مۇنايلى اۋدانىنا قاراستى باسقۇدىق اۋىلدىق وكرۋگىندە تۇراتىن «كۇمىس القا» يەگەرى گۇلسارا ۆاپاەۆا سايلاۋ ۋچاسكەسىنە 5 جاستان اسقان ۇشەم ەربول, نۇربول, ىڭكارمەن بىرگە كەلدى, دەپ حابارلايدى Egemen.kz.
«بۇگىن ەرتە تۇرىپ, سايلاۋعا كەلدىك. وسىنداي شەشۋشى ساتتەن قالىس قالماۋىمىز قاجەت دەپ تاپتىق. ويتكەنى بالالارىمىزدىڭ ەرتەڭى بۇگىن سايلاناتىن دەپۋتاتتارعا, ولار قابىلدايتىن زاڭدارعا تىكەلەي بايلانىستى. بالالارىمىزدىڭ بولاشاعى جارقىن بولسىن دەگەن نيەتپەن تاڭداۋ جاسادىق», دەيدى التىن قۇرساقتى انا.
بۇگىندە گۇلسارا ۆاپاەۆا ۇلكەن شاڭىراقتىڭ ءتۇتىنىن جاعىپ وتىرعان اياۋلى كەلىن, ارداقتى انا. التى بالاسى بار. ۇل-قىزدارىنىڭ الدى 5-سىنىپتا وقىسا, كىشىسى بەسىككە بولەۋلى. ساياسي ناۋقاندا بەلسەندىلىك تانىتقان ۇشەمدەردىڭ اتا-اناسىنا ەستەلىك سىيلىقتار تابىستالدى. مۇنايلى اۋدانىندا داۋىس بەرۋگە كەلىپ جاتقان كوپبالالى انالاردىڭ قاراسى قالىڭ. باتىر اۋىلىنىڭ تۇرعىنى, 4 بالانىڭ اناسى مونشاق ۋاليەۆا N214 سايلاۋ ۋچاسكەسىنە كەلىپ, ءوز تاڭداۋىن جاسادى.
«ەلىمىز ءۇشىن ماڭىزدى سانالاتىن ساياسي ناۋقاندا ەشقايسىمىز قالىس قالماۋعا ءتيىسپىز دەپ ويلايمىن. ۇكىمەت تاراپىنان قولداۋ كوپ, اي سايىن جاردەماقىنى تۇراقتى الىپ تۇرامىز. بۇدان بولەك, جاڭا تۋعان انالارعا جاردەماقى مولشەرى ارتتى, مەكتەپ جاسىنداعى بالالار دا تىس قالمادى. جاقسى باستامالار جالعاسىن تابا بەرسىن», دەيدى ول.