تەحنيكالىق ماماندىقتارعا باسىمدىق بەرىلەدى

وتكەن جىلى وبلىس ءۇشىن ارناۋلى وقۋ ورىندارىنا 17 مىڭ گرانت بولىنگەن. بىراق ونىڭ ءبىرشاما يگەرىلمەي, كەرى قايتارىلىپتى. سوندىقتان وڭىرگە بيىل 15 300 گرانت ۇسىنىلىپ وتىر. ونىڭ 650-دەن استامى وبلىستىق بيۋدجەتتەن مەديتسينالىق مامانداردى دايارلاۋعا باعىتتالعان. كوللەدجدە گرانتقا تۇسكەن ستۋدەنتتەرگە ارناۋلى ءبىلىم, 30 مىڭ تەڭگە شاكىرتاقى بەرىلەدى. وڭىردە 52 كوللەدج بار. مەملەكەتتىك تاپسىرىستى ءبىلىم ستاندارتتارىنا ءارى تەحنيكالىق تالاپتارعا ساي وقۋ ورىندارى عانا الادى. تۇركىستان وبلىسىندا بيىلعى وقۋ جىلى 30 مىڭعا جۋىق وقۋشى مەكتەپتى بىتىرسە, 42 مىڭ وقۋشى 9-سىنىپتى ءتامامدايدى. دەموگرافيالىق ءوسىم, وقۋشىلار سانى, جۇمىسسىز جانە ماماندىق الماعان NEET ساناتىنداعى جاس­تار سانى بويىنشا دا ءوڭىر الدىڭعى قاتاردا. سوندىقتان ولاردى ماماندىقپەن قامتاماسىز ەتۋ ماڭىزدى. گرانتتار وبلىستىڭ دامۋىنا قاجەتتى ءارى ەڭبەك نارىعىندا سۇرانىسقا ساي جۇمىس ورنى بار ماماندىقتارعا عانا بولىنگەنى ءجون. وبلىستىق ءبىلىم باسقارماسى باسشىسىنىڭ ورىنباسارى نۇرجان نۇرلىباەۆتىڭ ايتۋىنشا, بىرنەشە باسقارمادان ۇسىنىس جيناقتالىپ, 87 ماماندىق بويىنشا قاجەتتىلىك انىقتالعان. گرانتتاردى بولۋدە وسى ۇسىنىستار دا نەگىزگە الىنباق. مەكتەپتى 3-4 جىل بۇرىن بىتىرسە دە, ءبىلىم الماعان جاستاردىڭ دا سانى, ءتىزىمى جاساقتالىپ جاتىر. جالپى, بيىل ءوندىرىستى دامىتۋ ماقساتىندا ينجەنەرلىك, وڭدەۋ جانە قۇرىلىس سالالارى ءۇشىن 8 375 گرانت, اۋىل, ورمان, بالىق شارۋاشىلىقتارى جانە ۆەتەريناريا سالاسىنا – 700, قىزمەت كورسەتۋ كادرلارىن دايارلاۋعا 1 575 گرانت ءبولۋ جوسپارلانعان. ياعني تەحنيكالىق ماماندىقتارعا باسىمدىق بەرىلەدى. ءبىلىم سالاسى ماماندارىن دايارلاۋعا – 1 100, ونەر جانە گۋمانيتارلىق عىلىمدارعا – 275, كاسىپكەرلىك باسقارۋ جانە قۇقىق سالاسىنا – 375, تسيفرلاندىرۋ, اقپاراتتىق-كوممۋنيكاتسيالىق تەحنولوگيالار سالاسى ءۇشىن 1 950 گرانت ءبولۋ مەجەلەنىپ وتىر.

