شاۆقات شويىن سىناماسىن الدى

شاۆقات راحمونوۆ – UFC اياسىندا جارتىلاي ورتا سالماقتا ونەر كورسەتەتىن قازاقستاندىق ارالاس جەكپە-جەك شەبەرى. ول WMMAA بويىنشا الەم چەمپيونى جانە ازيا چەمپيونى رەتىندە جاستارعا ۇلگى بولىپ, اتى اڭىزعا اينالدى. 

​قازاقستان پرەزيدەنتى قاسىم-جومارت توقاەۆ شاۆقات راحمونوۆتى جەكە قابىلداي وتىرىپ, ول سياقتى مىقتى سپورتشىلاردىڭ جەڭىسكە دەگەن ەرىك-جىگەرى مەن جەتىستىگى جاس ۇرپاقتى قاناتتاندىرىپ, جاستاردى سالاۋاتتى ءومىر سالتىن ۇستانۋعا جەتەلەيتىنىن اتاپ وتكەن بولاتىن.

​شاۆقات راحمونوۆ ەلىمىزدەگى ەڭ ءىرى مەتاللۋرگيا كاسىپورىندارىنىڭ بىرىنە بارۋدى كوپتەن بەرى ارمانداپ ءجۇر ەكەن. سەبەبى, شويىننىڭ قالاي سوعىلاتىنىن كورۋ – رينگتەگى جەكپە-جەكتەن كەم ەمەس عاجاپ كورىنىس. «ارسەلورميتتال تەمىرتاۋ» كومپانياسىنىڭ باسشىلىعى چەمپيونعا وسى مۇمكىندىكتى ۇسىندى. البەتتە, اۋەلى اتالعان اكتسيونەرلىك قوعامنىڭ باس ديرەكتورى ۆلاديمير يابلونسكيمەن كەزدەسۋ بولدى. ۆلاديمير يۆانوۆيچ مەيمانعا كومپانيا, ونىڭ ەنشىلەس كاسىپورىندارى جانە قول جەتكىزىلگەن جەتىستىكتەر جايلى اڭگىمەلەپ بەردى.

- ءبىزدىڭ كومپانيامىز – تۇراقتى كاسىپورىن. كومپانيانىڭ ومىرلىك تسيكلىنىڭ كەز كەلگەن كەزەڭىندە, مەيلى ول قالىپتاسۋ, ءوسۋ نەمەسە ءتىپتى داعدارىس بولسىن, كومبيناتتا جۇمىس ىستەيتىندەر ءاردايىم تۇراقتىلىقتى سەزىنەدى. ءبىزدىڭ كوماندامىزدا ءوز ءىسىن بىلەتىن جانە جاقسى كورەتىن ماماندار جۇمىس ىستەيدى. شاۆقات, ءسىز, سپورتشى, چەمپيون رەتىندە جەڭىسكە قالاي جەتۋگە بولاتىنىن ەشكىمنەن كەم بىلمەيسىز. تەك قيىندىقتاردى جەڭە وتىرىپ, چەمپيون, كاسىپقوي بولا الاسىز. ءبىزدىڭ كاسىپورىندا كوپتەگەن سپورتشى جۇمىس ىستەيدى. ءبىر كەزدە مەن دە سامبومەن اينالىستىم جانە سپورت اركىمنىڭ ومىرىنەن ورىن الۋى كەرەك دەپ سانايمىن, - دەدى ۆلاديمير يابلونسكي.شاۆقات راحمونوۆ قاراعاندى ءوڭىرىن ءوزىنىڭ تۋعان جەرىندەي كورەدى. ويتكەنى سپورتشى ۇزاق ۋاقىت بويى وسىندا تۇرىپ, جاتتىقتى. ول ءۇشىن قازاقستاننىڭ ەڭ ءىرى مەتاللۋرگيا كومبيناتىنا بارۋ تولقىنىستى دا قۋانىشتى بولدى. 

