اتىراۋ اۋەجايى جولاۋشىلارعا ساپاسىز قىزمەت كورسەتكەنى ءۇشىن اكىمشىلىك جاۋاپكەرشىلىككە تارتىلدى, دەپ حابارلايدى Egemen.kz ازاماتتىق اۆياتسيا كوميتەتىنىڭ ءباسپاسوز قىزمەتىنە سىلتەمە جاساپ.
ازاماتتىق اۆياتسيا كوميتەتى قولدانىستاعى زاڭناما تالاپتارىن بۇزعانى ءۇشىن ازاماتتىق اۆياتسيا سۋبەكتىلەرىن اكىمشىلىك جاۋاپكەرشىلىككە تارتۋ بويىنشا جۇمىستى جالعاستىرىپ جاتىر.
«وسىلايشا, «قازاقستاننىڭ اۆياتسيالىق اكىمشىلىگى» اق جەرۇستى قىزمەت كورسەتۋ قىزمەتتەرىنىڭ (جۇمىستارىنىڭ) ساپاسىن باقىلاۋ مەن قاداعالاۋدى جۇزەگە اسىرۋ شەڭبەرىندە 2022 جىلعى 27 جەلتوقساندا 2021 جىلى ينسپەكتسيالىق تەكسەرۋ قورىتىندىلارى بويىنشا انىقتالعان ەسكەرتۋلەردى ورىنداۋ جانە جويۋ بويىنشا اتىراۋ اۋەجايىنا جوسپاردان تىس ينسپەكتسيالىق تەكسەرۋ جۇرگىزىلدى», دەلىنگەن ازاماتتىق اۆياتسيا كوميتەتىنىڭ ءباسپاسوز قىزمەتىنىڭ حابارلاماسىندا.
قورىتىندى تەكسەرۋ بارىسىندا جولاۋشىلارعا كورسەتىلەتىن قىزمەتتەردىڭ ساپاسىنا اسەر ەتەتىن بۇزۋشىلىقتار, اتاپ ايتقاندا, جولاۋشىلار ءليفتىنىڭ بولماۋى, ءجۇرىپ-تۇرۋى شەكتەۋلى جولاۋشىلارعا قىزمەت كورسەتۋ ءۇشىن شارتتاردىڭ زاڭنامالىق تالاپتارعا سايكەس كەلمەۋى انىقتالدى, سونداي-اق 2021-2022 جىلدارعا ارنالعان تۇزەتۋ ءىس-قيمىلدارى جوسپارىنىڭ ورىندالماۋ فاكتىسى انىقتالدى.
تەكسەرۋ ناتيجەلەرى بويىنشا ينسپەكتورلىق نۇسقاما جازىلىپ, ورىندالۋ مەرزىمى 1 اي بولاتىن انىقتالعان ەسكەرتۋلەردى جويۋ جونىندەگى ءىس-قيمىل جوسپارى جاسالدى.