ۇلىتاۋلىق 73 جاستاعى اقساقال سارسەنباي قوتىراشوۆ 2 تامىزدان باستاپ الەمدى جاياۋ ارالاۋعا اتتانادى. ول 2022 جىلى 181 كۇننىڭ ىشىندە 8 مىڭ شاقىرىم جول ءجۇرىپ, ەلىمىزدىڭ بارلىق ءوڭىرىن ارالاپ شىققان ەدى. سول ساياحات « ۇلىتاۋعا باردىڭ با؟» دەپ اتالعان بولسا, جاڭا ساپارعا «ساياحاتتاۋ ەشقاشان كەش ەمەس» دەگەن ۇران تاڭداپ الىندى.
جاسىنىڭ ۇلعايعانىنا قاراماستان تاعى دا تاۋەكەلگە بارىپ, بۇل جولى جەر ءجۇزىن جاياۋ ءجۇرىپ وتۋگە بەل بۋعان قايسار دا قۋاتتى قارتىمىز قانداي كىسى؟
جاڭاارقا توپىراعىنا كىندىك قانى تامعان قاريانىڭ سانالى عۇمىرى ۇلىتاۋدا, جەزقازعاندا ءوتىپ كەلەدى. قولونەرگە قاتىستى ون شاقتى ماماندىقتى يگەرىپ العان, تابيعاتىنان ۇستالىققا بەيىم س.قوتىراشوۆ ۇلىتاۋ اۋدانىنىڭ ورتالىعىنداعى مۋزەيدە كوپ جىل بويى رەستاۆراتور بولدى. ءبىر عاجابى, ول ءالى كۇنگە دەيىن ەڭبەكتەن قول ۇزگەن جوق. قازىر جەزقازعان تەمىر-بەتون زاۋىتىندا توكار بولىپ ەڭبەك ەتەدى. ايتپاقشى, بيىلعى ساپارعا ناق وسى زاۋىت دەمەۋشىلىك تانىتىپ وتىر.
جەزقازعان تاريحي-ارحەولوگيالىق مۋزەيىندە اقساقالدى جاڭا ساياحاتىنا شىعارىپ سالۋ سالتاناتى بولدى. سالتاناتتا جەزقازعان قالاسىنىڭ اكىمى قايرات شايجانوۆ, وبلىستىق مادەنيەت, ءتىل جانە ارحيۆ ءىسى مەن قوعامدىق دامۋ باسقارمالارىنىڭ باسشىلارى ءانۋار ومار, دارحان مۇحان, وبلىستىق ارداگەرلەر كەڭەسىنىڭ توراعاسى ساعىندىق قوجامسەيىتوۆ, اقىندار مۇقاش سەيتقازينوۆ, قۋانىش ماقسۇتوۆ اقساقالدىڭ ساپارىنا ساتتىلىك, جولىنا جاقسىلىق تىلەدى.
سارسەنباي اقساقال: «مۇنداي جولعا شىعۋ ءۇشىن الدىڭا بەلگىلى ءبىر ماقسات قويۋ كەرەك», دەيدى. ول وتكەن جولعى ساپارعا الدىنا ءۇش ءتۇرلى ماقسات قويعانىن اتاپ ءوتتى. سونىڭ ءبىرى جۇرگەن جەرلەردەگى قولونەرشىلەردىڭ ءتىزىمىن جاساپ, كەلىسىمشارتقا بايلانىستى يۋنەسكو-عا تابىستاۋ بولاتىن. قازىر سونىڭ ارقاسىندا ەلىمىزدىڭ قولونەر شەبەرلەرى ارنايى سايت ارقىلى ءوز ونىمدەرىن الەمنىڭ كەز كەلگەن ەلىنە تاپسىرىس ارقىلى جونەلتە الادى. سارسەنباي اقساقالدىڭ ساياحاتىنىڭ كوپكە تيگىزگەن ءبىر شاراپاتى وسىنداي.
بيىل دا ول الدىنا تاعى ءۇش ءتۇرلى ماقسات قويىپ وتىر. بىرىنشىدەن, الەم حالقىن بەيبىتشىلىككە شاقىرۋ, سوعىسقا جول بەرمەۋ. «سوعىستا جەڭگەن دە, جەڭىلگەن ەل دە وراسان زور شىعىنعا باتادى, حالىق كۇيزەلىسكە ۇشىرايدى. سوندىقتان سوعىستا جەڭىمپاز بولمايدى», دەپ سانايدى ول. ەكىنشىدەن, سالاماتتى ءومىر سالتىن ۇستانۋدىڭ ارتىقشىلىعىن دالەلدەۋ. جاستايىنان جاياۋ ءجۇرۋدى ادەتكە اينالدىرعان اقساقال الەم حالقىنا «دەنساۋلىعىڭدى ويلاساڭ, كۇنىنە كەم دەگەندە 7 شاقىرىم جاياۋ ءجۇر» دەگەن ۇندەۋ تاستاماق. ۇشىنشىدەن, بالكىم, ەڭ باستىسى دا سول بولار, دۇنيەدەگى قاراپايىم ادامدار اراسىندا قازاق ۇلتىنىڭ ەجەلگى تاريحى, مادەنيەتى جونىندە ماعلۇمات بەرۋ, تانىستىرۋ.
بۇل ساپار بىرنەشە كەزەڭنەن قۇرالماق. تامىزدىڭ 2-ءسى كۇنى اتىراۋدان استراحاندى بەتكە الىپ جولعا شىعاتىن اقساقال رەسەيدىڭ بىرقاتار جەرىن, گرۋزيانى باسىپ ءوتىپ, تۇركياعا تابان تىرەمەك, انكارادان ىستامبۇل قالاسىنا شەيىن جاياۋ ءجۇرىپ وتپەك. جالپى ۇزىندىعى 2 890 شاقىرىم قۇرايتىن مارشرۋتتى اقساقال 100 كۇندە اياقتاۋعا نيەتتى.
«اللا قۋات بەرسە, سوسىن ەلگە قايتىپ كەلەمىن دە, 2024-2025 جىلدارى ساياحاتتى قايتا جالعاستىرامىن. الەمنىڭ فرانتسيا, امەريكا, قىتاي, موڭعوليا ءتارىزدى ەلدەرىندە بولعىم كەلەدى», دەگەن اقساقال وسى ءۇش جىلدا 16 210 شاقىرىم جەردى جاياۋ ارالاماق.
ءوزىنىڭ عانا ەمەس, ۇلتىنىڭ قايسارلىعىن الەمگە پاش ەتكەلى جولعا شىققان اقساقالدىڭ ساپارى وڭ بولسىن!