پوليتسيا الەۋمەتتىك جەلىدە تاراعان بەينەجازباداعى كوپىردەن سەكىرىپ كەتكەن ادامدى انىقتادى, دەپ حابارلايدى Egemen.kz Polisia.kz سايتىنا سىلتەمە جاساپ.
الەۋمەتتىك جەلىلەرگە مونيتورينگ جۇرگىزۋ كەزىندە تۇركىستان وبلىسىنىڭ پوليتسەيلەرى جاس جىگىتتىڭ دوسىمەن باستەسىپ, كوپىردەن سەكىرىپ كەتكەن بەينەجازباسىن انىقتادى.
وقيعا 1 ساۋىرگە قاراعان ءتۇنى سايرام اۋدانى اقسۋكەنت ماڭىنداعى اقسۋ وزەنىندە بولعان. سايرام اپب-نىڭ قىزمەتكەرلەرى جاستاردىڭ كىم ەكەنىن انىقتادى.
جىگىتتەردىڭ ءبىرى ۆيدەوعا تۇسىرسە, ەكىنشىسى كوپىردەن سەكىرگەن. ولاردىڭ اۋىل تۇرعىندارى ەكەنى بەلگىلى بولدى. ەكى جىگىت ۆيدەونى اقشا الۋ ءۇشىن ەمەس, ءازىل ءۇشىن, سودان كەيىن Tik Tok جەلىسىنە ورنالاستىرۋ ماقساتىندا تۇسىرگەنىن ايتتى.
سۋعا سەكىرگەن جىگىت جاراقاتتانباعان جانە ونىڭ دەنساۋلىعىنا ەشقانداي قاۋىپ تونبەگەن. ولار ىستەرىنە وكىنەتىنىن ايتىپ, بۇدان بىلاي مۇنداي اسىعىس, ءارى ومىرگە قاۋىپ توندىرەتىن ارەكەتتەردى جاساماۋعا ۋادە بەردى.
سونداي-اق ءتارتىپ ساقشىلارى ولارعا پروفيلاكتيكالىق تۇسىندىرمە شارالارىن جۇرگىزدى.