قر پارلامەنتى سەناتىنىڭ دەپۋتاتى اينۇر ارعىنبەكوۆا سەمەي قالاسىنداعى «جىلۋكومۋنەنەرگو» مكك-دە بولىپ, 2023-2024 جىلدارعا ارنالعان جىلىتۋ ماۋسىمىنا دايىندىق جوسپارىمەن تانىستى, دەپ حابارلايدى Egemen.kz.
سەناتورعا قالاداعى قازىرگى جىلۋ كوزدەرى تۋرالى جان-جاقتى اقپارات بەرىلدى. سونداي-اق وعان №1 جىلۋ ەنەرگەتيكا ورتالىعى كورسەتىلىپ, جەرگىلىكتى 92 قازاندىقتىڭ كەيبىرى كۇردەلى جوندەۋدى قاجەت ەتەتىنى تۋرالى ايتىلدى.
«وتكەن قىستا ەكىباستۇز بەن ريددەر قالالارىندا جىلۋ كوزدەرى مەن جىلۋ جەلىسىنىڭ قانشالىقتى توزعانىنا كۋا بولدىق. اباي وبلىسىندا وسىنداي جاعدايدى بولدىرماۋ ءۇشىن قىسقى ماۋسىمعا دايىندىق ماسەلەسىنە ەرەكشە نازار اۋدارۋىمىز كەرەك», دەپ اتاپ ءوتتى اينۇر ارعىنبەكوۆا.
دەپۋتاتقا جىلۋ بەرۋ ماۋسىمىنا دايىندىق جۇمىستارى اياسىندا اۋقىمدى جۇمىس اتقارىلعانى, اتاپ ايتقاندا «عابباسوۆ» قازاندىعى قايتا جاڭارتىلعانى جانە جالپى اعىمداعى جوندەۋ جۇمىستارى جالعاسىپ جاتقانى تۋرالى ايتىلدى.
دەپۋتات ارعىنبەكوۆا ءوز كەزەگىندە جەرگىلىكتى بيلىك بۇل ماسەلەنى باقىلاۋدا ۇستاۋى ءتيىس ەكەندىگى جانە جىلۋ كوزدەرى مەن جىلۋ جەلىسىنىڭ جاي-كۇيىنە تۇراقتى تەكسەرۋ جۇرگىزۋ قاجەتتىگىن اتاپ ءوتتى.
«قالانىڭ بارلىق جىلۋ جەلىسىن نورماتيۆتىك كۇيگە كەلتىرۋ وبلىسىمىزدىڭ باسىم مىندەتتەرىنىڭ ءبىرى جانە ول بىرنەشە جىلعا ەسەپتەلگەن اۋقىمدى جۇمىس. ءبىز وڭىردەن سايلانعان دەپۋتاتتار رەتىندە بۇل ماسەلەنى دە باقىلاۋدا ۇستايمىز», دەدى سەناتور.