سيدنەي وليمپياداسىنىڭ چەمپيونى بەكزات ساتتارحانوۆتىڭ تۇركىستان عانا ەمەس, قازاق قوعامى ءۇشىن ورنى بولەك. ەڭبەكقورلىق پەن نامىستى بيىك قوياتىن قاسيەتىمەن قازاق ەلىنىڭ تۋىن جەلبىرەتكەن ازاماتتىڭ ءىزباسارلارى بۇگىندە وتە كوپ. وعان تۇركى-ستاندا ۇيىمداستىرىلعان باسەكەدە كەزەكتى رەت كوز جەتكىزدىك.
تۇركىستاندا 2000 جىلعى سيدنەي وليمپياداسىنىڭ جەڭىمپازى, «بارىس» وردەنىنىڭ تۇڭعىش يەگەرى, تالانتتى بوكسشى بەكزات ساتتارحانوۆتى ەسكە الۋعا ارنالعان جاستار اراسىنداعى حالىقارالىق تۋرنير ءوتتى. وبلىس اكىمدىگى, وبلىستىق سپورت باسقارماسى جانە ءابدىسالان نۇرماحانوۆ اتىنداعى وليمپيادالىق سپورت مەكتەبى ۇيىمداستىرعان حالىقارالىق بوكس دوداسىنا وزبەكستان, تاجىكستان, قىرعىزستانمەن قاتار, ەلىمىزدىڭ بارلىق ايماعىنان بىلعارى قولعاپ شەبەرلەرى قاتىستى. جالپى, 22 كوماندا, 200-دەن اسا بوكسشى قاتىسقان بيىلعى بوكس باسەكەسىنىڭ ەرەكشەلىگى – تۇڭعىش رەت قىزدار دا 5 سالماق دارەجەسىندە قولعاپ ءتۇيىستىردى. ۇلدار 13 سالماق بويىنشا جەڭىمپازداردى انىقتادى. جيىرما جاسىندا جاسىنداي جارقىلداپ, سيدنەي وليمپياداسىنىڭ شىڭىن باعىندىرعان بەكزاتتىڭ اناسى سىرلىكۇل ساتتارحانوۆا دا باتىر ۇلىن ەسكە الۋعا ارنالعان ءتۋرنيردىڭ اشىلۋ راسىمىنە ارنايى كەلدى. سپورت جاناشىرلارى مەن بەلگىلى بوكسشىلار ولجاس ورازاليەۆ, قاناتبەك شاعاتاەۆ, ءبىرجان جاقىپوۆ قاتىستى.
تارتىستى وتكەن بوكس دوداسى بەكزات ساتتارحانوۆتىڭ تۋعان كۇنى, ياعني 4 ساۋىردە اياقتالدى. اۋەسقوي بوكستا 143 جەكپە-جەك وتكىزىپ, 132 كەزدەسۋىندە جەڭىسكە جەتكەن, 20 جاسىندا وليمپ تۇعىرىن باعىندىرعان بەكزات ساتتارحانوۆ ءتىرى بولسا, 43 جاسقا تولار ەدى. تۋرنير جەڭىمپازدارىن ماراپاتتاۋ راسىمىنە قاتىسقان وبلىس اكىمىنىڭ ورىنباسارى بەيسەنباي تاجىباەۆ باستاعان ازاماتتار جەڭىسكە جەتكەن بوكسشىلاردى قۇتتىقتاپ, ىزگى تىلەكتەرىن ءبىلدىردى.
«ەر بەكزاتتىڭ تۋعان جەرىندە كۇش سىناسۋ, جۇلدەگەر اتانۋ – كەز كەلگەن بوكسشىنىڭ ارمانى. عۇمىرى قىسقا بولعانىمەن, وشپەس ءىز قالدىرعان سپورتشىعا ءار وتانداسىمىزدىڭ قۇرمەتى بولەك», دەدى وبلىس اكىمىنىڭ ورىنباسارى. كەزىندە سيدنەي تورىندە بەكزاتپەن بىرگە ۇلتتىق قۇراما-
نىڭ نامىسىن قورعاعان, وليمپيادا چەمپيونى ەرماحان ىبىرايىموۆ ءتۋرنيردىڭ دەڭگەيى جوعارى ەكەنىن جەتكىزدى. ءداستۇرلى بوكس ءتۋرنيرى جىل سايىن قانشاما تالانتتى جاستىڭ شەبەرلىگىن شىڭداپ جاتىر.
سونىمەن حالىقارالىق تۋرنيردە قىزدار اراسىندا ءوڭىر نامىسىن قورعاعان 50 كيلوداعى تۇركىستاندىق دەلفينا ءابىلحان التىن مەدال يەلەندى. ال 57 كيلودا ۇلجان سارسەنبەك توپ جارسا, 75 كيلوداعى تۇركىستاندىق ارۋ شۇعىلا نالىبايعا تەڭ كەلەر قارسىلاس بولمادى. وسىلايشا, قىزدار اراسىنداعى ايقاستا 3 التىن مەدال وبلىس قورجىنىنا ءتۇستى. ال ۇلدار اراسىندا تۇركىستان وبلىسىنىڭ باستى ءۇمىتى 60 كيلودا جۇدىرىقتاسقان باقتيار انارباەۆ جەڭىمپاز اتاندى. بۇدان وزگە التىن مەدال جەڭىپ العان رينگ قوجايىندارى قاتارىندا 63,5 كيلودا باق سىناعان تورەحان سابىرحان, 67 كيلودا ەراسىل جۇماقۇل بار.
تۋرنير جەڭىمپازدارى مەن جۇلدەگەرلەرىنە لايىقتى قۇرمەت كورسەتىلدى.
تۇركىستان