قۇرمانعازى اۋدانىندا تۇراتىن ەرتوستىك قالەنوۆتى بەيبىت كۇننىڭ باتىرى دەۋگە بولادى. ويتكەنى سۋعا باتىپ بارا جاتقان ەكى ادامدى ءبىر ءوزى قۇتقارىپ قالدى. امان قالعانداردىڭ ءبىرى – اۋىلداس ايەل بولسا, ەكىنشىسى – مەكتەپ وقۋشىسى.
بۇل اۋداندا سۋ ايدىنى كوپ. ءۇش بالا بايتارال ەلدى مەكەنىنىڭ تۇسىنداعى «سۇرحان» كانالىنا ويناۋعا بارعان. مۇز ويىلىپ, ءبىر بالا سۋعا ءتۇسىپ كەتكەن. كومەك سۇراعان بالالاردىڭ داۋىسىن ەستىگەن بىرەۋىنىڭ اناسى جۇگىرىپ جاعاعا جەتكەن. ەكى بالانى قاۋىپسىز جەرگە شىعارىپ, ويىقتاعى ءجاسوسپىرىمدى قۇتقارۋ ءۇشىن قولىن سوزعان. بىراق ءومىر ءۇشىن جانتالاسقان بالانى شىعارا الماي, ءوزى دە سۋعا قۇلاعان.
جاعاداعى بالالاردىڭ ءبىرى ەرتوستىك قالەنوۆتىڭ ۇيىنە بارىپ, كومەك سۇراعان. ول الدىمەن ويىقتان ايەلدى قۇتقارعان. سودان كەيىن سۋدان شاشى عانا كورىنىپ تۇرعان بالانى سۋىرىپ الىپ, اجالدان اراشالاپ قالدى. جەدەل جاردەم شاقىرىپ, فەلدشەرلەر مەرەي رازەدەنوۆ پەن اينۇر وتەسوۆاعا تاپسىرعان. ولار سۋدان قۇتقارىلعان بالاعا العاشقى كومەك كورسەتىپ, اۋداندىق ورتالىق اۋرۋحاناعا جەتكىزگەن. دارىگەرلەر كلينيكالىق ءولىم جاعدايىنداعى بالانى ومىرگە قايتا ورالتتى.
– قازاقتىڭ كەز كەلگەن ازاماتى قينالعان جانعا كومەك بەرۋدەن قاشپايدى. بالالار ۇيىمە كەلىپ, سۋعا كەتكەن ەكى ادامدى قۇتقارۋعا كومەكتەسۋىمدى سۇرادى. ولاردىڭ قينالعان ءتۇرىن كورىپ, شىداپ تۇرا المادىم. ەكى ادامدى اجالدان قۇتقارىپ قالعانىمدى ەرلىككە بالامايمىن. مەنىڭ ورنىمدا وزگە ادام بولسا, ءدال وسىلاي ارەكەت ەتكەن بولار ەدى, – دەيدى ەرتوستىك قالەنوۆ.
اتىراۋ وبلىسى