«ورتالىق ازيا + شىعاناقتاعى اراب مەملەكەتتەرىنىڭ ىنتىماقتاستىق كەڭەسى» ءبىرىنشى سامميتىنە قاتىسىپ وتىرعان پرەزيدەنت قاسىم-جومارت توقاەۆ قازاقستان بۇل اۋقىمدى كەزدەسۋگە ەرەكشە ءمان بەرەتىنىن العا تارتتى, دەپ حابارلايدى Egemen.kz اقورداعا سىلتەمە جاساپ.
«قازاقستان بۇگىنگى كەزدەسۋگە ەرەكشە ءمان بەرەدى. ۇلكەن ساياسي ىقپالعا, ەكونوميكالىق جانە ينۆەستيتسيالىق الەۋەتكە يە شىعاناق ەلدەرى كوپتەگەن نەگىزگى باعىتتار بويىنشا ءبىزدىڭ ماڭىزدى سەرىكتەستەرىمىز بولىپ تابىلادى.
ورتالىق ازيا مەملەكەتتەرىنىڭ وڭىرىشىلىك ىنتىماقتاستىعىن جانداندىرۋ جانە ءوڭىردىڭ جاھاندىق ماڭىزدىلىعىن نىعايتۋ ءبىزدىڭ كوپجوسپارلى ءوزارا ءىس-قيمىلىمىزدى كەڭەيتۋ ءۇشىن جاڭا مۇمكىندىكتەر اشادى. ارينە, بۇل ىسكە «وا+» ديالوگتىق فورماتتارى ەلەۋلى ۇلەس قوسادى», دەدى مەملەكەت باسشىسى.
وسى تۇستا پرەزيدەنت ىنتىماقتاستىقتى ودان ءارى نىعايتۋ ءۇشىن بىرنەشە باسىم باعىت بويىنشا ءوز پىكىرىن ورتاعا سالدى.
«ەڭ الدىمەن, بۇل – ساۋدا-ەكونوميكالىق بايلانىستاردى كەڭەيتۋ. سوڭعى جىلدارى ءبىزدىڭ ايماقتىڭ ىنتىماقتاستىق كەڭەسى ەلدەرىمەن ساۋدا-ساتتىعى قارقىندى دامي باستادى. مۇنى ەرەكشە اتاپ وتكەن ءجون. بىراق كورسەتكىشتەر ءبىزدىڭ الەۋەتىمىزدىڭ تولىق پايدالانىلماي وتىرعانىن كورسەتەدى. تاۋار اينالىمىن ايتارلىقتاي ارتتىرۋ ءۇشىن بىزدە بارلىق مۇمكىندىك بار», دەدى پرەزيدەنت سامميت بارىسىندا.
قاسىم-جومارت توقاەۆتىڭ ايتۋىنشا, ول ءۇشىن ءوزارا ساۋدا نومەنكلاتۋراسىن ۇلعايتۋ قاجەت.
«مىسالى, قازاقستان قىسقا مەرزىمدە قۇنى شامامەن 400 ميلليون دوللار بولاتىن 100 ءتۇرلى تاۋار ەكسپورتتاۋعا دايىن», دەدى قازاقستان پرەزيدەنتى.