​- قاراعاندى جەرى تالانتتار مەن تۋما دارىندارعا باي. اسىرەسە سپورتتا تالاي چەمپيون تاربيەلەندى. ناق وسى جەردە ادام مىنەزىشىڭدالادى, - دەپ اتاپ ءوتتى ۆلاديمير يابلونسكي.ال ارنايى مەدال تاپسىرۋ – چەمپيون ءۇشىن جاعىمدى توسىنسىي بولدى. بۇل ماراپاتتىڭ سپورتتىق جەتىستىكتەرگە تىكەلەي قاتىسى بولماسا دا, شاۆقات  كومپانيانىڭ ارنايى مەدالىن ءوزىنىڭ سپورتتىق جەتىستىكتەرى ءۇشىن العان مەدالدارىنىڭ ەشقايسىسىنان كەم كورمەيتىنىن ايتتى. 

​«ارسەلورميتتال تەمىرتاۋ» كومپانياسىنىڭ باسشىلىعىمەن كەزدەسۋدەن كەيىن كاسىپورىن جۇمىسكەرلەرى مەن ولاردىڭ بالالارى چەمپيونمەن جۇزبە-ءجۇز جولىعىپ, بىرگە سۋرەتكە ءتۇسىپ, اۆتوگراف الدى. اسىرەسە كىشكەنتاي جانكۇيەرلەردىڭ قۋانىشىندا شەك بولمادى.شاۆقات راحمونوۆ ءوزىنىڭ «ارسەلورميتتال تەمىرتاۋ» اق مەتاللۋرگيا كومبيناتىنا دوستىق ساپارى تۋرالى قۇرمەتتى قوناقتار كىتابىنا ەستەلىك جازبا قالدىردى. سودان كەيىن كيىمىن اۋىستىرىپ, قاۋىپسىزدىك تەحنيكاسى بويىنشا نۇسقاۋلىقتان وتكەن سوڭ كومبيناتتىڭ جۇرەگى – №3 دومنا پەشىنە كەلىپ, شويىن سىناماسىن الدى. چەمپيوننىڭ ايتۋىنشا, بۇل ۇدەرىس كەرەمەت تاڭعالارلىقتاي ەكەن. بىراق سپورتشى تەك ءوزى كورگەن سۇلۋلىقتى, اۋقىمدىلىق پەن تارتىمدىلىقتى عانا باعالاعان جوق. ول مەتاللۋرگ ەڭبەگى ەڭ اۋىر جۇمىستىڭ ءبىرى ەكەنىن مويىندادى.​

- تەمىرتاۋدا, وسىنداي ءىرى مەتاللۋرگيا كومبيناتىندا مەن العاش رەت بولىپ تۇرمىن, - دەدى چەمپيون.

- دومنا پەشىنىڭ قالاي جۇمىس ىستەيتىنىن كورۋ, مەتاللۋرگتەرمەن سويلەسۋ وتە اسەرلى بولدى. كومبيناتتاعى جۇمىس اۋىر ەكەن, جوعارى تەمپەراتۋرا, ۇزدىكسىز ءوندىرىس. بۇگىن مەن شويىن سىناماسىن الىپ كوردىم. بۇل اۋىر جۇمىس بولىپ شىقتى. كومبيناتتا, شىنىندا دا, مىقتى ادامدار جۇمىس ىستەيدى ەكەن! 

​شاۆقات راحمونوۆ مەتاللۋرگتىڭ جۇمىسى سپورتشى ەڭبەگىنە ۇقسايتىن ۇدايى اۋىر ەڭبەك ەكەنىن اتاپ ايتتى. 

​كەزدەسۋ سوڭىندا چەمپيون «ارسەلورميتتال تەمىرتاۋدىڭ» بارلىق جۇمىسكەرىنە باعىشتاپ: «قىمباتتى دوستار, سىزدەرگە زور دەنساۋلىق جانە ەڭبەكتە تابىس تىلەيمىن!», دەپ ىزگى نيەتىن ءبىلدىردى.