بۇرىنعى ءماسليحات دەپۋتاتى نۇرلان كوپەشوۆ «Elorda Eco System» ۇيىمىنىڭ باسشىسى بولىپ تاعايىندالدى, دەپ حابارلايدى Egemen.kz.
ول 2006-2008 جىلدارى قوستاناي زاڭ اكادەمياسىندا «قۇقىقتانۋ» ماماندىعى بويىنشا وقىعان. 2010 جىلى قازاق گۋمانيتارلىق-زاڭ ۋنيۆەرسيتەتىن «قۇقىقتانۋ» ماماندىعى بويىنشا, 2013 جىلى «ىسكەرلىك اكىمشىلەندىرۋ ماگيسترى» ماماندىعى بويىنشا ءتامامدادى. 2019 جىلى «پايدالى قازبالار كەن ورىندارىن جەراستى يگەرۋ» ماماندىعى بويىنشا ءبىلىم الدى.
ەڭبەك جولىن 2010 جىلى «مەديكەر» جشس-دە زاڭگەر بولىپ باستاعان. «جولاۋشى-اۆتو» جشس اتقارۋشى ديرەكتورى, «قازاق گۋمانيتارلىق-زاڭ ۋنيۆەرسيتەتى» اق كوممەرتسيالىق ديرەكتورى, «اق-باتا» جشس باس ديرەكتورى, «استاناەنەرگوسەرۆيس» اق باسقارما توراعاسىنىڭ كەڭەسشىسى, «اەسك» جشس ديرەكتورىنىڭ ەنەرگيامەن جابدىقتاۋ جونىندەگى ورىنباسارى بولىپ جۇمىس ىستەگەن.
2019 جىلعى قىركۇيەكتەن باستاپ 2022 جىلعى ماۋسىمعا دەيىن «استانا-ەنەرگيا» اق باسقارما توراعاسىنىڭ ورىنباسارى, 2020 جىلعى قاراشادان باستاپ استانا قالاسى تاەكۆوندو قالالىق فەدەراتسياسىنىڭ (WT) پرەزيدەنتى, 2022 جىلعى 15 ماۋسىمنان باستاپ «استانا-ەنەرگيا» اق باسقارما توراعاسى, AMANAT پارتياسىنىڭ مۇشەسى.
نۇرلان كوپەشوۆ 2021 جىلعى 14 قاڭتاردا جەتىنشى شاقىرىلىمداعى استانا قالاسى ءماسليحاتىنىڭ دەپۋتاتى بولدى. استانا قالاسى ءماسليحاتىنىڭ زاڭدىلىق, قۇقىقتىق ءتارتىپ جانە جۇرتشىلىقپەن جۇمىس ماسەلەلەرى جونىندەگى تۇراقتى كوميسسياسىنىڭ توراعاسى.
ەسكە سالايىق, تامىز ايىنىڭ باسىندا ەلوردانى سۋ باستى. قالا اكىمدىگى حابارلاعانداي, كارىز جۇيەسىنىڭ دۇرىس جۇمىس ىستەمەۋى سالدارىنان كەيبىر ۋچاسكەلەردى سۋ باسۋعا جول بەرىلگەنى ءۇشىن «Elorda eco system» ديرەكتورى تيمۋر شودانوۆ قىزمەتىنەن بوساتىلعان بولاتىن.