جاڭا مەكتەپ عيماراتى اۋىلدىڭ اجارىن اشا تۇسەرى انىق. سىرتقى كەلبەتى دە, ىشكى دۇنيەسى دە زاماناۋي ۇلگىدەگى نىساننىڭ كوركىن بالالاردىڭ رياسىز كۇلكىسى ەسەلەيدى. تۇلكىباس اۋدانىنداعى ەڭبەكشى اۋىلىندا توزىعى جەتكەن مەكتەپتىڭ ماسەلەسى بىرنەشە جىلدان بەرى شەشىمىن تاپپاي كەلگەن بولاتىن. بيىل وقۋشىلار جاڭا وقۋ جىلىن جاڭا مەكتەپتە باستاۋعا مۇمكىندىك الدى. «اۋىل – ەل بەسىگى» باعدارلاماسى اياسىندا سالىنعان مەكتەپ ەل يگىلىگىنە پايدالانۋعا بەرىلدى.
جاڭا وقۋ جىلى قارساڭىندا قۇرىلىسى اياقتالعان مەكتەپتىڭ سىيىمدىلىعى 150 وقۋشىعا لايىقتالعان. مەملەكەتتىك ستاندارتقا ساي كەلەتىن مەكتەپتە ارنايى لينگوفون, مۋلتيمەديا بولمەلەرى, قىزدار مەن ۇلدارعا ارنالعان زاماناۋي ۇلگىدەگى شەبەرحانا جانە 13 پاندىك كابينەت بار. سونىمەن بىرگە ءماجىلىس, سپورتزالى, كىتاپحانا, پەداگوگ-پسيحولوگتەردىڭ جەكە كابينەتتەرى مەن 50 ورىنعا شاقتالعان اسحانا مەن مەديتسينالىق بولمە جانە ىشكى اجەتحانا قاراستىرىلعان.
جىل سوڭىنا دەيىن اۋداندا تاعى ەكى مەكتەپتە قوسىمشا عيماراتتىڭ قۇرىلىسى اياقتالىپ, پايدالانۋعا بەرىلەدى. حالىق سانىنىڭ ارتۋىنا بايلانىستى, سونداي-اق بالالاردى ساپالى بىلىممەن قامتۋ ماقساتىندا تاۋساعىز اۋىلىنداعى مەكتەپكە قوسىمشا 150 ورىندىق عيمارات قۇرىلىسىنا جانە ت.رىسقۇلوۆ اۋىلى «باقىبەك» شاعىن اۋدانىنان سالىنىپ جاتقان 300 ورىندىق مەكتەپتىڭ قۇرىلىسىنا قارجى ءبولىنىپ, بۇگىندە قۇرىلىس جۇمىستارى قارقىندى جۇرگىزىلىپ جاتىر. سونىمەن قاتار ىنتىماق اۋىلى ا.ورازباەۆا اتىنداعى ورتا مەكتەپكە كۇردەلى جوندەۋ جۇمىستارى جۇرگىزىلىپ, بيىل پايدالانۋعا بەرىلەدى. اۋداندا 2023-2025 جىلدارى 4 جاڭا مەكتەپتىڭ جانە 2 قوسىمشا عيماراتتىڭ قۇرىلىسىن جۇرگىزۋ جوسپارلانىپ وتىر.
سونداي-اق اۋداندا «اقمەيىر» بالالاردى دامىتۋ ورتالىعى اشىلدى. ورتالىقتا ەرەكشە كۇتىمدى قاجەت ەتەتىن بالالارعا لوگوپەد-دەفەكتولوگ, ارتتەراپيا, مۋزتەراپيا, پەدوگوگيكالىق-پسيحولوگيالىق تۇزەتۋ كابينەتتەرىندە بىلىكتى ماماندار ءوز قىزمەتتەرىن تەگىن كورسەتەتىن بولادى. «Samruk-Kazyna Trust» كورپوراتيۆتىك قورىنىڭ قولداۋىمەن جۇزەگە اسقان جوبا ارقىلى 150 بالانى قامتۋ جوسپارلانعان. مۇندا ءبىرىنشى كەزەكتە اتا-انانىڭ قاراۋىنسىز قالعان, كوپبالالى جانە از قامتىلعان وتباسىلاردىڭ بالالارىنا باسىمدىق بەرىلمەك.
