الماتى وبلىسىندا ەر ادام مال باعىپ ءجۇرىپ السىرەگەن قار بارىسىن كەزدەستىرىپ, دەرەۋ قۇزىرلى ورگاندارعا جۇگىنگەن, دەپ حابارلايدى Egemen.kz.
«الماتى وبلىسىندا تۇرعىندار قورشاۋعا قامالعان قار بارىسىن ۆيدەوعا تۇسىرگەن. وقيعانىڭ الماتى وبلىسى نارىنقول اۋىلىندا بولعانى ايتىلعان. قىزىل كىتاپقا ەنگەن جانۋاردى نەگە قاماپ قويعان؟ وكىنىشكە قاراي, ول جاعىن انىقتاۋ مۇمكىن بولمادى», دەلىنگەن جازبا استىندا.
ورمان شارۋاشىلىعى جانە جانۋارلار دۇنيەسى كوميتەتى جەلىدەگى جاريالانىمعا قاتىستى تۇسىنىكتەمە بەردى.
«19 ءساۋىر كۇنى الماتى وبلىسى رايىمبەك اۋداندىق پوليتسياسىنىڭ كەزەكشى بولىمىنە سارىباستاۋ كەنتىنىڭ تۇرعىنى مال جايۋ كەزىندە السىرەگەن قار بارىسى (ارتقى اياقتارىنىڭ قوزعالىس فۋنكتسيالارى بۇزىلعان) كەزىككەنى جايلى حابار ءتۇستى. وقيعا ورنىنا «وحوتزووپروم» ءوب» رمقك ينسپەكتورلارى, رايىمبەك اۋدانى پوليتسيا ءبولىمى قىزمەتكەرى مەن تابيعات قورعاۋ پوليتسياسى بارىپ, ءتيىستى اكت تولتىرىلدى», دەلىنگەن رەسمي حابارلامادا.
سونداي-اق كوميتەت قىزىل كىتاپقا ەنگەن جانۋار 20 ءساۋىر كۇنى الماتى حايۋاناتتار باعىنا جەتكىزىلگەنىن مالىمدەدى.