تولەبي اۋدانى العاباس ەلدى مەكەنىندەگى جالپى ورتا مەكتەپكە مەملەكەت جانە قوعام قايراتكەرى سادۋاقاس تەمىربەكوۆتىڭ ەسىمى بەرىلۋىنە بايلانىستى ارنايى ءىس-شارا ءوتتى. عالىمنىڭ ءبيۋستى مەن مۇراجاي كابينەتى اشىلدى.
جيىندا كورنەكتى عالىم-پەداگوگ, مادەنيەتتانۋشى, فيلوسوف, پروفەسسور سادۋاقاس تەمىربەكوۆتىڭ ءومىر جولىنان ەستەلىكتەر ايتىلدى. ەلگە سىڭگەن ەڭبەگى تۋرالى بايانداما جاسالدى. اۋىلدان جىراق جۇرسە دە تۋعان جەرگە قامقورلىق تانىتىپ, شاپاعاتىن تيگىزگەن عالىم تالاپتى, وقۋعا, بىلىمگە ۇمتىلعان جاستاردىڭ جوعارى وقۋ ورنىنا تۇسۋىنە جاردەم بەرىپ وتىرعان. سونداي-اق ورتالىق كوميتەتتىڭ عىلىم جانە وقۋ ورىندارى ءبولىمىن باسقارعان جىلدارى الماتى ساۋلەت-قۇرىلىس جانە الماتى تەاتر-ونەر ينستيتۋتتارىنىڭ, قوستاناي مەن كوكشەتاۋداعى اۋىلشارۋاشىلىق ينستيتۋتتارىنىڭ, قاراعاندى پەداگوگيكالىق ينستيتۋتىنىڭ اشىلۋىنا ىقپال ەتتى. ەڭبەگى حالىق تاراپىنان جوعارى باعالاندى.
عىلىمي-پەداگوگيكالىق قىزمەتىندە س.تەمىربەكوۆ جۇيەلى تۇردە مادەنيەتتىڭ تاريحى مەن تەورياسىن تۇبەگەيلى زەرتتەۋمەن اينالىسقان. العاشقىلاردىڭ ءبىرى بولىپ, «مادەنيەتتانۋعا كىرىسپە» اتتى ۋنيۆەرسيتەت ستۋدەنتتەرىنە ارنالعان وقۋلىق جازدى. ونىڭ قالامىنان 70-تەن اسا مادەنيەتتىڭ وزەكتى ماسەلەلەرىنە ارنالعان عىلىمي ماقالا تۋعان. قازاقتىڭ رۋحاني دۇنيەسىن مولايتۋعا, جاڭعىرتۋعا ۇلەس قوسقان تۇلعا 35 جاسىندا, ياعني 1967 جىلى جاڭادان اشىلعان شىمكەنت پەداگوگيكالىق مادەنيەت ينستيتۋتىنىڭ رەكتورى بولىپ تاعايىندالعان. س.تەمىربەكوۆ باسشىلىق ەتكەن جىلداردا كافەدرالاردىڭ سانى بەسەۋدەن 13-كە, وقىتۋشىلار سانى 137-گە جەتتi. وقۋ ورنىن باسقارعان 11 جىلدا ينستيتۋتتىڭ ماتەريالدىق بازاسى قالىپتاسىپ, پروفەسسورلىق-پەداگوگيكالىق قۇرام جيناقتالدى, كوپتەگەن جەتىستىككە جەتتى. پروفەسسور س.تەمىربەكوۆتىڭ جەتەكشىلىگىمەن فيلوسوفيا عىلىمدارى سالاسىندا ءۇش كانديداتتىق ديسسەرتاتسيا قورعالدى.
– وتكەن عاسىردا قازاقستاندى كولبين باسقارعان كەزەڭدە ول قۋعىن-سۇرگىنگە تۇسكەن ۇلت تۇلعالارىن قورعاۋ جاعىندا بولعانى ءمالىم. اكادەميك ومىربەك جولداسبەكوۆتىڭ جازىقسىز جالادان باسىنا ءىس تۇسكەندە جانىنان تابىلىپ, قولىنان كەلگەن جاقسىلىعىن ايانىپ قالعان جوق. سول ءبىر قيىن-قىستاۋ كەزەڭدە شىن دوستىقتى, شىنايى جاناشىرلىقتى كورسەتە ءبىلدى. سادۋاقاس اعامىز دۇنيە جيناعان جوق. ادال قىزمەتىمەن, ونەگەلى ومىرىمەن ابىرويلى بولدى. اۋىلى عانا ەمەس ەل ماقتان تۇتاتىن ازامات ەدى, – دەيدى اۋداندىق ارداگەرلەر كەڭەسىنىڭ تورعاسى ءاتىرحان شىڭعىسباەۆ.