ءبىلىم كۇنى ساۋران اۋدانىندا №2 جالپى ءبىلىم بەرەتىن مەكتەپ پايدالانۋعا بەرىلدى. جاڭا مەكتەپتىڭ اشىلۋ سالتاناتىندا وبلىس اكىمىنىڭ ورىنباسارى بەيسەنباي تاجىباەۆ جىل سوڭىنا دەيىن 37 مەكتەپتى پايدالانۋعا بەرۋ جوسپارلانعانىن اتاپ ءوتتى. ال سارىاعاش اۋدانىندا زاماناۋي ۇلگىدەگى 300 ورىندىق جاڭا مەكتەپ اقجار اۋىلدىق وكرۋگى باعىس ەلدى مەكەنىندە اشىلدى. ع.مۇراتباەۆ اتىنداعى ءبىلىم ۇياسىنىڭ قۇرىلىسى بىلتىر باستالعان. مەكتەپتە وقۋشىلاردىڭ الاڭسىز ءبىلىم الۋىنا قولايلى جاعداي جاسالعان, سۋ جانە سانيتارلىق بايلانىس قۇبىرلارى ورتالىقتاندىرىلعان. سونداي-اق حيميا, فيزيكا, ەڭبەك جانە ينفورماتيكا كابينەتتەرى تولىقتاي زاماناۋي قۇرال-جابدىقتارمەن جانە ينتەراكتيۆتى تاقتامەن جابدىقتالعان. تىگىن ۇيىرمەسىنە ارنالعان بولمە, كەڭ سپورتزالى, اسحانا جانە مەديتسينالىق بولمەسى بار. ورتكە قارسى دابىل قاققىش, سىرتقى جانە ىشكى بەينەباقىلاۋ كامەرالارى, جەدەلساتى دا ورناتىلعان.
ورىن تاپشىلىعىن ازايتۋعا جەكەمەنشىك مەكتەپتەردىڭ دە قوسار ۇلەسى قوماقتى بولماق. مىسالى, بيىل سايرام اۋدانىندا 3 566 ورىندىق 7 جەكەمەنشىك مەكتەپ اشىلادى دەپ جوسپارلانعان. جالپى, 7 962 مۇعالىم جۇمىس ىستەيتىن, 64 مىڭنان اسا وقۋشى ءبىلىم الاتىن اۋدان جەكەمەنشىك مەكتەپ سالۋدان وڭىردە الدىڭعى ورىندا كەلەدى. كەنتاۋ قالاسىندا دا زاماناۋي ۇلگىدەگى جەكەمەنشىك «Grant high school» مەكتەبىنىڭ لەنتاسى قيىلدى. 250 بالاعا ارنالعان ءبىلىم وشاعىندا ءار وقۋشىنىڭ تاڭداعان باعىتىنا قاراي پاندەرى تەرەڭدەتىلىپ وقىتىلادى. سونداي-اق بالاعا تۇسكە دەيىن بەلگىلەنگەن كەستە بويىنشا ساباق وقىتىلسا, تۇستەن كەيىن ماماندىققا بەيىمدەلگەن ءبىلىم بەرۋ جۇيەسى بويىنشا ساباق جۇرگىزىلەدى. جەكەمەنشىك مەكتەپتە بالالاردىڭ ءبىلىم الۋىنا بارلىق جاعداي جاسالعان.
تۇركىستان وبلىسىندا 35 مىڭ ورىنعا تاپشىلىق بار. اتالعان ماسەلەنى شەشۋ ماقساتىندا 33 مەكتەپتىڭ قۇرىلىسىن جۇرگىزۋگە ءتۇرلى قارجىلاندىرۋ كوزىنەن 23,6 ملرد تەڭگە قاراستىرىلعان. ونىڭ ىشىندە ءبىلىم ينفراقۇرىلىمىن قولداۋ قورى ارقىلى بيىل 9 مەكتەپتىڭ قۇرىلىسى جۇرگىزىلىپ جاتىر. بۇدان بولەك, «جايلى مەكتەپ» جوباسىمەن 3 جىلدا 63 مەكتەپ سالىنادى.
تۇركىستان وبلىسى