تۇركىستان وبلىسى جەتىساي اۋدانىندا جەكە ينۆەستور ەسەبىنەن زاماناۋي مەديتسينالىق ورتالىق سالىنادى. «Al-Razi Medikal» جشس 3 گەكتار جەرگە ەمحانا مەن كوپبەيىندى رەابيليتاتسيالىق ورتالىق سالۋدى كوزدەپ وتىر. جوبا قۇنى – 7 ملرد تەڭگە.
ەمحانادا 800 كەلۋشىگە ارنالعان دياگنوستيكالىق ورتالىق ورنالاسادى. ال 96 توسەكتىك ورىنعا لايىقتالعان كوپبەيىندى رەابيليتاتسيالىق ورتالىقتا فيزيوتەراپيا, ونكولوگيا, كارديولوگيا, ينسۋلت ورتالىعى, جاراقات بولىمشەلەرى اشىلادى. جاڭا 200 جۇمىس ورنى اشىلادى, ونىڭ 50-ءى – بەيىندى دارىگەرلەر. مەديتسينالىق ورتالىق ەكى جىلدىڭ ىشىندە سالىنادى. كلينيكا زاماناۋي ۇلگىدەگى مەديتسينالىق جابدىقتارمەن تولىق قامتاماسىز ەتىلەدى. سونداي-اق مەملەكەت باسشىسىنىڭ تاپسىرماسىمەن سارىاعاشتا رەسپۋبليكالىق بيۋدجەت ەسەبىنەن پەريناتالدى ورتالىعى بار كوپسالالى مەديتسينالىق كەشەن سالىنىپ جاتىر. 10 گەكتار جەردە بوي كوتەرەتىن كەشەندە پەرزەنتحانا, كوپسالالى اۋرۋحانا, ەمحانا جانە اكىمشىلىك عيمارات ورنالاسادى. ال تۇركىستان قالاسىندا سالىنىپ جاتقان 570 توسەكتىك ورىندى كوپبەيىندى اۋرۋحانا قۇرىلىسى جىل سوڭىنا دەيىن اياقتالىپ, ەل يگىلىگىنە پايدالانۋعا بەرىلمەك.
سونىمەن قاتار وبلىس ورتالىعىندا وبلىستىق بالالار اۋرۋحاناسىنىڭ جانە «انا مەن بالا» ورتالىعىنىڭ دا عيماراتتارىن سالۋ جوسپارلانىپ وتىر. وتكەن جىلدىڭ وزىندە وبلىستا «دەنى ساۋ ۇلت – ءاربىر ازامات ءۇشىن ساپالى جانە قولجەتىمدى دەنساۋلىق ساقتاۋ» ۇلتتىق جوباسى اياسىندا اۋىلدىق ەلدى مەكەندەردە مەديتسينالىق پۋنكتەر مەن دارىگەرلىك امبۋلاتوريالارمەن قامتۋ ماقساتىندا 29 اۋىلدا 31 دەنساۋلىق ساقتاۋ نىسانىنىڭ قۇرىلىسى جۇرگىزىلدى. ونىڭ 17-ءسىنىڭ قۇرىلىسى جوسپارعا سايكەس اياقتالىپ, ەل يگىلىگىنە پايدالانۋعا بەرىلدى. شاردارا اۋدانىندا تاۋلىگىنە 150 ادام قابىلداۋعا قاۋقارلى, قۇرامىندا جەدەل جاردەم ستانساسى بار, قۇرىلىسى اياقتالعان قالالىق ەمحانا قولدانىسقا بەرىلدى. «اۋىل – ەل بەسىگى» باعدارلاماسى اياسىندا بىلتىر تۇلكىباس اۋدانى ساستوبە كەنتىندەگى 75 كەلۋشىگە ارنالعان دارىگەرلىك امبۋلاتوريا قۇرىلىسى تولىق اياقتالىپ پايدالانۋعا تاپسىرىلدى. تاعى 4 دارىگەرلىك امبۋلاتوريانىڭ قۇرىلىسى جۇرگىزىلەدى. بىلتىر 5 نىسان كۇردەلى جوندەۋدەن وتسە, بيىل تاعى 2 نىسانعا جوندەۋ جۇرگىزىلەدى. وبلىستا 2024 جىلعا قاراي – جەتىساي, سارىاعاش, سايرام جانە ورداباسى اۋداندارىندا ءتورت جاڭا كوپبەيىندى اۋدانارالىق اۋرۋحانا قۇرىلادى. بۇلار كورشى اۋدانداردىڭ تۇرعىندارىنا دا قىزمەت ەتەدى. جىل سوڭىنا دەيىن قۇرىلىسى اياقتالىپ, پايدالانۋعا بەرىلەتىن تۇركىستان وبلىستىق كوپبەيىندى اۋرۋحاناسى سوزاق, وتىرار جانە ساۋران اۋداندارىنىڭ تۇرعىندارى ءۇشىن وسى فۋنكتسيالاردى ورىندايدى. اۋدانارالىق اۋرۋحانالاردى ىسكە قوسۋ شىمكەنت پەن تۇركىستانداعى مەديتسينالىق مەكەمەلەردىڭ جۇكتەمەلەرىن ءبىرشاما ازايتۋعا مۇمكىندىك بەرەدى. ياعني دەنساۋلىق سالاسىنا قولداۋ كورسەتۋدىڭ ناتيجەسىندە مەديتسينالىق مەكەمەلەر قاتارى ارتا تۇسكەن. ارينە, بۇل باعىتتاعى مەملەكەتتىك ساياساتتى حالىق قولداپ, جاسالعان قولايلى جاعدايلارعا ريزاشىلىعىن ءبىلدىرىپ جاتىر. الايدا وسى سالىنىپ جاتقان, پايدالانۋعا بەرىلگەن مەكەمەلەردە, الىنىپ جاتقان زاماناۋي قۇرال-جابدىقتاردى مەڭگەرگەن ساپالى قىزمەت اتقاراتىن مامان تاپشى.
تۇركىستان وبلىسىندا, اسىرەسە بەيىندى ماماندار اراسىندا 258 مامان, انەستەزيولوگ-رەانيماتولوگ, وفتالمولوگ, لور, كارديوحيرۋرگ, تراۆماتولوگ, كارديولوگ, نەۆروپاتولوگ, نەفرولوگ, ونكولوگ, پاتولوگواناتوم, راديولوگ, نەوناتولوگ, جەدەل جاردەم دارىگەرى سەكىلدى كادرلار جەتىسپەيدى. ونىڭ بىردەن-ءبىر سەبەبىن وبلىستىق دەنساۋلىق ساقتاۋ باسقارماسى رەزيدەنتۋرادا وقىتۋ مەرزىمىنىڭ ۇزاقتىعىمەن بايلانىستىرادى. بۇل ورايدا, ياعني تاپشىلىقتى جويۋ ماقساتىندا بيىل جەرگىلىكتى بيۋدجەت ەسەبىنەن ءبىرىنشى رەت 60 گرانت بولىنگەن.
تۇركىستان وبلىسى