تۇركىستان وبلىسىنىڭ 8 وقۋشىسى جاس سۋرەتشىلەردىڭ «بوياۋلار قۇپياسى» رەسپۋبليكالىق بايقاۋىنا جولداما الدى. تۇركىستانداعى «وقۋشىلار سارايىندا» وتكەن بايقاۋدىڭ وبلىستىق كەزەڭىندە ولار ءبىرىنشى ورىندى يەلەندى.
وقۋشىلاردىڭ كوركەمدىك, شىعارماشىلىق قابىلەتتەرىن دامىتۋ, كاسىبي باعدارلانۋىن ىنتالاندىرۋ, ەستەتيكالىق, گۋمانيستىك جانە پاتريوتتىق سەزىمدەرىن وياتۋ, بالالار كوركەمسۋرەت مەكتەپتەرىنىڭ ءرولىن ارتتىرۋ ماقساتىنداعى بايقاۋدا 136 ءبىلىم الۋشى باق سىنادى. جاس قىلقالام شەبەرلەرى الدىمەن اۋداندىق جانە قالالىق ىرىكتەۋ كەزەڭىنەن ءوتىپ, ۇزدىك دەپ تانىلعاندار وبلىستىق كەزەڭگە جولداما العان بولاتىن.
قاتىسۋشىلار 45 مينۋت ىشىندە «مەنىڭ ەلىم – مەنىڭ جەرىم» تاقىرىبىندا كلاسسيكالىق كەسكىندەمە سالدى. تاقىرىپتىق ناتيۋرمورتتا تۇرمىستىق زاتتاردىڭ نەمەسە حالىق قولونەرى مەن قولونەر بۇيىمدارىنىڭ بەينەسىن كەسكىندەدى. «تالانتتار پاليتراسى» ارقىلى اۆانگارد جانە ەكسپەريمەنتتىك كەسكىندەمەلەر مەن كومپوزيتسيالىق تۋىندىسىن كورسەتتى. سونداي-اق سيۋجەتتىك كومپوزيتسيا رەتىندە «جەر بەتىندەگى ۇزدىك دەمالىس», «مەنىڭ اۋەستىگىم», «مەن جانە مەنىڭ وتباسىم» تاقىرىبىنا سايكەس ويلارىن سۋرەت ارقىلى جەتكىزدى.
قازىلار القاسىنىڭ شەشىمى نەگىزىندە جۇلدەلى ورىندار انىقتالىپ, جەڭىمپازدارعا قارجىلاي سىياقى تابىستالدى.
تۇركىستان وبلىسى