سەناتتىڭ قارجى جانە بيۋدجەت كوميتەتىنىڭ دەپۋتاتتارى «بيۋدجەت ساياساتى مودەلىن رەفورمالاۋ» تاقىرىبىندا دوڭگەلەك ۇستەل وتىرىسىن وتكىزدى. وعان ۇلتتىق ەكونوميكا, قارجى مينيسترلىكتەرىنىڭ باسشىلىعى, سونداي-اق جوعارى اۋديتورلىق پالاتانىڭ مۇشەلەرى قاتىستى, دەپ حابارلايدى Egemen.kz.
كوميتەت توراعاسى سۇلتانبەك ماكەجانوۆ ءوز سوزىندە قازاقستان مەملەكەتتىك قارجىنى ءتيىمدى باسقارۋعا جانە ەلىمىزدىڭ الەۋمەتتىك-ەكونوميكالىق دامۋىنىڭ باسىم مىندەتتەرىن ىسكە اسىرۋعا باعدارلانعان زاماناۋي بيۋدجەتتىك جۇيەنى قۇرۋ بويىنشا ۇلكەن جولدان وتكەنىن اتاپ ءوتتى.
«مەملەكەت باسشىسى قاسىم-جومارت توقاەۆ قويعان مىندەتتەردى ەسكەرە وتىرىپ, بيۋدجەت جۇيەسىن رەفورمالاۋ تيىمدىلىكتى جانە مەملەكەتتىك شىعىستاردىڭ ناتيجەلىلىگىن ارتتىرۋعا, ۇلتتىق قور قاراجاتىن ۇتىمدى پايدالانۋعا جانە مەملەكەت قارجىسىنىڭ تەڭگەرىمدىلىگىن قامتاماسىز ەتۋگە باعىتتالۋعا ءتيىس. وسى تاسىلدەردى ءتيىمدى ىسكە اسىرۋ جاڭا بيۋدجەت كودەكسىندە كورىنىس تابۋى كەرەك», دەدى سەناتور ماكەجانوۆ.
دوڭگەلەك ۇستەلگە قاتىسۋشىلار جاڭا بيۋدجەت كودەكسىنىڭ نەگىزگى باعىتتارى مەن مىندەتتەرىن تالقىلادى. ولاردىڭ ىشىندە: سالىق-بيۋدجەت ساياساتىنىڭ بەرىك ىرگەتاسىن قالاۋ, بيۋدجەت قارجىسىن جوسپارلاۋ مەن پايدالانۋدىڭ تيىمدىلىگىن ارتتىرۋ, سونداي-اق بيۋدجەت پروتسەسىنە قاتىسۋشىلاردىڭ ەسەپ بەرۋىن قامتاماسىز ەتۋ ماسەلەلەرى بار.
سەناتورلار كەزدەسۋ بارىسىندا بورىشقا بەكەمدىككە, ونىڭ ىشىندە بيۋدجەتتىك قاۋىپتەر مەن مەملەكەتتىك قارجىسىنىڭ ۇزاق مەرزىمدى تۇراقتىلىعى تۋرالى جىل سايىنعى تالداۋ ەسەپتى دايىنداۋ اياسىندا كەشەندى تالداۋ جۇرگىزۋ قاجەتتىگىن اتاپ ءوتتى.
ۇلتتىق ەكونوميكا ءمينيسترىنىڭ ءبىرىنشى ورىنباسارى تيمۋر جاقسىلىقوۆ, قارجى ءمينيسترىنىڭ ورىنباسارى داۋرەن تەمىربەكوۆ, سونداي-اق جوعارى اۋديتورلىق پالاتانىڭ مۇشەسى يۋليا ەنگەل دە بايانداما جاسادى.