قازاقتىڭ جەزكيىگى اتانعان كاكىمبەك سالىقوۆقا ءبىر كوشە نەگە بۇيىرماي تۇر؟

كاكىمبەك سالىقوۆ مەملەكەت جانە قوعام قايراتكەرى بولۋمەن قاتار اقىن, كومپوزيتور ەدى. ول حالقىن, ەلىن, وتا­نىن جىرلاۋدان جالىقپادى. اسىرەسە جەز­قازعاندى, ونىڭ ادامدارىن جىرعا قوسپاعان كەزى جوق. كا­كەڭنىڭ «جەزكيىگى» كۇللى قازاقتىڭ جۇرەگىنە جاقىن انگە اينالدى. ول جەزقازعان – ۇلىتاۋ ءوڭىرى حال­قىنىڭ ماقتان تۇتاتىن ايدارلى ازا­ماتتارىنىڭ ءبىرى ەدى.

2021 جىلى ساتباەۆ قالاسىن­داعى اقساقالدار القاسى كاكىمبەك سا­لى­قوۆ­تىڭ ەسىمىن ماڭگى ەستە قالدىرۋ ماق­ساتىندا قانداي قۇرمەت كورسەتۋ جو­نىن­دە باس قوسىپ, اقىلداستى. قالادا جاڭا­دان سالىنىپ جاتقان وقۋشىلار سارايى­نا ەسىمىن بەرۋ تۋرالى ۇسىنىس تا بولدى. بىراق اقساقالدار اقىلداسا كەلە قالاداعى پ.شاتاليۋك كوشە­سىن كاكىمبەك سالىقوۆ كوشەسى دەپ اتاۋ ورىندى دەگەنگە توقايلاستى. مۇنىڭ دا ءجونى جوق ەمەس-ءتى. ويت­كەنى ك.سالىقوۆ كەزىندە جەز­قاز­عان كەنتىندە تۇرعان بو­لا­تىن. ال كەيىنگى جىلدارى بۇل كەنت­­تىڭ تۇرعىندارى تولىق­تاي كو­شى­رىلىپ, سولاردىڭ باسىم كوپ­­شىلىگى پ.شاتاليۋك كوشە­سىنە قو­نىستانعان ەدى. جانە ءبىر جاعىنان پ.شاتاليۋك ۋاقى­تىندا «ستاحانوۆشى» اتانعانى بولماسا, مەملەكەتتىك ماراپاتتار يەلەنە قويماعان كىسى بولىپ شىقتى.

