«جايلى مەكتەپ» كەلەشەك ۇرپاقتىڭ ساپالى ءبىلىم الىپ, جان-جاقتى دامۋىنا ايتارلىقتاي مۇمكىندىك بەرمەك. قاراعاندى وبلىسىندا ءارتۇرلى سىيىمدىلىقتا 300-دەن 2000 ورىنعا دەيىنگى 18 مەكتەپ سالىنادى.
10 ءبىلىم بەرۋ نىسانىنىڭ قۇرىلىسى بيىلدان باستالدى. ياعني قاراعاندىدا – ءتورت, بالقاشتا – ءبىر, بۇقار جىراۋ اۋدانىندا – ءۇش, شەت اۋدانىندا ەكى نىساننىڭ قۇرىلىسى سالىنادى. ولاردى 2024 جىلى بەلگىلەنگەن مەرزىمدە تاپسىرۋ قاجەت. قالعان سەگىز مەكتەپ 2024-2025 جىلدارعا جوسپارلانعان. ولار قاراعاندى, اباي, قارقارالى, پريوزەرسك قالاسىندا جانە نۇرا كەنتىندە سالىناتىن بولادى. ساپاسى دا اسا ماڭىزدى. سول سەبەپتى, «جايلى مەكتەپتەردىڭ» قۇرىلىسى قاتاڭ باقىلاۋدا بولماق.
ايماقتاعى «جايلى مەكتەپ» جوباسى بويىنشا مەكتەپ سالۋدى ۇتىپ العان مەردىگەرلەر شارۋالارىن شيراتپاسا بولمايدى. قۇرىلىستى كەشىكتىرەتىن بولسا, كەشىرىم جوق. جاۋاپتىلار قۇرىلىس جۇرگىزۋدەگى كەستەدەن 7 كۇن كەشىكسە, «Samruk-Kazyna Construction» باسقارماسى مەردىگەرمەن كەلىسىمشارتتى بىردەن بۇزادى. وسىنداي ماسەلەگە ەكىنشى مارتە تاپ بولسا, وندا ءتىپتى, «قوش» ايتىسادى. ەندى كومپانيادان اپتا سايىن تەحنيكالىق ەسەپتەر تالاپ ەتىلەدى. قاراعاندى وبلىسىنداعى «جايلى مەكتەپ» جوباسى بويىنشا سالىنىپ جاتقان 10 مەكتەپتىڭ قۇرىلىسىن كوزبەن كورۋگە ارنايى كەلگەن «Samruk-Kazyna Construction» باسقارما توراعاسى ماۋلەن ايمانبەتوۆ مەردىگەرلەرگە وسىنداي قاتاڭ تالاپ قويىپ كەتتى.
«جايلى مەكتەپ» ۇلتتىق جوباسى اياسىندا جاڭا مەكتەپتەردى تۇرعىزاتىن مەردىگەر كومپانيالاردىڭ وكىلدەرىمەن توراعا ماۋلەن ايمانبەتوۆ كابينەتكە ەمەس, قۇرىلىس الاڭىندا كەزدەسۋ وتكىزدى. جوعارىداعى تالاپتاردى سوندا قويدى. ونىمەن قوسا, مەرزىمدەردى كەشىكتىرگەن كومپانيالارعا قانداي جاۋاپكەرشىلىك قاراستىرىلعانىن قاداپ ايتتى.
«اپتا سايىن اتقارۋشىلىق تەحنيكالىق ەسەپتەردى ۋاقتىلى تاپسىرىڭىزدار. كەم دەگەندە, ەكى رەت مەرزىمدى بۇزىپ, جۇمىستاردى كەشىكتىرگەن جاعدايدا شارتتى بۇزامىز. ال جوبانى كونكۋرستا ەكىنشى ورىن العان كومپانياعا بەرەمىز. وزدەرىڭىزگە ەسكەرتەمىن. باقىلاۋ قاتاڭ بولادى! ءبىز ساپاعا باسىمدىق بەرەمىز» , دەدى ماۋلەن ايمانبەتوۆ.
ەگەر مەردىگەر قۇرىلىس جۇمىستارىن ورىنداۋ مەرزىمىن بەكىتىلگەن كەستەدەن كەم دەگەندە ەكى رەت 7 كۇننەن ارتىق ۋاقىتقا كەشىكتىرسە, كەلىسىمشارت بىرجاقتى تارتىپپەن بۇزىلادى. ءارى قاراي مەكتەپ قۇرىلىسى كونكۋرستا ەكىنشى ورىن العان كومپانياعا سەنىپ تاپسىرىلادى. ول تالاپتارعا ساي كەلمەسە, وندا جاڭا مەردىگەر ءبىر كوزدەن ساتىپ الۋ ارقىلى انىقتالادى. «Samruk-Kazyna Construction» باسشىلىعى بارلىق جايلى مەكتەپتى ۋاقتىلى سالىپ, بەلگىلەنگەن مەجەدە تاپسىرۋ ءۇشىن تالاپ كۇشتى ەكەنىن اتاپ ءوتتى.
