگىزۋ, ءتولتۋما مادەنيەتىمىزدى قورلاۋ, وتكەن تاريحىمىز بەن بۇگىنىمىزگە كولەڭكە ءتۇسىرۋ دەپ قابىلدايمىز. قاسيەتتى اسپابىمىز بابالار ءسوزىن بۇگىنگە جەتكىزدى. بۇگىنگى ءسوزدى ەرتەڭگە جەتكىزەتىن دە وسى قاسيەتتى دومبىرا. قازاقستانداعى اسا ماڭىزدى سيمۆولداردىڭ ءبىرى. «دومبىرانىڭ ەكى ىشەگى ەجەلگى زامان مەن وسى زاماننىڭ سىرىن شەرتەدى», دەپ ريم پاپاسى ءبىزدىڭ ەلىمىزگە كەلگەن ساپارىندا دومبىرانىڭ ماڭىزدىلىعى جايلى وي تولعادى.
ءسوزىمنىڭ توبىقتاي ءتۇيىنى: بىرىنشىدەن, مەملەكەت باسشىسىنىڭ «مەكتەپتە دومبىرا ساباقتارىن ەنگىزۋ قاجەتتى ءارى دۇرىس باستاما دەگەن ءسوزىن» وقۋ-اعارتۋ مينيسترلىگى ەسكەرۋسىز, اياقسىز تاستاماۋعا ءتيىس. مەكتەپتەردە دومىرا اسپابىن ءان-كۇي ساباعىندا ۇيرەتۋ وقۋ باعدارلاماسىنا ەنگىزىلسىن. ەكىنشىدەن, بۇقارالىق اقپارات قۇرالدارىندا, راديو مەن تەلەارنالاردا دومبىرا اسپابىنىڭ قۇندىلىعىن اشاتىن ءان-كۇي, جىر, تەرمە, ايتىس كوبىرەك ناسيحاتتالسىن. ۇشىنشىدەن, قۇزىرلى ورگاندار ءدىن ىستەرى جونىندەگى ۋاكىلەتتى ورگان تەرىس اعىم جەتەگىندە كەتكەن ادامدارمەن جۇمىس جۇرگىزۋگە ءتيىس», دەدى ا.ءالتاي.