شىمكەنت قالاسىنىڭ تۇرعىنى وركەن ابدىرەەۆ قاريانى, اسىرەسە جۋرناليستەر جاقسى تانيدى. قالا اكىمى مەن اكىمدىك قىزمەتكەرلەرىنە دە ءوز اعا-اتالارىنداي جاقسى تانىس. وتكەنى قاريا قوعامدىق, الەۋمەتتىك ماسەلەلەردى قوزعاپ اكىمدىككە ءجيى بارادى. ناتيجە شىقپاي جاتسا نەمەسە جاۋاپتىلاردىڭ ارەكەتىنە كوڭىلى تولماسا اقپارات قۇرالدارىنا حابارلايدى.
اقساقال جۋىردا «Egemen Qazaqstan» گازەتىنىڭ ايماقتاعى تىلشىلەر قوسىنىنا ارنايى ىزدەپ كەلىپتى. قولىندا پرەزيدەنت قاسىم-جومارت توقاەۆقا جازعان حاتىنىڭ كوشىرمەسى بار. وركەن اقساقال الدىمەن مەملەكەت باسشىسى قاسىم-جومارت توقاەۆتىڭ كۇنى كەشە ەلدىڭ الەۋمەتتىك-ەكونوميكالىق ماسەلەلەرى جونىندەگى كەڭەيتىلگەن كەڭەستە ايتقان ءسوزىن ەسىمىزگە سالدى. «پرەزيدەنتتىڭ اتىنا جازىلعان ارىز-شاعىمنىڭ سانى ءۇش جىلدا 2 ەسە ءوسىپتى. مۇنى قاسىم-جومارت كەمەل ۇلى ايتتى, تىڭداعان بولارسىڭدار. جاڭا جىلدان بەرى پرەزيدەنت اكىمشىلىگىنىڭ قوعامدىق قابىلداۋىندا بولعان 811 ادامنىڭ 730-ىن كەستەدەن تىس, ياعني تابان استىندا جەدەل تۇردە پرەزيدەنتتىڭ ءوزى قابىلداۋىنا تۋرا كەلگەن. قوعامدىق قابىلداۋعا كەلگەندەردىڭ اراسىندا بارلىق ايماقتىڭ تۇرعىندارى بار ەكەن. مەن مىنا حاتتا جازىلعان ماسەلەلەردى قالا اكىمىنە كىرىپ ايتقانمىن. ناتيجە جوق. بۇل ماسەلەلەردى شەشۋگە جەرگىلىكتى اكىمدەردىڭ شاماسى كەلمەيدى-اۋ, ءسىرا؟ بىراق قولىمنان كەلمەيدى, شامام جەتپەيدى دەپ نەگە اشىق ايتپاسقا؟ ناقتى ناتيجە, تۇشىمدى جاۋاپ بولماعان سوڭ پرەزيدەنتكە حات جولدادىم», دەپ وركەن ءابدىرايىم ۇلى حاتىن بىزگە ۇسىندى. قاريانىڭ رۇقساتىمەن ناۋرىزدىڭ ورتاسىندا جازعان حاتىن ءبىز دە وقىعان ەدىك.
«مەن, ابدىرەەۆ وركەن ءابدىرايىم ۇلى 88 جاستامىن. تىل جانە ەڭبەك ارداگەرىمىن, مەكەمەلەردى باسقاردىم. جەتىستىكتەرىم ءۇشىن ەڭبەك قىزىل تۋ وردەنىمەن, 12 مەدالمەن ماراپاتتالعانمىن. وتباسىمدا 4 ۇل, 3 قىز, 15 نەمەرە مەن 2 شوبەرەنىڭ اتاسىمىن. قازىرگى تاڭدا جاسىم 90-عا جۋىقتاسا دا 105 پاتەرلى كوپقاباتتى تۇرعىن ءۇيدىڭ ءۇي باسقارۋشىسىمىن», دەپ باستاپتى پرەزيدەنتكە جولداعان حاتىن وركەن قاريا. ءارى قاراي كوكەيىندە جۇرگەن بىرنەشە ماسەلەنى كوتەرگەن قاريا پرەزيدەنتتەن باقىلاۋعا الىپ, شەشىلۋىنە ىقپال ەتۋىن سۇرايدى. «شىرايلى شىمقالامىزدا اسانباي اسقاروۆ اعامىز سالدىرعان «فوسفورشىلار» مادەنيەت سارايى قازىر قاراۋسىز قالىپ, قيراپ, ءىشى قوقىسقا تولىپ, ماسكۇنەمدەر مەن بۇزاقىلاردىڭ «ورداسىنا» اينالدى. اينالاسىنداعى ساياباق اۋماعى جارىقسىز, قاراۋسىز قوقىسقا تولى... وسى مادەنيەت سارايىن قالا ءوزىنىڭ بالانسىنا الىپ, قالپىنا كەلتىرىپ, كورىكتەندىرىپ, دەمالىس ايماعىن سالىپ, اتاۋىن «وزبەكالى جانىبەكوۆ اتىنداعى جاستار سارايى» دەپ قايتادان اشسا دەگەن ارمانىم بار».
