استانا قالاسىنىڭ ەمحانالارىندا قوسىمشا جەدەل مەديتسينالىق كومەك بولىمشەلەرى اشىلادى. بۇل تۋرالى قالالىق مساك ديرەكتورلارىنىڭ قاتىسۋىمەن وتكەن قوعامدىق دەنساۋلىق ساقتاۋ باسقارماسىندا وتكەن كەڭەستە ايتىلدى, دەپ حابارلايدى Egemen.kz ەلوردا اكىمدىگىنىڭ ءباسپاسوز قىزمەتىنە سىلتەمە جاساپ.
قالالىق №4, №5 جانە №10 ەمحانالاردا جىل باسىنان جەدەل مەديتسينالىق كومەك بولىمشەلەرى پيلوتتىق رەجيمدە ىسكە قوسىلعان بولاتىن. نەگىزگى ماقسات – ستاتسيونارداعى دارىگەرلەر جۇكتەمەسىن ازايتۋ جانە شۇعىل العاشقى كومەك قولجەتىمدىلىگىن ارتتىرۋ.
قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆتىڭ باسشىلىعىمەن ەلوردالىق مەديتسينانى دامىتۋ ماسەلەلەرى بويىنشا جينالىس ءوتتى. كۇن تارتىبىندەگى ءبىرىنشى ماسەلە تاعى دا قوسىمشا جەدەل مەديتسينالىق جاردەم ءبولىمىن اشۋ بولدى.
باسقارما باسشىسىنىڭ ايتۋىنشا, مۇنداي بولىمشەلەردىڭ كومەگىمەن ۋچاسكەلىك دارىگەردى ۇيگە شاقىرۋلار سانى ازايىپ, ەمحانادا پاتسيەنتتەردى قابىلداۋ ۋاقىتى ارتادى.
«پاتسيەنتتەر اۋرۋحانانىڭ قابىلداۋ بولىمىنە كۇش تۇسىرمەي, بىردەن ەمحانادا العاشقى كومەك مامانىنىڭ قابىلداۋىنا كەلە الادى. ال ستاتسيوناردا اۋرۋحاناعا جاتقىزۋدى ناقتى قاجەت ەتەتىن بەلگىلى ءبىر كونتينگەنتكە كومەك كورسەتىلەدى. ياعني شىن مانىسىندە كومەككە مۇقتاج اۋىر دەڭگەيدەگى ناۋقاستار ستاتسيوناردا كوپ كۇتپەيدى. №4, №5 جانە №10 قالالىق ەمحانالاردا اشىلعان پيلوتتىق جوبا جاقسى ناتيجە كورسەتتى», دەدى تيمۋر مۇراتوۆ.
ەگەر بۇرىن شامادان تىس جۇكتەمە سالدارىنان ۋچاسكەلىك دارىگەردىڭ قابىلداۋىنا جازىلۋ مۇمكىن بولماسا, قازىر پاتسيەنتتەر سول كۇنى شۇعىل تۇردە جەدەل جاردەم دارىگەرىنە قارالادى.
«مۇنداي بولىمشەلەر ەندى تاعى بىرنەشە ەمحانادا اشۋ جوسپاردا تۇر. ءبىزدىڭ ماقساتىمىز – مەديتسينالىق كومەكتىڭ قولجەتىمدىلىگىن ارتتىرۋ جانە ۋاقىتىلى شۇعىل كومەك كورسەتۋدى قامتاماسىز ەتۋ», دەپ اتاپ ءوتتى باسقارما باسشىسى.
سونداي-اق جينالىس «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ قالالىق فيليالىنىڭ توراعاسى سانسىزباي ەسىلوۆ ەگدە جاستاعى ادامدارعا مەديتسينالىق كومەك كورسەتۋ ماسەلەسىن قوزعادى. استانا قالاسى قوعامدىق كەڭەسىنىڭ توراعاسى 60 جاستان اسقان ادامدارعا قولجەتىمدى جانە ساپالى كومەك كورسەتۋ ءۇشىن گەرونتولوگيالىق كابينەتتەر اشۋدى ۇسىندى.