ساپار بارىسىندا باسقارما توراعاسى قاراعاندىداعى «كەڭ دالا» شاعىن اۋدانىندا 2000 وقۋشىعا ارنالعان جايلى مەكتەپ سالۋ جوسپارىن تالقىلاۋعا قاتىستى. وندا مەكتەپكە تيەسىلى اۋماقتى وڭتايلاندىرۋعا بايلانىستى ءوز ۇسىنىستارىن جەتكىزدى. ىرگەلەس الاڭدا تريبۋنالارى بار كوپ فۋنكتسيونالدى ستاديون ورناتىلادى. مۇندا وقۋشىلاردىڭ جىلى كەزدە فۋتبول, قىستا حوككەي ويناۋىنا مۇمكىندىك بار. «جالپى, باسقارما ۇستانعان قاعيدات – مەكتەپتىڭ ءار شارشى مەترىن ءتيىمدى پايدالانۋ», دەيدى جاۋاپتى وكىلدەر.
«مەكتەپ اۋماعىنىڭ ءار شارشى مەترىن بارىنشا ءتيىمدى پايدالانۋ كەرەك. ەۋروپالىق مەكتەپتەردە بوس ورىن جوق. ماسەلەن, نەگە اۋماقتا اينالمالى جۇگىرۋ جولاعىن جاساماسقا؟ ول ءۇشىن ارنايى ورىن قاراستىرۋدى ۇسىنامىن. قىستا شاڭعى تەبۋگە, جازدا جۇگىرۋگە بولادى. ءوزىم دە مەكتەپتە وقىعاندا جۇگىرۋگە قاتىسىپ, ءنورماتيۆتىڭ ءبىرىنشى رازريادىن العانمىن. سول ۋاقىتتا مەكتەپ الاڭىندا جۇگىرەتىنبىز», دەيدى توراعا.
بۇل شاعىن اۋدانداعى مەكتەپتى سالۋعا دايىندىق كەستەگە سايكەس ءجۇرىپ جاتقانىمەن, ۋچاسكە ارقىلى كارىز جەلىلەرى مەن سۋ قۇبىرى وتەدى. بۇل ايتارلىقتاي قولايسىزدىق تۋدىرىپ وتىر. باسقارما توراعاسى مەردىگەر كومپانياعا, «BI Global» جشس-عا, جەلىلەردى ءوز كۇشىمەن شىعارۋدى ۇيىمداستىرۋدى تاپسىردى.
ماۋلەن ايمانبەتوۆ قاراعاندىداعى «گۇلدەر» شاعىن اۋدانىندا سالىناتىن 300 ورىندىق مەكتەپتىڭ قۇرىلىس الاڭىندا دا بولدى. بولاشاق جايلى مەكتەپتىڭ ۋچاسكەسىن تەكسەرۋ كەزىندە «SK Construction» باسشىسى نىساننىڭ جوسپارىن قايتا قاراستىرۋدى جۇكتەدى.
جاڭا مەكتەپ قازىر جۇمىس ىستەپ تۇرعان ءبىلىم وشاعىنىڭ جانىنا سالىنادى. سول سەبەپتى, «ستينك تفك» جشس قۇرىلىس كومپانياسى قالانىڭ ساۋلەت بولىمىمەن بىرلەسىپ, قولدانىستاعى مەكتەپتىڭ ۋچاسكەسىن كەسىپ, سىرتقى سپورت عيماراتتارىن ستاندارتتارعا ساي ەتىپ جاساۋى ءۇشىن قاجەت ەمەس نىسانداردى الىپ تاستاۋى قاجەت. وسى بويىنشا جۇمىستاردى دا جەدەلدەتۋدى جۇكتەدى توراعا.
«جوبالاۋ كەزىندە مىندەتتى تۇردە كىرەبەرىس جولداردىڭ بولۋىن قامتاماسىز ەتىڭىزدەر. جولدار مەن كولىك تۇراعى جەرگىلىكتى تۇرعىندارعا كەدەرگى كەلتىرمەۋگە ءتيىس. بۇل ماسەلەنى جەرگىلىكتى اتقارۋشى ورگاندارمەن پىسىقتاۋ قاجەت», دەدى ماۋلەن ايمانبەتوۆ.
سونىمەن قاتار «SK Construction» باسشىسى 300 وقۋشىعا شاقتالعان ۇشتوبە اۋىلىنداعى جايلى مەكتەپتىڭ قۇرىلىسىنا دايىندىقتى جەدەلدەتۋدى تاپسىردى. توراعا جۇمىس كەشىگىپ جاتقانىن, السىزدىگىن اتادى. مەردىگەر كومپانيا «استانا كوكتەم س» جشس مەكتەپ سالىناتىن ۋچاسكەنى قورشاعان. بەينەباقىلاۋ كامەرالارىن ورناتقان. الايدا نىساندى ورنالاستىرۋ جۇمىستارىن ءالى باستاماعان. ويتكەنى جاۋاپتى زەرتحانا گەولوگيالىق ىزدەستىرۋ قورىتىندىسىن ءالى كۇنگە دەيىن بەرمەگەن. «SK Constuction» باسشىسى ماسەلەنى شۇعىل تۇردە شەشۋدى مىندەتتەدى.
ء«تيىستى كەلىسىم جاساپ, جۇمىستى جەدەلدەتۋگە رۇقسات الىڭىزدار. سىزدەر قازىردىڭ وزىندە كەشىگىپ جاتىرسىزدار», دەپ ەسكەرتتى توراعا.
بۇل مەكتەپتەر 2024 جىلدىڭ سوڭىنا دەيىن پايدالانۋعا بەرىلەدى دەپ جوسپارلانىپ وتىر. قۇرىلىس تولىق اياقتالعاننان كەيىن بارلىق جايلى مەكتەپ جەرگىلىكتى اتقارۋشى ورگانداردىڭ بالانسىنا وتەدى.
قاسىمحان عالىم,«Egemen Qazaqstan»