2023 جىلعى 1 تامىزداعى جاعداي بويىنشا 13 569 ەتنيكالىق قازاق تاريحي وتانىمەن تابىسىپ, قانداس مارتەبەسىن الدى. جالپى 1991 جىلدان بەرى رەسپۋبليكاعا 1 ملن 120,7 مىڭ ەتنيكالىق قازاق ورالدى, دەپ حابارلايدى Egemen.kz.
ەڭبەك جانە حالىقتى الەۋمەتتىك قورعاۋ مينيسترلىگى ۇسىنعان دەرەكتەرگە سايكەس, جىل باسىنان قازاقستانعا كەلگەن قانداستاردىڭ جارتىسى (55,2%) وزبەكستاننان, 19,2% – قىتايدان, 9,8% – موڭعوليادان , 8,6% – رەسەيدەن, 5% – تۇرىكمەنستاننان جانە 2,3% باسقا ەلدەردەن ورالعان.
بيىل ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 63%-دى, ەڭبەككە قابىلەتتى جاستان كىشى 28,4%-دى جانە زەينەتكەرلەر 8,6%-دى قۇرايدى.
ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 16%-ى - جوعارى ءبىلىمدى, 36%-ى - ورتا كاسىبي ءبىلىمدى, 39,9%-ى - جالپى ورتا ءبىلىمدى.
قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستاندى.
قانداستاردى قونىستاندىرۋ ءۇشىن ەڭبەك كۇشى تاپشى وڭىرلەر انىقتالدى. ولار: اقمولا, اباي, قوستاناي, پاۆلودار, شىعىس جانە سولتۇستىك قازاقستان وبلىستارى.
«قونىستاندىرۋ وڭىرلەرىندە 2023 جىلعا ارنالعان قانداستاردى قابىلداۋ كۆوتاسى 1 925 ادامدى قۇرايدى. 2023 جىلعى 1 تامىزداعى جاعداي بويىنشا قونىستاندىرۋ وڭىرلەرىنە 1 491 قانداس قونىس اۋداردى. جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى – ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (241,5 مىڭ تەڭگە) مولشەرىندە; تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (51,7-دەن 103,5 مىڭ تەڭگەگە دەيىن) مولشەرىندە», دەلىنگەن مينيسترلىك حابارلاماسىندا.
جىل باسىنان بەرى 653 قانداسقا ءتۇرلى قولداۋ شارالارى كورسەتىلگەنىن دە ايتا كەتۋ كەرەك. ماسەلەن, 431 ادام تۇراقتى جۇمىسقا ورنالاستىرىلدى, 653 ادام بىرجولعى سۋبسيديا الدى, ال 334 قانداسقا تۇرعىن ءۇي شىعىندارى سۋبسيديالاندى.