سونداي-اق قاريا پرەزيدەنتكە جولداعان حاتىندا ەلىمىزدىڭ ساياسي, ەكونوميكالىق, مادەني دامۋىنا باسشىلىق جاساعان جىلدارى قازاق مەملەكەتىنىڭ اۋماق تۇتاستىعىنىڭ ساقتالۋىنا كوپ ەڭبەك سىڭىرگەن جۇمابەك تاشەنوۆتىڭ اتى شىمكەنتتە شاعىن كوشەگە بەرىلىپ, كىشىگىرىم ەسكەرتكىش قويىلعانىن, فاميلياسى كوپ جەرلەردە دۇرىس جازىلماعانىن ايتادى. «شىمكەنتتەگى تەمىرجول ۆوكزالىنىڭ الدىنداعى جۇرمەيتىن ساعاتتى الىپ تاستاپ, ورنىنا ج.تاشەنوۆتىڭ ۇلكەن ەسكەرتكىشىن قويۋ كەرەك, ول قالاعا قوسىمشا كورىك بەرەر ەدى», دەيدى وركەن قاريا حاتىندا. اقساقالدىڭ مەملەكەت قايراتكەرى, ەتنوگراف وزبەكالى جانىبەكوۆكە قويىلعان ەسكەرتكىشكە دە كوڭىلى تولمايدى. «وزبەكالى جانىبەكوۆتىڭ 90 جىلدىعىنا وراي شىمكەنتتەگى ورتالىق ساياباققا ەسكەرتكىش قويىلعان. ەسىمى جەردەگى جۇقا تۇعىرعا جازىلعان, ونى ەشكىم كورمەيدى. ەسكەرتكىشتىڭ قويىلعان جەرىنە كوڭىل تولمايدى, حالىق كوپ جۇرەتىن جەرگە قويىلسا دەگەن ۇسىنىس بار», دەيدى وركەن ابدىرەەۆ. مەملەكەتتىك تىلگە جاناشىرلىق تانىتىپ جۇرگەن قاريا تولە, قازىبەك, ايتەكە بيلەردىڭ ەسىمدەرى كوشەلەردىڭ بويىندا ءارتۇرلى جازىلىپ جۇرگەنىن دە ايتادى.
جەرگىلىكتى اكىمدىكتىڭ كەي ماسەلەنى شەشۋدە قاۋقارسىزدىق تانىتاتىنىنا قىنجىلىسىن بىلدىرگەن قاريا پرەزيدەنتتەن جاۋاپ كەلەتىنىنە سەنىمدى ەكەنىن ايتتى. «كەشەگى سوزىندە مەملەكەت باسشىسى «حالىق ۇنىنە قۇلاق اساتىن مەملەكەت» بولۋ ءۇشىن ازاماتتارمەن تىعىز قارىم-قاتىناس ورناتۋ ايرىقشا ماڭىزدى ەكەنىن ايتتى. اكىمدەردىڭ جاۋاپكەرشىلىكتى وزىنە الىپ, دەر كەزىندە شەشىم قابىلداۋدان قاشاتىنىن دا سىنعا الدى. پرەزيدەنتتىڭ سوزىنەن كەيىن قورىتىندى شىعارعان اكىمدەر جەرگىلىكتى ماسەلەلەر بويىنشا دەر كەزىندە شەشىم قابىلداپ نەمەسە ناقتى جاۋاپ بەرىپ, جۇرتتى جوعارىعا جۇگىنۋگە جەتكىزبەيتىن شىعار دەپ ۇمىتتەنەمىن», دەيدى وركەن ءابدىرايىم ۇلى.
شىمكەنت