س.تەمىربەكوۆ اتىنداعى جالپى ورتا مەكتەپتىڭ ديرەكتورى مەدەت بالىقباەۆتىڭ ايتۋىنشا, مەكتەپتىڭ اتاۋىن وزگەرتۋ, عالىمنىڭ ەسىمىن بەرۋ ماسەلەسى وسىدان 6 جىل بۇرىن 2016-2017 وقۋ جىلىنىڭ سوڭىندا وتكەن ۇلكەن جينالىستا كوتەرىلگەن ەكەن. «جيىندا ۇيىمداستىرۋ القاسى قۇرىلدى. سول ۋاقىتتا باستاۋ العان ءىس وڭىنان شەشىلىپ, رەسپۋبليكالىق ونوماستيكالىق كوميسسياسىنىڭ شەشىمىمەن مەكتەبىمىزدىڭ اتاۋى 2023 جىلدىڭ 20 قاڭتارىنان باستاپ «سادۋاقاس تەمىربەكوۆ اتىنداعى جالپى ورتا مەكتەبى» بولىپ وزگەرتىلدى. س.تەمىربەكوۆتىڭ ءىنىسى امانگەلدى جانە نەمەرە ءىنىسى يلياس تورەبەك ۇلى دەمەۋشىلىك جاساپ, مەكتەپ عيماراتىنىڭ سىرتىن كۇردەلى جوندەۋدەن وتكىزىپ, زاماناۋي ۇلگىدەگى سايدينگپەن قاپتاپ بەردى. ولارعا مەكتەپ ۇجىمى اتىنان ايتار العىسىمىز شەكسىز», دەيدى مەكتەپ ديرەكتورى.
س.تەمىربەكوۆتىڭ شاراپاتى اۋىلدىڭ بۇگىنگى جاس ۇرپاعىنا دا تيمەك, ياعني مەكتەپ وقۋشىلارىن قولداۋ ماقساتىندا بيىلعى ۇزدىك تۇلەككە ۋنيۆەرسيتەت گرانتى بەرىلمەك. «ۋنيۆەرسيتەتتىڭ شەشىمىنە سايكەس, تەمىربەكوۆ مەكتەبىنىڭ بيىلعى ۇزدىك تۇلەگىنە م.اۋەزوۆ ۋنيۆەرسيتەتىنىڭ گرانتى بەرىلەدى. گرانت يەسى باكالاۆريات دەڭگەيىندە 4 جىل تەگىن ءبىلىم الادى. تالاپكەر مادەنيەت جانە ونەر فاكۋلتەتىنىڭ ءبىلىم بەرۋ باعدارلاماسىن تاڭداي الادى. بۇل – پروفەسسور تەمىربەكوۆتىڭ سالىپ كەتكەن سارا جولىنىڭ زاڭدى جالعاسى. ويتكەنى پروفەسسور تەمىربەكوۆ ءوز زامانىندا وقۋعا قۇشتار, بىلىمگە تالاپتى جاستاردى قولداپ, جاعداي جاساعان. ءبىز دە وسى تاماشا ءداستۇردى بۇزباي تەمىربەكوۆ مەكتەبىنىڭ تۇلەگىنە قولداۋ رەتىندە وقۋ گرانتىن تابىستايمىز», دەدى م.اۋەزوۆ اتىنداعى وڭتۇستىك قازاقستان ۋنيۆەرسيتەتتىڭ رەكتورى داريا قوجامجاروۆا.
– كوپشىلىككە سادۋاقاس اتام ءىرى مەملەكەت قايراتكەرى جانە بەلگىلى عالىم, ال بىزگە, نەمەرەلەرى ءۇشىن ءار ۋاقىتتا ىنتا-ىقىلاسىمىزدى قولدايتىن, اق باتاسىن بەرىپ, جول سىلتەيتىن اسقار تاۋ ەدى. نەمەرەلەرىنىڭ تۇلعا بولىپ قالىپتاسۋىنا سادۋاقاس اتام مەن فاريدا اپامىزدىڭ كەڭپەيىلدىلىگى مەن بالاجاندى جارقىن بەينەسى كوپ اسەر ەتتى, – دەيدى عالىمنىڭ نەمەرەسى, ەكونوميكا عىلىمدارىنىڭ كانديداتى جانار تەمىربەكوۆا.
تۇركىستان وبلىسى