«قۇرالاي كوز, قولاڭ شاش,الما مويىن, قيعاش قاس». ءيا, ادەمىلىك – ايەلگە ءتان. كوكتەمنىڭ قىزعالداعىنداي قۇلپىرىپ كەتەتىن قىز-كەلىنشەكتەردىڭ اجارىن اشاتىن القا, جۇزىك, سىڭعىرلى سىرعاسىن جاساۋدا وزىندىك ورنەگىن قالىپتاستىرعان, باسەكەلەستىكتە ءباسى جوعارى قولونەر شەبەرى مەرۋەرت ەرمەكوۆانىڭ «التىن تاس» اتالاتىن برەندتىك بۇيىمدارى ءاردايىم سۇرانىسقا يە.
تابيعاتى كوركەم تالعار قالاسىندا تۇراتىن مەرۋەرتتىڭ كورەر كوز قىزىعارلىق ساۋكەلەدەن باستاپ, بىلەزىك, شەكەلىك, وڭىرجيەك, القا, شاشباۋ سىندى اشەكەي بۇيىمدارى ەلىمىزدىڭ ءار تۇكپىرىنە جونەلتىلەدى. سونداي-اق مونشاقتان جاسالعان ادەمى اشەكەيلەرى جىل سايىن كىتاپحانالار مەن جوعارى وقۋ ورىندارىندا, مەكتەپتەر مەن مۋزەيلەردە ۇيىمداستىرىلاتىن قولونەر شەبەرلەرىنىڭ كورمەلەرىنەن ورىن الىپ, كورەرمەن ىقىلاسىنا بولەنىپ ءجۇر.
– دۇنيەگە كەلگەنىمدە اتا-انام مەرۋەرت وتەكەشوۆاداي اكتريسا بولسىن دەگەن ىرىممەن ەسىمىمدى مەرۋەرت قويىپتى. بىراق اكتريسا ەمەس, ۇستازدىق جولدى تاڭدادىم. ۋاقىت وتە كەلە جۇرەك تۇكپىرىمدەگى قولونەرگە دەگەن قىزىعۋشىلىعىم ارتىپ, ءبىرجولا وسى كاسىپتى دوڭگەلەتۋگە بەت بۇردىم. ايەلدەردىڭ اشەكەي بۇيىمدارىن جاساۋمەن اينالىسقانىما دا ون جىلعا جۋىقتاپتى, – دەگەن قولونەر شەبەرىنىڭ وسى جىلداردا جاساعان جۇزدەگەن بۇيىمى ءوز تۇتىنۋشىلارىن تاپقان.
«ساۋساق بىرىكپەي – ينە ىلىكپەيدى». شەبەرقول انالارىمىزدىڭ يگى مۇرالارىن ۇرپاقتان ۇرپاققا ءجىبىن ۇزبەي جەتكىزۋدە ۇلاعاتتى ءىس تىندىرىپ جۇرگەن مەرۋەرت ۇسەنبەكقىزى ىسكە يكەمدى قىزدارعا اقىل-كەڭەس بەرۋدەن ايانبايدى.
– بۇرىمدىلارىمىز ۋاقىتتى بەكەر وتكىزبەي, كونەنىڭ كوزىندەي بولعان كاسىپتى زامانۋي ۇلگىدە جاڭعىرتىپ, جالعاستىرۋعا نيەتتەنسە نەگە قۋانباسقا؟ كوپ بولماعانمەن ارا-تۇرا قىزىققان قىزدار كەلىپ, تاستاردى ءتىزىپ, مونشاق, بىلەزىك, باسقا دا بۇيىمداردى جاساۋدىڭ جولدارىن ۇيرەنە ءجۇرىپ, قولعابىسىن تيگىزگەندە «ۇيرەنگەنىڭ وزىڭە جاقسى, ىستەگەنىڭ ماعان جاقسى» دەيتىن انالارىمىزدىڭ اقىلى ەسكە تۇسەدى. جالپى, تاستاردىڭ قاسيەتىنە سەنەتىن ىرىمشىل حالىقپىز عوي. سول سەبەپتى تاستاردان تۇزىلەتىن ءتاسپى, بىلەزىك, تۇمارعا سۇرانىس جوعارى. كوبىنە نەفريت, شۋنگيت, يانتار, مارجان تاستاردى پايدالانامىن. نەفريتتىڭ ءتۇسى جاسىل بولعاندىقتان «مۇسىلمان تاسى» دەپ اتالادى. مىسالى, يانتاردى زوب اۋرۋىنا پايدالى دەپ ەسەپتەسە, شۋنگيتكە ەر ادامداردىڭ قىزىعۋشىلىعى جوعارى, – دەيدى ءوز ءىسىنىڭ شەبەرى.
نازىك ساۋساقتارىنا ىلىنگەن ءار تاستى جوعارى تالعاممەن ۇيلەستىرە وتىرىپ ءتىزىپ, ءبۇتىن ءبىر بۇيىم قۇراپ شىعارۋ ءۇشىن اسا توزىمدىلىك پەن ەپتىلىك قاجەت-اق. ال بۇل ءوز ءىسىن ايرىقشا سۇيەتىن مەرۋەرتتىڭ ەڭ اسىل قاسيەتتەرى دەسەك اسىرا ايتقاندىق ەمەس.
ۇلبوسىن يسابەك,
جۋرناليست
الماتى وبلىسى,
تالعار اۋدانى