بۇگىنگى تاڭدا جولداردى سالۋ جانە ولاردى جوندەۋ كەزىندە شەتەلدىك قوسپالاردى قولدانۋ كەڭ تارالعان قۇبىلىس. مەردىگەرلەر وتاندىق يننوۆاتسيالاردىڭ جوقتىعىنان تمد ەلدەرىنەن جانە جاقىن شەتەلدەردەن حيميالىق ازىرلەمەلەردى پايدالانۋعا ءماجبۇر, دەپ حابارلايدى Egemen.kz يدم ءباسپاسوز قىزمەتىنە سىلتەمە جاساپ.
قازاقستاندىق جولداردىڭ قۇرىلىسى بىرنەشە ەسە ارزانداۋى مۇمكىن دەيدى ساراپشىلار.
2017 جىلدان باستاپ قازاقستان جول-قۇرىلىس عىلىمي ينستيتۋتىنىڭ ماماندارى شەتەلدىك پوليمەرلەرگە بالاما نۇسقا جاساۋ بويىنشا جۇمىس ىستەدى. عالىمدار قالدىق كومىر ۇنتاعىن اينالمالى ەلەكتروماگنيتتىك اعىنمەن نانوبولشەكتەرگە دەيىن ۇنتاقتاپ, بيتۋم مەن اسفالتبەتوننىڭ ونىمدىلىگىن ارتتىراتىن نانو-ۇنتاق قوسپاسىن الدى.
«نانو-ۇنتاقتىڭ باستى ارتىقشىلىعى – ونىڭ اسفالت جابىنىنىڭ كاليبرلەۋگە توزىمدىلىگىن جاقسارتۋ قابىلەتى. بۇل وعان اۋىر جۇكتەمەلەرگە توتەپ بەرۋگە جانە ءپىشىنىن ۇزاعىراق ساقتاۋعا مۇمكىندىك بەرەدى, بۇل اسىرەسە كولىك قوزعالىسى قارقىندىلىعى جوعارى جولدار ءۇشىن ماڭىزدى. نانو-ۇنتاق نەگىزىندە اسفالتبەتون قوسپاسىن دايىنداۋ دا تومەن تەمپەراتۋرالى جارىقشاقتاردىڭ پايدا بولۋىن ازايتادى», دەپ اتاپ ءوتتى «قازجولعزي» اق ۆيتسە-پرەزيدەنتى ەرىك امىرباەۆ.
قازىرگى ۋاقىتتا نانو-ۇنتاق قوسپاسى استانا مەن الماتىداعى تاجىريبەلىك ۋچاسكەلەردە سىنالىپ جاتىر. مامانداردىڭ بولجامى بويىنشا, بۇل قوسپانى جاپپاي ءوندىرۋ جانە ەنگىزۋ ەلىمىزدەگى جول-قۇرىلىس جۇمىستارىن ارزانداتادى.
سونىمەن قاتار قازجولعزي ماماندارى كومىردى نانوولشەمدەرگە دەيىن ۇنتاقتاۋ قوندىرعىسىنىڭ زەرتحانالىق ۇلگىسىن جاساپ, وعان پاتەنت الىندى. زەرتتەۋ ناتيجەلەرى Colloids and Surfaces, News of NAS RK جانە Case Studies in Construction Materials سياقتى حالىقارالىق عىلىمي جۋرنالداردا جاريالانعان.