سونداي-اق تۇركىستاندا IT سالاسى ماماندارىن دايارلايتىن حالىقارالىق ۋنيۆەرسيتەت فيليالى اشىلۋى مۇمكىن. وبلىس اكىمى دارحان ساتىبالدى مەن اقش-تىڭ Penn state (پەنسيلۆانيا) ۋنيۆەرسيتەتىنىڭ تۇلەكتەر جانە حالىقارالىق باعدارلامالار جونىندەگى دەكانى ستيۆەن بارنستىڭ كەزدەسۋىندە ۋنيۆەرسيتەت فيليالىن اشۋ باستاماسىنىڭ العىشارتتارى تالقىلانىپ, ارىپتەستىكتى نىعايتۋ جولدارى قارالدى. «قازىرگى ءداۋىر تسيفرلاندىرۋ ءداۋىرى ەكەنىن ەسكەرەتىن بولساق, ءوڭىر جاستارى ءۇشىن IT باعىتى بويىنشا جوعارى وقۋ ورنىن اشۋ قاجەتتىلىگى بار. سوندىقتان تۇركىستان قالاسىندا IT ۋنيۆەرسيتەتىنىڭ فيليالىن اشۋدى قاراستىرۋدى ۇسىنامىن. وسى جوبا اياسىندا وبلىس اكىمدىگى تاراپىنان بارلىق قولداۋ كورسەتىلەدى, ءتيىستى ينفراقۇرىلىممەن قامتاماسىز ەتۋگە ءازىر ەكەنىمىزدى حابارلايمىن. تۇرعىندارىمىزعا زاماناۋي وقۋ ورداسىن اشىپ, ولاردىڭ جان-جاقتى دامۋىنا جاعداي جاساۋىمىز كەرەك», دەدى د.ساتىبالدى.

ال ستيۆەن ءبارنستىڭ تۇركىستانعا كەلۋ ماقساتى – ءۇندىستاننىڭ جەتەكشى وقۋ وردالارىنىڭ ءبىرىنىڭ فيليالىن تۇركىستاندا اشۋعا كومەكتەسۋ ەكەنىن ايتتى. «جول, عيمارات سالۋ وڭاي, بىراق ءبىلىمدى ۇرپاق تاربيەلەۋ, ساپالى ءبىلىم جۇيەسىن دامىتۋ وتە قيىن. مەن تۇركىستاندا وقۋ ورداسىنىڭ فيليالىن قىسقا ۋاقىتتا اشۋ مۇمكىندىگى بار ەكەنىن كورىپ تۇرمىن. ارنايى عيماراتى بولىنسە, ۋنيۆەرسيتەت ءوز فيليالىن اشۋعا, ماماندارىن ۋاقىتشا جىبەرۋگە جانە قازاقستاندىق وقىتۋشىلاردىڭ بىلىكتىلىگىن كوتەرۋگە دايىن», دەدى ستيۆەن بارنس. ۋنيۆەرسيتەت وكىلدەرى كەلىسسوزدەردى جالعاستىرۋ ماقساتىندا ەلىمىزگە بيىل ماۋسىم ايىندا كەلەدى دەپ جوسپارلانىپ وتىر.

ايتا كەتەلىك, وبلىس تاريحىندا العاش رەت قىزدار ليتسەيى دە اشىلماق, جاڭادان ءبىلىم-يننوۆاتسيا ليتسەيى سالىنىپ جاتىر. كەنتاۋ قالاسىندا بالاباقشا عيماراتىندا اشىلعان ءبىلىم-يننوۆاتسيا ليتسەيى جاڭا وقۋ جىلىنان باس­تاپ تۇركىستان قالاسىنان جاڭادان سالىنعان عيماراتقا كوشەدى. جاۋاپتى مەردىگەر كومپانيا قۇرىلىستىڭ 77%-ىن اياقتاعان. سىرتقى-ىشكى ارلەۋ ءارى تەحنيكالىق بازامەن قامتاماسىز ەتۋ جۇمىستارى قالىپ وتىر. بيىل قىركۇيەكتە اشىلاتىن 700 ورىندى وقۋ عيماراتى بازاسىندا 30 سىنىپ, 15 زەرتحانا, 23 قوسىمشا كابينەت بار. ال اسحانادا ءبىر مەزگىلدە 250 ادام تاماقتانا الادى. وقۋ عيماراتىنا جاپسارلاس ورنالاسقان 500 ورىندى جاتاقحاناسى دا بار. ۇلدار مەن قىزدار بولەك وقىپ, بولەك جاتاقحانادا تۇرادى. ليتسەيگە وقۋشىلار 7-سىنىپتان باستاپ قابىلدانادى.

تۇركىستان وبلىسى