اقساقالداردىڭ بۇل ۇسىنىسى قالا باسشىلىعىنا جەتكىزىلىپ, ودان ءارى ءتيىستى تالاپتارعا ساي, ناقتىراق ايتقاندا, 2022 جىلعى 2 قىركۇيەكتە قوعامدىق تىڭداۋ وتكىزىلىپ, قابىلدانعان شەشىمدەر جونىندە جەرگىلىكتى بۇقارالىق اقپارات قۇرالدارى, الەۋجەلى ارقىلى ەلگە جاريا ەتىلدى. بار­لىق قاجەتتى قۇجاتتار جيناقتال­عان سوڭ وبلىستىق ونوماستيكا­لىق كوميسسياعا جەتكىزۋ ءۇشىن « ۇلىتاۋ وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسى» مەملەكەتتىك مەكەمەسىنە جولداندى. وبلىستىڭ ەندى قۇرىلىپ جاتقانى اسەر ەتكەن بولۋ كەرەك, اتالمىش قۇجات ءبىرشاما ۋاقىت قوزعالىسسىز جاتىپ قالعانعا ۇقسايدى. بۇعان ساتباەۆ قالالىق مادەنيەت جانە تىلدەردى دامىتۋ ءبولىمىنىڭ باسشىسى ق.تولەش­تىڭ 2022 جىلعى 28 جەلتوقسان­دا « ۇلىتاۋ وبلىسىنىڭ مادەنيەت, تىل­دەر­دى دامىتۋ جانە ارحيۆ ءىسى باسقار­ما­سى» مەملەكەتتىك مە­كە­مەسىنىڭ باسشى­سى ءا.وماردىڭ اتىنا جولداعان حاتى دالەل. مۇن­دا ول وزدەرى جولداعان ۇسى­نىس­تىڭ رەسپۋبليكالىق ونوماس­تي­كا­لىق كوميسسياعا ۇسىنىل­­عان-ۇسىنىلماعانىن ناقتىلاپ بە­رۋ­دى وتىنەدى. بۇعان ءا.ومار 2023 جىلعى 10 قاڭتار كۇنى « ۇلىتاۋ وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقار­ما­سى ءسىزدىڭ ساتباەۆ قالاسىنىڭ پا­ۆەل شاتاليۋك كوشەسىنە كاكىم­بەك سالىقوۆتىڭ ەسىمىن, گورنياتس­كايا كوشەسىنە پاۆەل شاتاليۋكتىڭ ەسىمىن بەرۋ تۋرالى حاتىڭىز بو­يىنشا قۇجاتتار قازاقستان ­رەس­پۋب­ليكالىق ۇكىمەتىنىڭ جا­نىن­داعى رەسپۋبليكالىق ونوماس­تيكا كوميسسياسىنىڭ قاراۋى­نا جول­دانعانىن حابارلايدى» ­دە­گەن رەسمي جاۋاپ قايتارادى. مىنە, ­سودان بەرى سەگىزىنشى ايعا كەتىپ بارادى, بىراق ءالى ەش­قان­داي ناقتى جاۋاپ جوق. اقسا­قال­دار الاڭداۋلى. كوبىسى كەشە وز­دەرى كوزدەرىن كورگەن كاكەڭنىڭ اتىن­داعى كوشەنىڭ اشىلۋ سالتاناتىن تاماشالاعىسى كەلەتىنى تۇسىنىكتى عوي. بىراق بىرەر تۇسىنىكسىزدىك­تەر بار. بىرىنشىدەن, رەسپۋبليكا­لىق ونوماستيكالىق كوميسسيا وبلىس تاراپىنان جولدانعان ۇسىنىس­قا نەگە جاۋاپ قايتارمايدى؟ ەكىنشىدەن, بيىل ماۋسىمنىڭ 22-سىندە رەسپۋبليكالىق بۇقارا­لىق اقپارات قۇرالدارىندا ەلىمىز بويىنشا 69 كوشەنىڭ جاڭاشا اتاۋعا يە بولاتىنى تۋرالى جاريالاندى. سول 69-دىڭ ءبىرى بولۋعا كاكىمبەك سالىقوۆ ابدەن-اق لا­يىقتى ەمەس پە ەدى؟ نەگە سول تىزىمگە ەنبەي قالدى ەكەن؟

– ءبىز رەسپۋبليكالىق ونوماس­تيكا­لىق كوميسسيانىڭ شەشىمىن تاعاتسىزدا­نا كۇتىپ ءجۇرمىز. ويت­كەنى كاكەڭ – ەشقانداي تالاس تۋدىر­مايتىن تۇلعا. ۇسىنىس بارلىق تالاپتارعا سايكەس جاسالدى. قازىر قانىش يمانتاي ۇلى ساتباەۆتىڭ ەسىمىن يەلەنگەن ءبىزدىڭ قالامىز ءوزىنىڭ جارتىعاسىرلىق مەرەيتويىنا دايىندىق ۇستىندە. وسى مەرەيتوي قىركۇيەكتىڭ 13-ىندە كەڭ كولەمدە اتالىپ وتىلمەك. سول كۇنگى مەرەيتويلىق ءىس-شارانىڭ ءبىرى كاكىمبەك سالىقوۆ كوشەسىنىڭ سالتاناتتى اشىلۋى بولسا ەكەن دەگەن تىلەگىمىز بار, – دەيدى قر ەڭبەك سىڭىرگەن ەنەرگەتيگى, ساتباەۆ قالا­سىنىڭ قۇرمەتتى ازاماتى جايىق مۇڭسىزباەۆ.

بۇل تەك جالعىز جايىق اقسا­قال­دىڭ عانا ارمانى ەمەس...