2021-25 جىلدارعا ارنالعان ۇلتتىق كاسىپكەرلىكتى دامىتۋ جوباسى اياسىندا مەملەكەتتىك قولداۋعا يە بولعان كاسىپكەردىڭ ءبىرى - «بولاشاق» جك ديرەكتورى ارداق مەيرامبەكقىزى وسى جىلدىڭ اقپان ايىندا قاجەتتى جابدىقتاردى ساتىپ الىپ, «زەردە» نەۆرولوگوپەديا ورتالىعىن اشقان. ول جەكە كاسىبىن دامىتۋ ءۇشىن 4 ملن تەڭگە گرانت الدى, دەپ حابارلايدى Egemen.kz.
بالالاردىڭ قوعامعا بەيىمدەلۋىنە كومەك كورسەتەتىن اتالمىش ورتالىق 1 جاستان 8 جاسقا دەيىنگى بۇلدىرشىندەرگە قىزمەت كورسەتەدى. 4 بولمەدەن تۇراتىن ورتالىقتىڭ ءار بولمەسىندە ءارتۇرلى ماماندار جۇمىس ىستەيدى. سونداي-اق بالا ميىنىڭ جۇمىسىنا تىكەلەي اسەر ەتۋگە ارنالعان سپورت زالى دا بار. ورتالىق جاتتىعۋ تەراپياسى بولمەسىنە ارنالعان ۆەستيبۋليارلىق سەنسورلىق اپپارات, اتكەنشەك, جۇگىرۋ جولى, لوگوپەديالىق وقۋ قۇرالدارىمەن جابدىقتالعان.
«زەردە» نەۆرولوگوپەديا ورتالىعىنداعى ەمدىك دەنە شىنىقتىرۋ جاتتىقتىرۋشىسى, لوگوپەد, پسيحولوگ, دەفەكتولوگ, نەيروپسيحولوگ, پەداگوگ, بارلىعى 6 ادامنان قۇرالعان قىزمەتكەرلەردىڭ ارقايسىسى بالالارمەن جەكەلەي دە, توپپەن دە جۇمىس ىستەيدى.
قازىر ورتالىق 25 بالامەن جۇمىس جاساپ جاتىر. ورتالىقتا سويلەۋ ءتىلىنىڭ دامۋى تەجەلگەن, الەۋمەتتىك بەيىمدەلۋىندە قيىندىقتارى بار بالالار ەم قابىلداۋدا.
«بىزدە كوپ مامان بولماسا دا, بىرنەشە بالاعا كومەكتەسىپ جاتىرمىز. قايتارىمسىز گرانت ماماندىعىممەن اينالىسىپ, وسىنداي ورتالىق اشۋىما سەبەپ بولسا, ەكىنشى جاعىنان بالالاردىڭ قوعام ومىرىنە بەيىمدەلۋىنە جاعداي جاساۋعا مۇمكىندىك بەردى», دەيدى ارداق مەيرامبەكقىزى.